RINALATAN 26 - Tanou Moonsoi Timugon

Nagisaung i Paulus ra saang ru raja' Agripa

¹ Indagu i Agripa ri Paulus, “Raino kaluagan muno magisaung.” Pangani' i Paulus ra pulanu koson kinayang kalindu' nali indagu io boo koson ragitio:

² “Raja' Agripa, paringkuanangan kuno rirun ra magisaung am makapambala' aku rirun am ngaangai' panguwan raki' ru ulun ru Jaudi.

³ Mulu' poyo sabap ra okou nakaintutun toojo ra kaulayan am niayuk kapaganan ru ulun ru Jaudi. Sabap raginio, malansan aku ra masaga' kou niayuk mangkirongog raki' ra guang mataan.

⁴ “Ngaangai' ulun ru Jaudi nakapandai ra ati kulaan kaayagan kuno intor ra aku mamulok ayuk poyo. Nakapandai ilo niayuk ra ngaangai', intor poyo ragili ra aku soroi ra pagun kuno galama' am bagu giu' ra Jirusalim.

⁵ Lair noyo nakaulig ilo toojo raki'. Amon ru masaga' ilo, makapangani' ilo ra kaintutunan ra intor ragili noyo minaya' aku ra tayar Parisi ondo' sumugut toojo ra ngaangai' kaulayan ru ugama mai.

⁶ Raino bisaraan aku ragiti sabap ra lakat aku poyo mangintopot ra bantu' ri Aki Kapuuno' ra kinamatuaan maili.

⁷ Bantu' ragili niayuk ondo' kalansanan ru koopor am ruo ngantayaran ru Israil, saboi orou-rondom ilo sumamba ri Aki Kapuuno'. Raja' Agripa, sabap ra kalansanan raginio noyo aku ti inuwan ru ulun ru Jaudi.

⁸ Kua ramuyun ti ulun ru Jaudi? Kua kalo makapangintopot kau ra ulun matoi bayagon saguli' ri Aki Kapuuno'?

⁹ “Kaa' mogondo' niayuk raki' ragili, ra aku pana nampaguang ra i Jisus, ulun Nasarit i, musiti' anggalon ku toojo.

¹⁰ Nambaal aku niayuk koson raginio giu' ra Jirusalim. Inanian aku noyo ra surat pangiawan ru tingganai-tingganai imam Jaudi, ra masuang ulun ri Aki Kapuuno' pasubolon ra lamin pangaputan. Nangiou aku niayuk ra ilo ti potoyon.

¹¹ Masalok aku niayuk nangimbolo' risilo giu' ra baloi sambayangan am nampajajal risilo lumugut intor ra inintopot nilai. Nasisang aku kaga' risilo saboi sinunu' ku ilo ra ati ayuk bandar ra pagun bokon koson mangimbolo' risilo.”

Nantunung i Paulus ra nangkulawan nali

¹² “Ra koson raginio niayuk nakapagibit aku ra surat pangiawan intor ra tingganai-tingganai ru Jirusalim mongoi ra Damsyik.

¹³ Raja' Agripa, paat ra aku nangkiralan ra io tanga' ru orou ragili, mokoondo' pulusat silau intor ra limbowon ondo' mapaang kaga' intor ra mato ru orou. Silau i liminiput raki' am niayuk rangan-rangan kuli.

¹⁴ Laub akai boo ngaangai'. Mokobolos norongog ku minindagu raki' ra ragu Ibrani, kono, ‘Saulus, Saulus! Kua pangimbolo' kou Raki'? Marualan kou ayuk galama' amon ru manggal kou niayuk Raki'.’

¹⁵ Indagu aku, ‘Osoi Kou, Tuhan?’ Taam Tuhan i, ‘I Jisus Aku, ondo' imboloon muno.

¹⁶ Kaa' raino, ingkakat no am bigor! Minintalang Aku rirun sabap ra pasaukon tokou ra ulipon Kuno. Ginio musiti' kou mambala' ra ulun bokon ondo' pinakito Kuno rirun ra orou raiti' am niayuk ondo' panuluan Kuno rirun paat ra matong no.

