RINALATAN 12 - Tanou Moonsoi Timugon

Pasimpungan ulun Kristian inimbolo' poyo

¹ Paat ragili niayuk raja' Irodis timinalimpuun nangimbolo' ra kukula' ngaulun Kristian.

² Nanusub io ra i Jakubus, maayo ri Juanis, potoyon ra ilang.

³ Ilai' ri Irodis maansayan ulun ru Jaudi ra baal raginio, giminaai poyo laat nati am panusub io koson mamparakop ri Pitrus. (Ginio nasauk paat ra Pangiantakan ra Ruti' Kalo Linatakan ra Ragi.)

⁴ Karakop i Pitrus, pasubolo' io ra lamin pangaputan. Mokoondo' apat ngantayaran saujor sinusub magalung riso am moonong tayar mokoondo' apat ngaulun saujor. Mopongo Pangiantakan ra Paska masaga' i Irodis mamisara' ri Pitrus ra saang ru ulun masuang.

⁵ Ginio noyo ra i Pitrus inaput ra lamin pangaputan; kaa' pasimpungan ulun Kristian nakiasi' toojo ri Aki Kapuuno' koson riso.

Pinalabus i Pitrus intor ra lamin pangaputan

⁶ Iorondom ra kalo poyo pamisaraan ri Pitrus ra saang ru ulun masuang, nombolong io ra tatanga' ra ruo ngaulun saujor am karuruo kalindu' nali binangkil ra rantai. Giu' ra kulobon ru lamin pangaputan mokoondo' niayuk saujor ra bokon magalung ra pangaputan i.

⁷ Paat ragili niayuk, pulusat boo sangulun malaikat ru Tuhan bigor ra giu' i am sinilau lamin i. Bigogo' ru malaikat i limbawo ri Pitrus ti saboi nakarat am indagu riso, “Ribaki', sukal no'!” Paat ragili niayuk nabugal boo rantai ru kalindu' ri Pitrus i.

⁸ Indagu malaikat i, “Pambayang am pangkasut kou.” Ginagaya' niayuk ri Pitrus nanusuban ru malaikat i. Indagu poyo malaikat i, “Kulaupi' poyo ra sukub no am baya' no raki'.”

⁹ Sunu' i Pitrus ra malaikat i miningkual ra pangaputan i. Kaa' kalo napandayan no ra totopot ginio binaal ru malaikat i, sabap ra pangkaraan no koson ra naginupi io ayuk.

¹⁰ Pansail ilo ra intok nagalungan kasaa' ru saujor am niayuk ra karuo i. Tauli pakasuku' ilo boo ra kulobon basi', ingkualan mongoi ra bandar i. Kaukab boo kulobon no am ingkual ilo boo. Nangkiralan ilo ra rondo' ralan boborok am malaikat i nangiruan ri Pitrus.

¹¹ Katutuni' boo ri Pitrus atan ondo' nasauk riso i, indagu io boo, “Raino nakapandai aku ra i Aki Kapuuno' totopot nanusub ra malaikat nano mampalabus raki' intor ra kuasa' ru raja' Irodis am ngaangai' baal ondo' kalansanan ru ulun ru Jaudi masauk raki'.”

¹² Pakatutun ayuk ri Pitrus ra nasauk i, narayus io boo ra baloi ri Maria, ina' ri Juanis Markus. Giu' no masuang ulun timinimung tatanga' makiasi'.

¹³ Pakasuku' ayuk ra giu' titiko' ri Pitrus kulobon i, am mokoondo' sangulun ulipon ruandu' makainggalan ri Rodi minongoi pampalilig ra osoi kia io.

¹⁴ Kauligi' no bolos ri Pitrus, kaa' sabap ra bansuk nali kalo inukaban no kulobon i. Pagiribok io ongoi pambala' ra ulun-ulun no ra mokoondo' i Pitrus giu' ra liwar no.

¹⁵ Kaa' indagu ilo boo riso, “Mantuyang kou!” Kaa' ruruli' ragu ri Rodi ra motopot i Pitrus mokoondo' ra giu' no. Kaa' indagu ilo, “Malaikat nali lair ginio!”

¹⁶ Kaa' lakat ayuk poyo titiko' ri Pitrus kulobon i. Tauli no nangukab ilo ra kulobon am ilai' nilo ra i Pitrus tupo. Nangimuag ilo toojo.

¹⁷ Nangani' i Pitrus risilo ra pulanu koson mongkoror am tunungo' no ati kulaan Tuhan nagibit riso miningkual ra lamin pangaputan. Kono poyo, “Balai' min i Jakubus am ulun Kristian ra bokon ra atan ondo' nasauk raki' ti.” Kopongo ragili, iruani' boo ri Pitrus intok raginio am ongoi ra intok ra bokon.

¹⁸ Io suabon ragili, posongonsol boo saujor-saujor naubong ra atan kia boo nasauk ri Pitrus i?

¹⁹ Nanusub raja' Irodis ra ulun maguyum ri Pitrus, kaa' kalio nauyum nilo. Panusub io boo koson imumuyin toojo saujor-saujor am papatayin boo. Iruani' boo ru raja' Irodis pagun Judia ti am minayan io ra Kaisaria ra kukula' buoi.

Pinatayan ru raja' Irodis

²⁰ Mokoondo' kasisangan ru raja' Irodis ra ulun ru Tirus am Sidon. Ginio ra nababaya' ilo minuma' ra raja' Irodis. Ragui' nilo galing i Blastus, pagawai istana, koson makiindangan risilo. Kopongo ragili ongoi ilo uma' ri Irodis koson makimobonsoi riso, sabap ra pagun nilo makaalap ra akanon intor ra pagun ru raja' Irodis.

²¹ Sangarawan ragili ondo' inaru' no, nambayang i Irodis ti ra bayang ru raja' am panturung ra takhta am nangani' ra pambalaan ra ulun masuang.

²² Ulun masuang ondo' nangkirongog giminolok, konilo, “Gitio bolos ru dewa am sala' ka bolos ru ulun!”

²³ Paat ragili niayuk malaikat ru Tuhan nampalamba' ri Irodis, sabap ra kalo nangurumat io ri Aki Kapuuno'. Ginio ra inan nati inuloron am patoi io boo.

²⁴ Liliwa' raginio tanou intor ri Aki Kapuuno' nakatabual poyo ra ati ayuk intok am masuang ulun nangintopot ri Jisus.

²⁵ Kopongo kandoi ri Barnabas am i Saulus, saguli' ilo intor ra Jirusalim am paayaan nilo poyo i Juanis Markus.