RINALATAN 20 - Tanou Moonsoi Timugon

Minongoi i Paulus ra Makidonia am Akaya

¹ Pakalinos boo bandar Ipisus i, timungo' ri Paulus ulun Kristian am pambilin io koson mampaikang ra pangintapatan nilai. Ugar io boo ongoi ra Makidonia.

² Minongoi io ra ngaangai' libung ru Makidonia am pambilin io ra ulun Kristian ra giu' no koson mampaikang ra pangintapatan nilai. Ongoi io boo ra Akaya

³ am minayan io ra giu' no buoi talu ngambulan. Nakatampos io no mongoi ra Siria, kaa' nakaining io ra ulun ru Jaudi naguguum mamatoi riso. Ginio ra namatas io minugar mansail ra Makidonia.

⁴ Ulun ondo' minaya' riso i am i Sopatir anak ri Pirus intor ra Biria, i Aristarkus am i Sikundus ulun Tisalonika, i Gayus ulun ru Dirbi, i Tikikus am i Tropimus intor ra Akaya am poyo i Timotius.

⁵ Ilo ti siminigulu am naginaa ramon giu' ra Troas.

⁶ Kopongo Pangiantakan ra Ruti' Kalo Linatakan ra Ragi, iruani' mai Pilipi ti maya' ra kapal. Nalimaan buoi raiti, nakapantuum akai boo saguli' risilo giu' ra Troas. Saminggu' buoi mai ra giu' i.

Pamupusan ri Paulus mongoi ra Troas

⁷ Paat ra orou koonom ra iorondom, timinimung akai mangakan mababaya' ra pabukat Kristian no. Nangila' i Paulus ra ulun ra giu' no, sabap ra mugar io no ra suabon. Kalo liminonggo' io saboi tanga' ru rondom.

⁸ Masuang lampung napaangan ra lamin ra rasawat, intok tinimungan maili.

⁹ Mokoondo' niayuk sangulun tuu'-bagu makainggalan ri Iutikus nanturung ra gigimpalan i. Sabap ri Paulus nabuoi toojo minindagu, matikoolong am pokororot boo tuu'-bagu ti am naratu' intor ra tingkat katalu. Paat ra io kayangon, minatoi io noyo.

¹⁰ Ginio ra tuun boo i Paulus. Laubi' am ganggali' no tuu'-bagu ti am indagu io, “Pai' kau pagalabo, naayag io po!”

¹¹ Pagaloi boo saguli' i Paulus am pantayar io ra ruti' am pangakan ilo boo. Minindagu io ra ulun-ulun no saboi natawangan, am ugar io boo.

¹² Tuu'-bagu ondo' naayag i inibit muli' ra baloi no am naansukan ilo boo kaga'.

Intor ra Troas mongoi ra Militus

¹³ Siminakoi akai ra kapal am pagulu ongoi ra Asos, koson manguma' ri Paulus ra giu' i, sabap ra io galama' masaga' maya' ra lantur ayuk.

¹⁴ Pakapantutuum akai giu' ra Asos, sakoi boo i Paulus ra kapal sinakayan maili am ongoi akai boo ra Mitilini.

¹⁵ Suabon ragili, nakasuku' akai ra intok ondo' nantuma' ra pulu' Kios. Iomalaas, nakasaboi akai ra pulu' Samos am songorou poyo nakasuku' akai poyo ra Militus.

¹⁶ Kalo masaga' i Paulus mapit ra Ipisus, maa' raginio kalo mamatir ra masa giu' ra pagun Asia. Masaga' io makasuku' ra Jirusalim ra mataki', ra io kalo poyo orou Pentekosta.

Ragu pintaran ri Paulus ra Ipisus

¹⁷ Intor ra Militus nangator i Paulus ra bilin ra tingganai ru ulun Kristian ra Ipisus ra ilo ti mongoi uma' riso.

¹⁸ Pakasaboi ilo ayuk, indagu i Paulus risilo, “Nakapandai kano ra kaayagan kuno buoi aku nabaya' ramuyun, io no naimpuun ra aku minatong ra Asia ti.

¹⁹ Mabaya' ra guang minggana' am masuang lomou, nangandoi aku koson ra ulipon ru Tuhan. Kabalu' pana naimbolo' aku ra kalaatan ondo' binaal ru ulun ru Jaudi raki'.