¹⁷ Palabuson tokou intor ra ulun ru Israil am niayuk ulun sala' ka Jaudi. Susubon tokou poyo mongoi ra ulun sala' ka Jaudi

¹⁸ koson mangukab ra guang nilo. Ginio ra makaingkual ilo boo intor ra kalandaman am mokoongoi ra matawang; koson makalabus ilo boo intor ra kuasa' ru Tingganai ru riwato no am makasaguli' ri Aki Kapuuno'. Ra koson raginio, mansail ra pangintapatan nilo Raki', tula nilono ampunon am masauk ilo ra ulun pinili' ri Aki Kapuuno'.’ ”

Nambala' i Paulus ra kondoyon nano

¹⁹ “Raja' Agripa, ginio puun ra aku ti mapirot toojo sumugut ra pagilangan no ondo' pinakito ri Aki Kapuuno' raki'.

²⁰ Ginio ra mambala' aku toojo ra ulun ra musiti' ilo tumalikur intor ra tula nilo am sumaguli' ri Aki Kapuuno', am niayuk maayag ra matanda'. Giu' ra Damsyik galing nambalaan kuno raginio, giu' poyo ra Jirusalim am niayuk ngaangai' ru Judia am poyo intok ru ulun sala' ka Jaudi.

²¹ Ginio noyo ra ulun-ulun ru Jaudi namparakop raki' giu' ra Baloi Tuhan am nangkinam ilo pamatoi raki'.

²² Kaa' saboi raino ti inindangan aku ri Aki Kapuuno'. Ilai' raino ti, mangani' aku niayuk ra kaintutunan kuno ra ngaangai' ulun, ondo' maatang kapoam kalo. Atan ondo' rinagu kutu koson ayuk ra ondo' pinabala' ru nabi-nabi am niayuk ri Musa:

²³ Mamamayag ondo' sinusub ri Aki Kapuuno' musiti' imboloon am Io no ulun kasaa' ondo' maayag saguli' intor ra kapatayan; maa' raginio mampabala' Io ra pamayagan ra ulun ru Jaudi am niayuk ulun intor ra ngaangai' bansa'. Pamayagan ti koson ra silau risilo.”

²⁴ Liliwa' nagisaung i Paulus, golok boo i Pistus, kono, “Paulus, totopot kou no sasambungon! Inigigilaan muno ra najanjayan ondo' nangkinibit rirun mantuyang!”

²⁵ Kaa' taam i Paulus, “Tuan, kalo mantuyang aku. Ngaangai' ondo' rinagu kuni motopot toojo am matanda'.

²⁶ Raja' Agripa! Makakau' aku mindagu ra saang muno sabap ra makatutun kou ra ngaangai' ti. Natutunan ku niayuk ra norongog mu noyo ginio, sabap ra pai' ru nakasibuni ngaangai' ti.

²⁷ Raja' Agripa! Mangintopot kou kia ra rinagu ru nabi-nabi? Maaru' mangintopot kou niayuk!”

²⁸ Taam boo i Agripa ri Paulus, “Indoson muno kia ra mampasauk kou raki' ra Kristian ra mataki'?”

²⁹ Taam i Paulus, kono, “Mataki' kia kapoam mabuoi, ginio kalo maatang, kaa' makiasi' aku ri Aki Kapuuno' ra okou am ngaangai' ondo' mangkirongog raki' ra orou raiti' masauk niayuk ra Kristian koson raki'. Kaa' ondo' ayuk kalo am makaaya' rantayon.”

³⁰ Pupus i, raja' Agripa, gabenor Pistus, i Birniki pana am niayuk ngaangai' ulun miningkakat am miningkual.

³¹ Pakaingkual ilo ayuk raiti am indagu ilo ra rondo' am bokon, “Kolondo' ra rondo' pana sala ru ulun ti ra io ukumin ra potoyon kapoam aputon.”

³² Indagu boo i Agripa ri Pistus, “Sotopot no, makalabus raan ulun ti, kaa' makibisara' io poyo ra Kaisar.”