RINALATAN 24 - Tanou Moonsoi Timugon

Inuwan i Paulus ru ulun ru Jaudi

¹ Kalimaan ragili, i Ananias, iono Tingganai Maayo Imam Jaudi am poyo tingganai ru ulun ru Jaudi ra bokon nababaya' ra sangulun akim makainggalan ri Tirtulus, ngaangai' ilo minongoi ra Kaisaria. Umaa' nilo Gabenor Piliks am pambala' riso ra atan panguwan nilo ri Paulus i.

² Paat ri Paulus piniau ra saang nilo, panguu' i Tirtulus ri Paulus koson ragitio, kono: “Tuan Gabenor ondo' urumaton mai! Paningganayan muno ramon moonsoi am pagun mai kolondo' kapaganan. Maya' ra pintar muno, masuang baal moonsoi am kasingkatan sinauk muno ra bansa' mai.

³ Tuan, ngaangai' raginio inapu mai mabaya' ra paringkuanangan mai rirun.

⁴ Kaa' Tuan, koson kalo mangaawar ragu, raino makitaak aku ra rongogon mu panguwan mai ondo' mariwa' ti.

⁵ Napandayan mai ulun ti masalok mampakasalula' ra kalaatan; mampajajou io ayuk ra ulun ru Jaudi ra ati ayuk intok am io poyo maningganai ra paati ru ulun ru Nasarit.

⁶ Nangkinam io po mampajamol ra Baloi Tuhan, kaa' rokopo' mai io. [Bisaraan mai io raan maya' ra ukum ru ugama mai galama',

⁷ kaa' i Lisias, tingganai maayo ru saujor, nakagaau boo ri Paulus intor ramon.

⁸ Susubo' no boo ngaangai' ondo' manguu' riso i muma' rirun.] Amon ru makuatan mu toojo ulun ragitio, okou galama' boo makapandai ra motopot niayuk ngaangai' ondo' panguwan maili riso.”

⁹ Ulun ru Jaudi pana ondo' soroi ra giu' i minaya' panguu' ri Paulus am nangiou ra ragu ri Tirtulus ti.

Nagisaung i Paulus ra saang ri Piliks

¹⁰ Pangani' boo gabenor no ra pulanu ri Paulus ra mabuli io mindagu. Kon ri Paulus, “Nakapandai aku ra nabuoi kou no nangakim ru pagun ti, ginio ra maansayan aku magisaung ra saang muno.

¹¹ Okou galama' makapangaru' ra olo'-olo' mopor am ruo ngoorou ra nakasail i, minongoi aku sambayang giu' ra Jirusalim.

¹² Kalo nai igondo' ulun ru Jaudi nakakito raki' nanusuk ra ulun masuang giu' ra Baloi Tuhan, baloi sambayangan ra bokon kapoam giu' pana ra bandar.

¹³ Kalo mampainono' niayuk ra rondo' pana panguwan ondo' pinabala' nilo rirun i.

¹⁴ Mangiou aku rirun: Sumamba aku ri Aki Kapuuno' ru kinamatuaan mai maya' ra pangilaan ri Jisus, ondo' karaan nilo ra kalo motopot. Kaa' lakat aku ayuk poyo mangintopot ra ngaangai' ondo' tinulisan ra Ukum ri Musa am Kitab ru Nabi-Nabi.

¹⁵ Nogondo' koson risilo, aku niayuk malansan ri Aki Kapuuno' ra ngaangai' ulun maayag saguli' intor ra kapatayan, io no ulun moonsoi kapoam niayuk ulun malaat.

¹⁶ Ginio boo ra masalok aku mangkinam ra tumanda' ayuk guang kuno ri Aki Kapuuno' am ngaangai' ulun.

¹⁷ Kukula' ngambilor kalio aku ra Jirusalim am bagu siminaguli' aku. Inangayan ku ra giu' i koson magibit ra ruit paindanganon ra bansa' kuno galama' am poyo mangani' ra taak ri Aki Kapuuno'.

¹⁸ Paat ra aku nambaal raginio, natuum nilo aku giu' ra Baloi Tuhan, kokopongo ayuk aku minaya' ra kaulayan pangimpasawan. Kolondo' jajajou pinasalula' kuno ra ulun masuang ragili.

¹⁹ Kaa' kukula' ngaulun ru Jaudi intor ra pagun Asia minongoi ra giu' i. Sotopot no moonsoi ru ilo galama' mongoi uma' rirun Tuan, am mambala' ra panguwan nilai rirun amon ru mokoondo' ilo.

²⁰ Kapoam polosoon ayuk pana ilo ondo' mokoondo' noyo ragiti mambala' ra atan kia kalaatan kuno ondo' natuum nilo paat ra aku binisara' giu' ra Majlis Ugama i.

²¹ Rondo' ayuk nga nauyatan nilai ti, ioginio ondo' golok kuno ra saang nilai ragitio; ‘Bisaraan aku ra orou raiti' sabap ra mangintopot aku ra ulun matoi bayagon saguli'.’ ”

²² I Piliks ti, ondo' masuang noyo kaintutunan intor ra pangilaan ri Jisus, namupus ayuk ra nantimungan ti, kono, “Salasayon ku ayuk gitio, paat ra makaratong i Lisias, tingganai maayo ru saujor no.”

²³ Susubo' no boo sangulun tingganai ru saujor no ra i Paulus ti aputon po. Kaa' inanian no niayuk ra kaluagan koborok, koson nataak no rangan-rangan ri Paulus magalung riso.

Paumaan i Paulus ri Piliks am i Drusila

²⁴ Pakasail kukula' ngoorou raiti, minatong boo i Piliks am andu' nano, i Drusila ulun ru Jaudi. Piawo' ri Piliks i Paulus i am nangkirongog ilo ra pangilaan ri Paulus intor ra pangintapatan ri Jisus Kristus.

²⁵ Kaa' paat ri Paulus nanunggul ra ragu nali intor ra kataawan, kaaratan am niayuk intor ra ukum ra Orou Pupus, nalaa' i Piliks am indagu, “Moonsoi sumaguli' kou raino am amon ru makakaluagan aku poyo, piawon tokou saguli'.”

²⁶ Liliwa' raginio, nalansan i Piliks niayuk ra makaalap io ra ruit pampalabus intor ri Paulus. Ginio sabap ra magail io ayuk manusub ri Paulus porotongon riso koson makimansunur io.

²⁷ Pakasail ruo ngambilor, mokoondo' gabenor bagu, io no i Pirkius Pistus namalit ri Piliks. Kaa' nompoloso io ayuk i Paulus giu' ra lamin pangaputan sabap ra masaga' io mangambi' ra guang ru ulun-ulun ru Jaudi.