RIMBAI PANGAMPARAN 7 - Tanou Moonsoi Timugon

Ungkuyon

¹ Mapara' piboo kinapasau muno, alii ra ralaa! Moonsoi pagilayan ra kalayam muno am ra tarumpak no! Bangkul ru paa muno moonsoi ra ilain koson ra limpor ondo' tinuyu' ru ulun mampalukis.

² Pusor muno koson ra sangkir tapupungol ondo' kalo maawayan ra wain nansasabul. Tinai' muno koson tuntur ru gandum ondo' linibungan ru bunga' bakung.

³ Titi' muno koson ra ruo anak ru tambang, koson ra anak ru paus nongkobon.

⁴ Liog muno koson ra manara gading Mato muno koson ayuk ra kolam-kolam giu' ra bandar Gisybon, mamaar ra kulobon garabang Batrabim. Arung muno koson ra manara Libanon ondo' tumingkuang ra bandar Damsyik.

⁵ Ulu muno koson ra Gunung Karmil. Abuk muno ra sinulampir koson ra konoon satin ondo' malumis kaga'; kinalumis nano makabunduk ra guang ru sangulun raja'.

⁶ Mapasau kou toojo, Mantalur kou toojo, ondo' tagamin toojo ru ilo ngai' kasagain.

⁷ Inan muno moonsoi koson ra puun ru kurma, am titi' muno koson ra pungu ru kawa' nano.

⁸ Matipangkiwa' aku ra puun ru kurma am mangupu' ra kawa' nano. Aku ra guang, titi' muno koson ra pungu kawa' ru anggur, paminawo muno koson ra owou ru ipol,

⁹ am kabang muno koson ra owou ru wain ondo' maamis kaga' owou. Koon poyo raginio, polosoon noyo wain no tumilis ra ambai kuno, ra kalo maputat-putat, tumilis ra bibil am ripon nano.

Ruandu'

¹⁰ Aku longgom ru ambai kuno, malaai io kaga' raki'.

¹¹ Ibok no kalumpusan kuno, ongoi tano ra liwar pagun am mombolong giu' ra pekan.

¹² Kumarat to ra kalo poyo makatampak mato ru orou am magilong ra puun ru anggur nakatuu' noyo kia kapoam busak nano nakaungkalar noyo kia, kapoam puun dalima' nambusak noyo kia. Ra giu' no pataakon ku togom kuno rirun.

¹³ Puun ru dudaim maamis owou, am masuang kawa' ra mangaamis mamaar ra kulobon tano, ondo' nabuoi noyo inupu' am niayuk nakabagu; binulian ku rirun, alii ra ambai kuno.