RINALATAN 10 - Tanou Moonsoi Timugon

I Pitrus am i Konilius

¹ Mokoondo' sangulun ungkuyon makainggalan ri Konilius minayan ra Kaisaria. Io ti tingganai ru tayar saujor Roma ondo' sabiton ra “Rejimen ru Itali”.

² Io sangulun ondo' sumugut toojo ri Aki Kapuuno' am masalok ilo sambaloi sumamba ri Aki Kapuuno'. Masuang indangan nano ra ulun ru Jaudi ondo' musikin am niayuk masalok makiasi' io ri Aki Kapuuno'.

³ Paat ra sangarawan, olo'-olo' jam katalu ra mai', ralalom rondo' pagilangan nakakito io tojojo sangulun malaikat ru Tuhan minatong riso am minindagu, “Konilius!”

⁴ Nalaa' i Konilius am nonontong ra malaikat indagu io, “Kua guat, tuan?” Taam malaikat i, “Ngaangai' pakiasian am indangan muno ra ulun musikin i naapu noyo ri Aki Kapuuno' am tumaam io rirun.

⁵ Raino panusub ra kukula' ngaulun mongoi ra Jopi koson mampiau ra ulun ondo' makainggalan ri Simon Pitrus.

⁶ Soroi io ra intok ru sangulun mambaal ra kuliamos intor ra kungkung ru bibiag, ondo' minayan ra kiing ru raat. Io pana i Simon inggalan no.”

⁷ Pakaugar ayuk malaikat ondo' minindagu riso i, piawo' no ruo ngaulun ulipon nali am sangulun saujor ondo' mangampin riso. Io poyo sangulun ondo' sumamba ri Aki Kapuuno'.

⁸ Kapiau no raiti, tunungo' boo ri Konilius risilo atan ondo' nasauk riso i am panusub risilo mongoi ra Jopi.

⁹ Iosuabon, paat ra katalu ngaulun ti lakat ayuk poyo mangkiralan am maar noyo nakasuku' ra Jopi, pagaloi i Pitrus ra rasawat ru baloi i am pakiasi' ra tanga' ru orou.

¹⁰ Naitilan io boo am matiakan io. Liliwa' maginaa ra akanon i, nakito no rondo' pagilangan.

¹¹ Nakito no koson naukab limbowon am sampila' konoon mapila' pinatuun ra tana' ondo' nakatair ra kaapat-apat pisuk nano.

¹² Suang ru konoon i am nansalinut bibiag mayan ra lantur ondo' makaapat kalayam, ondo' mamuntana' am niayuk susuit masigo.

¹³ Mokoondo' poyo bolos naining no ondo' minindagu, “Pitrus, sukal no! Panimbalui am akano'!”

¹⁴ Taam i Pitrus, “Kalo, Tuhan! Kalo igondo' aku pangakan ra ondo' majamol sumugut ra kaulayan ru ugama.”

¹⁵ Kaa' naining poyo bolos i minindagu riso, “Pai' pangkara' raginio malaat amon ru iniou noyo ri Aki Kapuuno'.”

¹⁶ Baal raginio intalu nasauk, konoon am suang nali pana nakayang saguli' ra limbowon.

¹⁷ Mangkakara' i Pitrus ra atan kinua' arati' ru pagilangan ni. Paat ragili niayuk ulun sinusub ri Konilius nakatuum noyo ra baloi inayanan ri Simon am minigor ilo ra kulobon ru timbok.

¹⁸ Nampiau ilo pangkuot, “Giti kia baloi inayanan ru ulun makainggalan ri Simon Pitrus?”

¹⁹ Paat ri Pitrus lakat ayuk poyo maguyum ra arati' ru pagilangan ni, indagu Ambiluo ri Aki Kapuuno' riso, “Pitrus, mokoondo' talu ngaulun maguyum rirun.

²⁰ Tuun ra gana' no am pai' kalaa' maya' risilo, sabap ra aku noyo nanusub risilo matong.”

²¹ I Pitrus pana tuun ra gana' i am indagu ra ulun-ulun no, “Aku no ondo' uyumon min. Atan ongoyon min raiti?”

²² Taam ilo, “Tingganai Konilius nanusub ramon mongoi ragiti. Io ti sangulun moonsoi ondo' sumamba ri Aki Kapuuno' am niayuk ngaangai' ulun ru Jaudi mangurumat riso. Sangulun malaikat ru Tuhan nanusub riso mompoongoi rirun ra baloi nano koson mangkirongog ra atan raguon muno.”

²³ Kimaiti' ilo boo ri Pitrus mombolong ra inayanan nano buoi sorondom. Io suabon, tampos i Pitrus am baya' risilo. Mokoondo' niayuk kukula' ngaulun nangintopot pana intor ra Jopi minaya' riso.

²⁴ Pakasail songorou nakasuku' ilo ra Kaisaria. I Konilius ti naginaa noyo ra giu' i mabaya' ra ulun ondo' piniau no, io no pabukat-pabukat nano am niayuk rangan-rangan nano.

²⁵ Paat ri Pitrus minumpos, i Konilius pana minuma' riso am kubu io ra saang nali.

²⁶ Kaa' pabigoro' io ri Pitrus am indagu, “Sukal no! Aku ti pana am ulun niayuk.”

²⁷ Liliwa' i Pitrus nakimansunur ri Konilius, umpos io ra rondo' lamin am kakito no masuang ulun timinimung ra giu' i.