²⁰ Nakapandai kano ra pinasalula' ku noyo ngaangai' ondo' mokoonong no ramuyun. Nangila' aku ramuyun ra saang ru ulun masuang am niayuk ra rorondo' baloi.

²¹ Nampakara' aku ra ulun ru Jaudi am niayuk sala' ka Jaudi koson ra tumalikur ilo intor ra tula am sumaguli' ri Aki Kapuuno' am mangintopot ra Tuhan Jisus.

²² Am raino, maya' ra susuban ru Ambiluo ri Aki Kapuuno', mongoi aku ra Jirusalim. Kalo nakapandai aku ra atan kia masauk raki' ra giu' no.

²³ Ondo' ayuk napandayan kuno ra Ambiluo ri Aki Kapuuno' nambala' raki' ra moonong bandar ondo' inapitan kuli, ra pasubolon aku ra pangaputan am niayuk maimbolo' poyo.

²⁴ Kaa' kalo mangkara' aku ra maayag aku kia kapoam kalo; ondo' karaan kuno ayuk am momongo ra kandoi ondo' pinataakan raki' ru Tuhan Jisus, ioginio mampasaboi ra Tanou Moonsoi intor ra asi' ri Aki Kapuuno'.

²⁵ “Minongoi aku noyo ra intok mini am nampasaboi aku no ra tanou intor ra Pamarintaan ri Aki Kapuuno'. Kaa' raino, makapandai aku ra kalo boo makapantuum takau saguli'.

²⁶ Ginio boo ra, balain takamin toojo ra orou raiti'; Amon ru mokoondo' lair intor ramuyun no mapuso ra tauli no, pai' min aku sonsolo'.

²⁷ Kalo igondo' aku nompoloso ra kandoi kutu koson mambala' ramuyun ra ngaangai' kasagaan ri Aki Kapuuno' no ramuyun.

²⁸ Tumoojo kau am alungi' min niayuk ngaangai' ulun Kristian ondo' pinalansan ru Ambiluo ri Aki Kapuuno' no ramuyun. Alungi' min ilo toojo koson ra domba alungin toojo ru magagalung, sabap ra pinasauk ilo ri Aki Kapuuno' ra ulun Nano ralalom pinatayan ru Anak Nali galama'.

²⁹ Napandayan ku noyo ra pakaugar aku, mokoondo' ulun koson ra taani masangit mongoi simpung ramuyun am ulun ondo' inalungan mino gaawon intor ramuyun.

³⁰ Mokoondo' niayuk kukula' ngaulun intor ramuyun no magabau am mampalayau ra ulun Kristian koson maya' boo risilo.

³¹ Ilalai' min! Karaa' min ra buoi talu ngambilor orou rondom aku nangila' ra moonong ramuyun mabaya' ra lomou.

³² Raino, pataakin takamin ri Aki Kapuuno' am ra pambalaan ru asi' Nano ondo' makapagalung ramuyun. Io ti mokoondo' ra kuasa' mampaikang ramuyun am niayuk mangani' poyo ra barakat ondo' pinongo Nano ra ngaangai' ulun ondo' mangintopot Riso.

³³ Kalo poyo igondo' aku pakitaak ra ruit kapoam bayang ru sasangulun.

³⁴ Akau galama' nakapandai noyo ra akanon kutu am niayuk akanon ru rangan-rangan ondo' minaya' raki' ra pangkiralanan ti, intor ra kandoi kuno galama'.

³⁵ Ginio ra nanulu' aku no ramuyun ra amon ru mangandoi takau koson raginio makapangindangan takau ra ulun malawo. Karaa' min ati kulaan bala' ru Tuhan Jisus ra io minindagu, ‘Moonsoi poyo mangani' intor ra makitaak.’ ”

³⁶ Pakapambilin i Paulus, igulatur io boo nabaya' ra ulun-ulun ondo' nangkirongog riso am pakiasi' ilo.

³⁷ Nantatangi' ilo ngaangai' liliwa' giminanggol ilo ri Paulus am indagu ra tumoojo.

³⁸ Mangiluk guang nilo ra i Paulus ti nambala' risilo ra kalo boo makapantuum ilo. Atari' nilo boo io ra kapal.