RINALATAN 17 - Tanou Moonsoi Timugon

Giu' ra bandar Tisalonika

¹ Tungguli' boo ri Paulus am i Silas pangkiralanan nilai nansail ra bandar Ampipolis am Apolonia suku' ra Tisalonika. Giu' i mokoondo' baloi sambayangan ru ulun Jaudi.

² Koson ra kaindalaman no, ongoi i Paulus ra baloi sambayangan ra mangkuot am mangila' io intor ra Buuk Kitab. Saboi intalu ra moonong orou Sabat nambaal io raginio.

³ Intor ra Buuk Kitab i, nampaintutun am nampaintopot io risilo ra Mamamayag ondo' sinusub ri Aki Kapuuno' i, maaru' imboloon am maayag saguli' intor ra kapatayan. “I Jisus i noyo ondo' pabalaan kuti ramuyun, Io no Mamamayag ondo' sinusub i,” kon ri Paulus.

⁴ Mokoondo' kukula' ngaulun intor risilo nangintopot am minaya' ilo boo ri Paulus am i Silas. Koson niayuk ra masuang poyo toojo ulun ru Junani ondo' sumamba ri Aki Kapuuno' am niayuk masuang ruandu' kauligan kaga'.

⁵ Kaa' maruol guang ru ulun-ulun ru Jaudi. Ginio ra panusub ilo kukula' ngaulun malaat ongoi ra ralan koson mampakasalula' ra pagagabuan giu' ra bandar i. Subolo' nilo boo baloi ri Jason, koson maguyum ri Paulus am i Silas sabap ra masaga' ilo magibit risilo ra saang ru ulun masuang.

⁶ Kaa' kalio natuum nilo i Paulus am Silas. Ginio ra ralaato' nilo boo i Jason ti am kukula' poyo ngaulun Kristian koson paumaan ra tingganai ru bandar i. Nompogolok ilo, “Nakimagabu' ngaangai' ulun ti ra ati ayuk angayan nilo! Raino minongoi ilo poyo ra bandar takau ti

⁷ am apuo' boo ilo ri Jason ra baloi nano. Ilo ngaangai' manggal ra ukum ru Kaisar Roma am indagu ilo poyo ra mokoondo' raja' ra bokon makainggalan ri Jisus.”

⁸ Ragu raginio nangkinibit ra ulun masuang am tingganai ra bandar nagalabo boo.

⁹ Tingganai no nakitaak boo ra ruit pangingkual ri Jason am niayuk rangan nano. Kopongo ragili palabuso' ilo boo.

Giu' ra bandar Biria

¹⁰ Rondom ra gili niayuk, ulun Kristian ra giu' i nanusub ri Paulus am i Silas mongoi ra Biria. Pakasuku' ra giu' i, ongoi ilo ra baloi sambayangan.

¹¹ Giu' ra Biria, ulun ru Jaudi moonsoi guang intor ra ulun ru Jaudi giu' ra Tisalonika. Naansayan ilo mangkirongog ra tanou intor ri Jisus. Moonong orou mambasa' ilo ra Buuk Kitab koson magilong ra motopot kia pangilaan ri Paulus ti.

¹² Masuang intor risilo nangintopot ri Jisus. Masuang poyo ruandu' kauligan kaga' am niayuk ungkuyon Junani nangintopot ri Jisus.

¹³ Mokoondo' ulun ru Jaudi giu' ra Tisalonika nakaining ra i Paulus nampasaboi ra bala' intor ri Aki Kapuuno' giu' ra Biria poyo. Ginio ra ongoi ilo ra Biria am panusuk ilo ra ulun ra giu' i kumuliangi-angi.

¹⁴ Ulun Kristian ra giu' no mataki' nangator boo i Paulus mongoi ra nagas ru raat. Kaa' i Silas am i Timotius soroi ra bandar i.

¹⁵ Kaatari' nilo i Paulus saboi ra bandar Atina, saguli' boo ulun-ulun no ra Biria am nagibit ra bilin intor ri Paulus ra pasunuon no i Silas am i Timotius ra mataki'.

Giu' ra bandar Atina

¹⁶ Liliwa' i Paulus naginaa ri Silas am i Timotius ra Atina, mangiluk toojo guang nali nakakito ra bandar no masuang sinungkalalaing ondo' sambaan.

¹⁷ Ginio boo ra, nakimansusunur i Paulus baal raginio giu' ra baloi sambayangan ra ulun ru Jaudi am ulun sala' ka Jaudi pana ondo' sumamba ri Aki Kapuuno'. Giu' ra pasar niayuk moonong orou nakimansunur io ra osoi ayuk mokoondo' ra giu' i.