²⁸ Indagu i Pitrus risilo, “Akau galama' nakapandai ra maya' ra kaulayan ru ugama Jaudi, ulun ru Jaudi kalo makasubol ra baloi ru ulun sala' ka Jaudi kapoam kumubayau risilo. Kaa' i Aki Kapuuno' nampakito noyo raki' ra kalo noyo karaan ku ra ulun bokon malaat kapoam majamol.

²⁹ Ginio sabap ra paat aku pinoongoi, minaya' aku ayuk. Raino, pambala' boo raki', atan guat napaangayan mutu raki' ragiti?”

³⁰ Taam i Konilius, “Talu ngoorou ra nakasail i, olo'-olo' jam katalu ra io mai', nakiasi' aku ri Aki Kapuuno' giti ra baloi ti. Pulusat boo ru sangulun ungkuyon nambayang ra mapulak manguliat ra saang kuli.

³¹ Indagu io, ‘Konilius! Norongog noyo ri Aki Kapuuno' pakiasian muno am nangkara' io ra kataawan ru guang muno.

³² Panusub ra ulun mongoi ra Jopi koson mampiau ra sangulun ungkuyon ondo' makainggalan ri Simon Pitrus. Minayan io ra sangulun ondo' makainggalan ri Simon niayuk; ondo' kandoi nano mambaal ra kuliamos intor ra kungkung maayag am baloi nano ra kiing ru raat.’

³³ Ginio sabap ra nampiau aku rirun ra mataki' am naringkuanang akai ra minatong kou ragiti. Raino tumimung akai ra saang ri Aki Kapuuno' koson mangkirongog ra atan ayuk panusuban nano koson pabalaan muno ramon.”

Pambalaan ri Pitrus

³⁴ Indagu boo i Pitrus, “Bagu aku nakatutun ra nogondo' ayuk ngaangai' ulun ra pagilangan ri Aki Kapuuno'.

³⁵ Intor ra ngaangai' bansa', osoi ayuk pana sumamba ri Aki Kapuuno' am mambaal ra motopot, ulun no apuon ri Aki Kapuuno'.

³⁶ Nakapandai kau noyo ra bala' ondo' pinasaboi ri Aki Kapuuno' ra bansa' ru Israil. Ginio noyo Tanou Moonsoi intor ra pabansayan ralalom inggalan ri Jisus Kristus, Tuhan ru ngaangai' ulun.

³⁷ Nakapandai kau niayuk ra atan ondo' nasauk ra ngaangai' Judia, timinalimpuun intor ra Galilia, kokopongo ayuk i Juanis Mampariu' nampatanou pampariwan nali.

³⁸ Nakapandai kau poyo ra i Aki Kapuuno' nampili' noyo ri Jisus, ulun Nasarit i, am inanian No ra Ambiluo ri Aki Kapuuno' am niayuk kuasa'. Minongoi Io ra ati ayuk intok koson mambaal ra moonsoi am mamabas ra ulun masuang ondo' kinuasa' ru Tingganai ru riwato, sabap ra mabaya' i Aki Kapuuno' ri Jisus.

³⁹ Akai noyo sasi' ra ngaangai' ondo' binaal Nali ra Judia am niayuk ra Jirusalim, am poyo ra ati kulaan sinalip am pinatoi nilo Io.

⁴⁰ Kaa' nopongo kataluan, binayag Io saguli' ri Aki Kapuuno' intor ra kapatayan am minintalang Io ra ulun.

⁴¹ Kalo minintalang Io ra ngaangai' ulun; kaa' ra akai ayuk ondo' pinili' ri Aki Kapuuno' nasauk ra sasi' Nano. Nangakan am nanginum akai gumulung Riso nopongo ra Io binayag saguli' intor ra kapatayan.

⁴² Nanusub Io ramon mampasaboi ra Tanou Moonsoi no ra ngaangai' bansa', am ra Io no ondo' sinusub ri Aki Kapuuno' mangakim ra ngaangai' ulun ondo' lakat ayuk poyo naayag am ondo' minatoi noyo.

⁴³ Io ti noyo ondo' kon ru ngaangai' nabi, osoi ayuk mangintopot Riso, ampunon tula nano ralalom inggalan Nano.”

Ulun sala' ka Jaudi nokoowot ra Ambiluo ri Aki Kapuuno'

⁴⁴ Liliwa' i Pitrus lakat ayuk poyo minindagu, Ambiluo ri Aki Kapuuno' timinuun ra ngaangai' ulun ondo' nangkirongog ra pambalaan i.

⁴⁵ Ulun ru Jaudi ondo' nangintopot ri Jisus, am ondo' minaya' ri Pitrus intor ra Jopi, nangimuag nagilong ri Aki Kapuuno' mangani' ra Ambiluo Nano ra ulun sala' ka Jaudi niayuk.

⁴⁶ Nokorongog ilo ra ngaangai' ulun no minindagu ralalom ra ragu imuagan koson mongompor ra kuasa' ri Aki Kapuuno'. Indagu boo i Pitrus,

⁴⁷ “Ilai', ulun ragitilo nokoowot ra Ambiluo ri Aki Kapuuno' koson niayuk ritakau. Ginio ra kolondo' makapanginga' ra ilo riwon ra timug.”

⁴⁸ Ginio boo ra susubo' ilo ri Pitrus riwon ralalom inggalan ri Jisus Kristus. Kopongo ragili kitaako' nilo i Pitrus tumatang poyo risilo kukula' ngoorou.