RINALATAN 23 - Tanou Moonsoi Timugon

¹ Tantangi' boo ri Paulus ngaangai' ulun ru Majlis Ugama i am indagu, “Pabukat kau ngaangai'! Polos ra orou raiti', bolos ru guang kuno mambala' raki' ra kaayagan kuno kolondo' sala ra pagilangan ri Aki Kapuuno'.”

² Kaining ayuk ragu raginii ri Ananias, Tingganai Maayo Imam Jaudi, susubo' no ulun ondo' nakainggaar i nampalapis ra kabang ri Paulus.

³ Taam ri Paulus riso, “Okou po lapison ri Aki Kapuuno', okou ti ulun maabau-abau, koson ra timbok sinaat ra mapulak! Manturung kou ra giu' no manalasai raki' maya' kunu' ra Ukum ri Musa, kaa' okou po niayuk galama' manggal ra Ukum ti ra okou nanusub ra ulun nampalapis raki'!”

⁴ Indagu ulun-ulun ondo' nakaumbir ri Paulus, “Nagasab kou ra Tingganai Maayo Imam Jaudi, ondo' pinili' ri Aki Kapuuno'.”

⁵ Taam i Paulus, “Pabukat kau ngaangai'! Sotopot no kalo nakatutun aku ra io ti am Tingganai Maayo Imam Jaudi. Ginio mokoondo' noyo tinulisan ra Buuk Kitab, ‘Pai' pagasab ra tingganai ru bansa' mino galama'.’ ”

⁶ Kaa' pakakito boo ri Paulus ra mokoondo' sampiruo intor ra Majlis Ugama i ulun-ulun ru Saduki am sampiruo i poyo ulun-ulun ru Parisi, indagu io risilo ra mapuor, “Pabukat kau ngaangai'! Aku ti ulun ru Parisi am papag poyo ru ulun ru Parisi. Bisaraan aku ragiti sabap ra mangintopot aku ra ulun matoi bayagon saguli'.”

⁷ Pakaindagu io ayuk raginio, ulun-ulun ru Saduki am ulun-ulun ru Parisi nansasangor boo saboi ulun-ulun ru Majlis i liminili' boo. (

⁸ Sabap ra ulun-ulun ru Saduki ti mangintopot ra ulun matoi kalo bayagon saguli', am poyo ra kolondo' malaikat kapoam ambiluo. Kaa' ulun-ulun ru Parisi mangintopot ra mokoondo' niayuk ra ngaangai' ti.)

⁹ Golok boo ilo boo ra mapuor toojo. Kukula' ngaulun ru Parisi ondo' nasauk ra mangingila' ra Ukum ri Musa timinaam am minansang toojo, konilo, “Kolondo' rondo' pana sala ru ulun ti! Motopot lair ra mokoondo' ambiluo kapoam malaikat minindagu riso!”

¹⁰ Gili boo ra pansasangaran i giminaai toojo, saboi tingganai maayo ru saujor no malaa' ra uupin nilo lair i Paulus. Ginio ra susubo' no i Paulus paingkualon intor ra tatanga' ru ulun-ulun no am ibiton ra kim ru saujor.

¹¹ Iorondom ragili, bigor Tuhan ra sapapa' ri Paulus am indagu, “Kaikango' ayuk guang muno! Nampaintutun kou ra ulun intor Raki' giti ra Jirusalim ti, am musiti' kou mampaintutun poyo koson ragitio giu' ra Roma niayuk.”

Naguguum mamatoi ri Paulus

¹² Nokorondom io ra suabon no, naguguum ulun ru Jaudi. Nagigibot ilo ra kalo mangakan am manginum amon ru kalo poyo mapatoi nilo galing i Paulus.

¹³ Suang ru ulun ondo' naguguum ti mokoondo' nasailan ra apat ngoopor ngaulun.

¹⁴ Ongoi ilo boo tuum ra tingganai imam am poyo tingganai ru ulun ru Jaudi, am indagu, “Akai ngaangai' nagibot kalo mangakan am manginum ra atan ayuk, amon ru kalo mapatoi mai galing i Paulus.

¹⁵ Raino, akau am ulun-ulun ru Majlis Ugama musiti' mangator ra surat ra tingganai maayo ru saujor Roma no koson kitaakon i Paulus ti paumaan ramuyun saguli', ra mangimumui poyo riso koson ragili. Akai am nakatampos noyo mamatoi riso ra io kalo poyo makasaboi ragiti.”

