RINALATAN 16 - Tanou Moonsoi Timugon

I Timotius minaya' ri Paulus am i Silas

¹ Minongoi i Paulus ra Dirbi am Listra. Giu' ra Listra mokoondo' sangulun Kristian, inggalan nali i Timotius. Ina' nano ulun ru Jaudi, ondo' niayuk sangulun Kristian kaa' ama' nano ulun ru Junani.

² Ngaangai' ulun Kristian ondo' minayan ra Listra am Ikonium nongompor ri Timotius.

³ Masaga' i Paulus magibit riso am sabap raginio, pinasunatan no i Timotius. Binaal no ginio sabap ra ulun ru Jaudi ondo' minayan ra giu' i nakapandai ra ama' ri Timotius ti ulun ru Junani.

⁴ Ati ayuk inangayan nilai, nampasaboi ilo ra aturan ondo' inaru' noyo ru rasul am tingganai giu' ra Jirusalim. Nambala' ilo risilo koson gumagaya' toojo ra susuban raginio.

⁵ Intor ra raginio, pangintapatan ru ulun Kristian pana pinaikang poyo toojo, am orou koorou sumuang ilo poyo.

Giu' ra bandar Troas: Pagilangan ri Paulus

⁶ Tungguli' boo i Paulus am i Silas pangkiralanan nilai mansail ra pagun Prigia am Galatia sabap ra Ambiluo ri Aki Kapuuno' kalo nangiou risilo mampasaboi ra tanou ri Aki Kapuuno' giu' ra Asia.

⁷ Paat ra ilo nakasuku' ra Misia, kuminam ilo mongoi ra Bitinia, kaa' Ambiluo ri Jisus ti noyo nanginga' risilo.

⁸ Ginio ra, pakasail ilo ra Misia am parayus ilo boo ra Troas.

⁹ Rondom ragili, nakakito i Paulus ra pagilangan; mokoondo' sangulun Makidonia minigor ra saang nali am mangkimait, kono, “Sandaup kano ra giti am indangano' akai!”

¹⁰ Pakakito ayuk i Paulus raginii, tampos akai boo mongoi ra Makidonia, sabap ra gitio noyo rondo' pulanu ondo' naalap mai ra i Aki Kapuuno' nanusub ramon mampasaboi ra Tanou Moonsoi no ra ulun-ulun Makidonia.

Giu' ra Pilipi: Nangintopot i Lidia ri Aki Kapuuno'

¹¹ Sandaup akai intor ra Troas mansail ra pulu' Samotraki, am io suabon ragili nakasuku' akai ra bandar Niapolis.

¹² Intor ra giu' i, injul akai boo ra bandar Pilipi, bandar maayo giu' ra libung kasaa' ru pagun Makidonia. Pilipi poyo pinarinta ru Empayar Roma. Minayan akai ra giu' i ra kukula' ngoorou.

¹³ Paat ra orou Sabat, miningkual akai intor ra bandar am minongoi akai ra kiing ru sungoi, sabap ra pangkaraan mai giu' noyo lair sambayangan ru ulun ru Jaudi. Nanturung am nansunur akai ra ruandu'-ruandu' ondo' timinimung ra giu' i.

¹⁴ Sangulun intor risilo i, i Lidia, ondo' mantatalan ra konoon matanggilung. Io no intor ra Tiatira am nangintopot ri Aki Kapuuno'. Ginio ra ukabo' ri Aki Kapuuno' guang nano koson nangapu ra pangilaan ri Paulus.

¹⁵ I Lidia am ilo sasambaloi pana riniu' boo. Kopongo ilo riniu', pangkimait boo i Lidia ramon, kono, “Amon ru mangintopot kau ra aku ti nangapu noyo ri Jisus, ongoi kano ayan ra baloi kuno.” Nangkikimait io ramon saboi akai pana giminagaya' ayuk.

I Paulus inaput ra Pilipi

¹⁶ Igondo' ragili, paat ra akai minongoi ra intok pakiasian, pakatuum akai sangulun ulipon ruandu'. Mokoondo' io ra ambiluo ondo' mapandai magilong ra nasip ru sasangulun. Kandoi no raginio niayuk panginduitan maayo ra nangandayan nali.

¹⁷ Minaya' io ri Paulus am akai am nompogolok io, kono, “Ulun ragitilo noyo ulipon ri Aki Kapuuno' Ondo' Masawat Kaga'! Minatong ilo ragiti mambala' ramuyun ra ati kulaan akau bayagon ri Aki Kapuuno'!”

¹⁸ Ginio binaal no ra kukula' ngoorou buoi, saboi kalo boo tumaan i Paulus. Ginio ra, pangkaili io am indagu ra riwato no, “Ralalom inggalan ri Jisus Kristus, susubon tokou: Ingkual kou intor ra ruandu' no!” Paat ragili niayuk riwato no miningkual.