¹⁸ Mokoondo' mangingila' ra pangilaan ru Ipikuros am Stoikos nakimantaam riso, konilo, “Atan nua' raguon ru naupa' ti?” Kaa' bokon i poyo minindagu, “Mampatanou io po lair intor ra dewa ru ulun bansa' ru bokon.” Rinagu nilo ginio sabap ra nambala' i Paulus ra i Jisus ti naayag saguli' intor ra kapatayan.

¹⁹ Ginio ra ibito' nilo i Paulus ra Majlis bandar inggalanin ra Ariopagus. Konilo, “Masaga' akai mintutun poyo ra pangilaan bagu ondo' tinunung muni.

²⁰ Sabap ra nampasalula' kou ramon ra baal ondo' nampabunduk ra guang mai. Ginio boo ra masaga' akai mintutun ra atan kia arati' no.” (

²¹ Sabap ra kaindalaman ru ngaangai' mamagun ra Atina am ulun bansa' ru bokon ondo' minayan ra giu' i, koson magail ayuk makimansusunur kapoam mangkirongog ra pangilaan nakabagu.)

²² Bigor boo i Paulus ra saang nilai giu' ra pantimungan ru Ariopagus i am indagu, “Ulun Atina kau ngaangai'! Pagilangan kuno ra akau ti sumugut toojo ra ugama.

²³ Paat ra aku minugar-ugar ra bandar min ti am minongoi pagilong ra intok sambayangan mino, mokoondo' tinulisan nauma' ku ra rondo' panimbaluyan ra taak mino, ioginio: ‘Intok sambaan ri Aki Kapuuno' Ondo' Kalo Nauligan’. Kabalu' pana kalo nauligan min ondo' sambaan min ti, kaa' ginio noyo ondo' raino pabalaan kuno ramuyun.

²⁴ I Aki Kapuuno' noyo ondo' namingkal ra tana' ti am suang nano. Io niayuk Tuhan ru limbowon am tana'. Kaa' kalo niayuk mayan Io ra sambayangan ondo' binaal ru ulun.

²⁵ Mokoondo' Io no ngaangai' am kalo pana indanganon ru ulun. Kaa' Io ondo' nangani' ra ngaangai' ulun ra painawo am kaayagan am atan-atan ayuk.

²⁶ Intor ra sangulun ayuk nakapambaal Io ra nansalinut bansa' am pinaayan No ilo ra ati ayuk intok ra tana' ti. Intor ra galing i noyo inaru' No niayuk ra atan ayuk masauk risilo am ati ayanan nilo.

²⁷ Ginio sinauk ri Aki Kapuuno' maa' raginio ulun maguyum Riso, am makatuum lair Riso paat ra ilo maguguyum. Kaa' sotopot no, kalo maalur i Aki Kapuuno' intor ritakau sigagama'.

²⁸ Sabap ra kon ru ulun, ‘Maayag am mugar takau am soroi ra tana' ti sabap ra kuasa' Nano.’ Mogondo' niayuk ra kukula' lulupot mino, konilo, ‘Itakau ti ngaangai' anak Nano.’

²⁹ Sabap ra itakau anak ri Aki Kapuuno', pai' takau noyo pangkara' ra i Aki Kapuuno' no koson ra sinungkalalaing ondo' binaal ayuk intor ra mas, pirok kapoam batu maya' ra kapandayan ru ulun.

³⁰ Kalo boo karaan ri Aki Kapuuno' paat ru ulun kalo nakaulig Riso ra galing i. Kaa' raino nanusub Io ra ngaangai' ulun ru tana' ti tumalikur intor ra tula nilai.

³¹ Sabap ra inaru' No noyo rondo' orou koson mangukum ra ngaangai' ulun ru tana' ti ra matanda'. Ginio saukon No ralalom ru sangulun ondo' inaru' noyo Riso, am gitio noyo tatandu' no ra ngaangai' ulun; Ulun no binayag saguli' ri Aki Kapuuno' intor ra kapatayan.”

³² Paat ra ilo nakaining ri Paulus minindagu ra ulun matoi maayag saguli' intor ra kapatayan, kuriti' io boo ru kukula' ngaulun. Kaa' mokoondo' niayuk minindagu ra, “Masaga' akai mangkirongog poyo raginio.”

³³ Ingkual boo i Paulus.

³⁴ Mokoondo' niayuk kukula' ngaulun intor risilo i nangintopot am minaya' ri Paulus. Ondo' minaya' intor risilo i am i Dionisius, sangulun ru Majlis bandar, am sangulun ruandu' makainggalan ri Damaris am kukula' ngaulun poyo.