¹⁶ Kaa' mokoondo' sangulun nakaining ra naguguuman nilo raginio, io no akon ri Paulus, anak ru maayo nano ra ruandu'. Ginio ra ongoi io ra kim ru saujor i am pambala' ri Paulus.

¹⁷ Pampiau boo i Paulus ra sangulun tingganai ru saujor am indagu, “Ibito' noyo tuu'-bagu ti muma' ra tingganai maayo mino, sabap ra mokoondo' io pabalaan no riso.”

¹⁸ Paumaa' ru tingganai ru saujor i tuu'-bagu ti ra tingganai maayo nali am indagu, “I Paulus, ulun inaput i, nakiindangan raki' nagibit ra tuu'-bagu ti muma' rirun. Sabap ra mokoondo' io pabalaan no rirun.”

¹⁹ Kitango' ru tingganai maayo ru saujor no tuu'-bagu i, ibito' no ra intok kolondo' ulun am kuati', “Atan kia pabalaan muno raki'?”

²⁰ Taam tuu'-bagu no, “Ulun ru Jaudi naguguum ra makitaak rirun magibit ri Paulus bisaraan giu' ra Majlis Ugama ra susuab, ra masaga' ilo rokoon mangimumui poyo riso.

²¹ Kaa' pai' gagayaa' kitaakon nilono, sabap ra mokoondo' olo'-olo' apat ngoopor ngaulun nansibuni koson magawang riso. Nagigibot ilo no ngaangai' ra kalo mangakan am manginum amon ru kalo poyo mapatoi nilo galing i Paulus. Raino, nakatampos ilo noyo, maginaa ayuk boo ra pangiawan muno.”

²² Indagu tingganai maayo ru saujor no, “Pai' pambala' ra osoi ayuk pana ra ondo' pinabala' muno raki' ra raitii' ni.” Susubo' no boo tuu'-bagu i muli'.

Paumaan i Paulus ra Gabenor Piliks

²³ Piawo' boo ru tingganai maayo no ruo ngaulun tingganai ru saujor am indagu, “Pongoono' min ruo ngaatus ngaulun saujor, tulu' ngoopor saujor manangkuda am poyo ruo ngaatus saujor manantutura'. Ilo ti poongoyon ku ra Kaisaria ra jam kasiam rondom ra raiti' niayuk.

²⁴ Pongoono' min niayuk kukula' ngainan kuda ri Paulus am alungi' am atari' min io ra Gabenor Piliks.”

²⁵ Io pana panulis boo ra surat ra Gabenor Piliks, ondo' suang no:

²⁶ “Kaansayan rirun, Gabenor Piliks ondo' maurumat, intor raki', i Klaudius Lisias!

²⁷ Ulun ragitio rinakop noyo am potoyon raan ru ulun ru Jaudi, kaa' kaala' aku ayuk ra io ti warganegara Roma. Ginio ra aku nabaya' ra saujor kuno namayag riso.

²⁸ Masaga' aku mintutun ra atan sotopot no panguwan nilo riso, ibito' ku io ra Majlis Ugama nilai.

²⁹ Pakatutun aku raiti am kolondo' sala natuum riso, koson makapangukum riso potoyon kapoam aputon, sabap ra panguwan nilai riso am intor ayuk ra ukum ru ugama nilai galama'.

³⁰ Binalaan aku noyo ra mokoondo' paguguuman ru ulun ru Jaudi koson mamatoi riso. Ginio ra parampuso' ku io boo poongoyon rirun. Sinusub ku noyo ulun ondo' manguu' riso ra ibiton ayuk panguwan nilo no rirun.”

³¹ Suguto' boo ru saujor-saujor nanusuban risilo raginio am rondom ragili niayuk ilo nagibit ri Paulus saboi ra Antipatris.

³² Iosuabon, saujor ra bokon am niayuk saujor nanantutura' siminaguli' boo ra kim nilai ra Jirusalim, kaa' saujor nanangkuda ayuk boo namaya' ri Paulus.

³³ Pakasaboi ra Kaisaria, paumaa' nilo i Paulus ra gabenor i am pataako' nilo boo riso surat i.

³⁴ Kopongo gabenor nambasa' ra surat i, kuati' no i Paulus ati kia intor nano. Kaala' io ra i Paulus ti intor ra Kilikia,

³⁵ indagu io, “Imumuyin tokou ra makaratong ayuk ulun ondo' manguu' rirun.” Panusub io ra i Paulus aputon giu' ra istana ondo' gili binaal ru raja' Irodis.