¹⁹ Pakatutun ayuk nangandayan ru ruandu' ti ra kolondo' boo panginduitan nilai, rokopo' nilo i Paulus am i Silas am ralaato' paumaa' ra tingganai ru bandar giu' ra intok pamisaraan.

²⁰ Paumaa' nilo i Paulus am i Silas ti ra tingganai ru parinta Roma am pambala', konilo, “Ilo ti ulun ru Jaudi am mongoi ilo pampajajou ra bandar ti.

²¹ Mangila' ilo boo ra kaulayan ondo' sotopot no kalo iowon ru ukum takau. Itakau ulun Roma am kalo moonsoi itakau sumugut raginio.”

²² Ulun masuang pana minongoi pampalamba' ri Paulus am i Silas. Susubo' ru tingganai koson mamparilak ra bayang ru ruo ngaulun ti am palapasin nilo poyo.

²³ Kalapos ilo ragili, pasubolo' ilo boo ra lamin pangaputan. Susubo' boo tingganai ru magalung ra pangaputan i ra ilo ti alungin toojo.

²⁴ Sabap ra panusuban raginio, pasubolo' ilo ra ralalom toojo ru lamin pangaputan am pioto' nilo toojo bangkil ra kalayam nilai.

²⁵ Olo'-olo' tanga' ru rondom, i Paulus am i Silas nakiasi' am narimbai mongompor ri Aki Kapuuno'. Ulun bokon ondo' inaput pana nangkirongog risilo.

²⁶ Paat ragili niayuk kalunggun boo tana', saboi ngaangai' pangaputan ti nakaaya' kalunggun. Naukab ngaangai' kulobon i am rantai pinabangkil risilo i naugal.

²⁷ Tingganai ru magalung ra pangaputan i pana sukal am nakakito ra kulobon ru pangaputan i naukab. Pangkaraan nali ra nagiru' noyo ngaangai' ulun inaput. Ginio ra alapo' no boo ilang nali koson mantuwo io kunu'.

²⁸ Kaa' golok boo i Paulus ra mosongou, kono, “Pai' pantuwo! Akai ngaangai' lakat ayuk poyo ragiti!”

²⁹ Pakitaak boo tingganai i ra lampung, pasimbul io ra ralalom ru pangaputan am nonontol io pakakubu ra saang ri Paulus am i Silas.

³⁰ Ibito' no ilo miningkual am indagu io, “Tuan, atan kia maaru' baalon kutu koson bayagon aku?”

³¹ Taam i Paulus am i Silas, “Pangintopot ayuk ra Tuhan Jisus am bayagon kou – akau ngaangai' sambaloi niayuk!”

³² Posoboyo' boo ri Paulus am i Silas bala' ru Tuhan ra tingganai i am ngaangai' ulun ru baloi nali.

³³ Paat ra rondom i niayuk, inibit ilo ru tingganai i mambagu' ra pilat nilai. Paat ragili niayuk ngaangai' ulun ru baloi i riniu'.

³⁴ Io pana nagibit ri Paulus am i Silas ra baloi nali am paakano' no ilo. Ngaangai' ulun ru baloi i naansukan toojo, sabap ra raino nangintopot ilo ri Aki Kapuuno'.

³⁵ Io suabon, susubo' boo ru tingganai karajaan Roma pulis mongoi ra pangaputan i, koson mampalabus ri Paulus am i Silas.

³⁶ Pambala' boo tingganai magalung ra pangaputan no ri Paulus ragu raginii, kono, “Tingganai ru karajaan nanusub noyo ra mampalabus ramuyun. Raino, uli' kano am toojo kau ayuk!”

³⁷ Kaa' indagu boo i Paulus ra tingganai ru pulis i, “Kolondo' pana sala mai, kaa' linapos akai ra saang ru ulun masuang, am pasubolo' akai boo ra pangaputan kabalu' pana akai ti warganegara Roma! Raino paugaron nilo ayuk akai ra kalo mapandayan ru ulun! Sala' ka koson raginio! Ilo galama' musiti' mongoi ra giti pampalabus ramon.”

³⁸ Tingganai ru pulis no pana minongoi pambala' ra tingganai karajaan Roma ra bala' ri Paulus i. Pakatutun ilo ayuk ra i Paulus am i Silas no warganegara Roma, nalaa' ilo boo.

³⁹ Ginio ra ongoi ilo boo pakimaap ri Paulus am i Silas. Labusi' nilo boo karuruo ti intor ra pangaputan i, am kitaako' ra ilo mingkual intor ra bandar ti.

⁴⁰ Iruani' boo ri Paulus am i Silas pangaputan i am ongoi ra baloi ri Lidia. Pakatuum ilo ra ulun Kristian ra giu' i, nampaikang ilo poyo ra pangintapatan nilai. Kopongo ragili ugar ilo boo.