RIMBAI PANGAMPARAN 8 - Tanou Moonsoi Timugon

¹ Mapara' piboo bonsoi no amon ru pongkotob tokou, ondo' pinatiti' ru ina' kuno galama', maa' raginio bulintok ra aku makatuum rirun giu' ra tanga' ru ralan, makaalok aku rirun, am kolondo' osoi-osoi pana magasab raki'.

² Ibiton tokou ra baloi ru ina' kuno, am ilaan mu aku makimangkubayau. Aniin tokou ra inumon wain maamis owou am ruu' ru kawa' dalima' kuno.

³ Kalindu' muno ra kait giminuut ra ulu kuno, am kalindu' muno ra pamiris mamuyai raki'.

⁴ Pangatang no ra bantu', alii ra ralaa-ralaa ru Jirusalim, ra kalo ulinjoon min pangkubayawan maino.

Rimbai koonom Ruandu'-ruandu'

⁵ Osoi kia minatong intor ra tana' kaagisan no, siminandig ra ambai nano? Karaton tokou ra saau ru puun ipol, intok naganakan rirun.

Ruandu'

⁶ Sauko' aku ra ambai muno; pai' ganggol ra bokon ondo' ak am aku, sabap ra lumaai no koson ra kinaikang ru kapatayan, am saga' ru guang galama' manguasa' koson ra patayan. Simbula' nano koson ra simbula' ru apui, ondo' bibilak ra makalalaa'.

⁷ Timug ra masuang kalo makalasa' ra pangkubayawan, timug ru liur kalo mokolosor riso. Amon ru sangulun mapataak ra nansalinut rapu' nano koson pambabali ra pangkubayawan, maaru' pagasaban maalap nano.

Pabukat-pabukat ungkuyon ru ruandu'

⁸ Mokoondo' sangulun boborok mai ra ruandu', ondo' lakat poyo boborok titi' nano. Atan kia musiti' mai baalon amon ru buayoi matong mongoi panamung riso?

⁹ Amon ru boborok maino timbok, mambaal akai ra rondo' manara pirok ra rasawat nano. Kaa' amon ru iono kulobon, tiaparin mai io ra umpok ru tataun sidar no.

Ruandu'

¹⁰ Aku ti timbok, am titi' kuno manara nano. Ambai kuno nakapandai ra mabaya' riso, aku makaansuk.

Ungkuyon

¹¹ Raja' Salomo makaumo ru anggur giu' ra Baal-Gamon. Umo nano pinairaan no ra ulun-ulun manangumo; sigagama' mambayar riso ra saribu ruit pirok koson ra ampos nano.

¹² Raja' Salomo mangapu ra saribu ruit pirok, am ulun-ulun manangumo makaalap ruo ngaatus koson ra tayar nilo; kaa' aku galama' makaumo ru anggur!

¹³ Rorongogon ku ayuk bolos muno giu' ra umo, alii ra kalumpusan kuno; rangan-rangan kuno maginaa koson mangkirongog ra bolos muno.

Ruandu'

¹⁴ Ibok no, alii ra ambai kuno, ratong no koson ra sanginan paus, koson ra anak ru tambang rasawat ru gunung intok nantanaman ra apa' pampagamis ra akanon.