RIMBAI PANGAMPARAN 6 - Tanou Moonsoi Timugon

Ruandu'-Ruandu'

¹ Alii ra ruandu' ra mantalur kaga', ati kia inongoi ru ambai muli? Pambala' no ati inongoi nali, maa' raginio maindangan mai okou maguyum riso.

Ruandu'

² Ambai kuno minongoi ra umo nano, umo nano ra apa' pampagamis ra akanon koson magalung ra tambiag nano giu' ra umo, liliwa' mangkatu' ra bunga' bakung.

³ Ambai kuno aku tatangan, am aku pana io tatangan; Tatanga' io magalung ra tambiag nano magiantanga' ra bunga' bakung.

Rimbai kalimo Ungkuyon

⁴ Okou kalumpusan kuno, kinantalur muno koson ra bandar Jirusalim, koson ra kinaantak ru bandar Tirja. Makabunduk kou kaga' ra guang koson ra bandar-bandar ra maayo no.

⁵ Papisiko' noyo bulos muno intor raki', sabap ra gigilong muno makaubong raki'. Abuk muno koson ra sampanon ru kambing ondo' mambusul ra kabuluran ru Giliad.

⁶ Ripon muno mapulak koson ra sampanon ru domba ondo' kakariu'; sikaruo koson ra anak domba nongkobon, kolondo' rondo' pana natatak.

⁷ Pingas muno koson ra lapak ru kawa' dalima', nasibuni ru rundung muno.

⁸ Kabalu' pana mokoondo' onom ngoopor andu' ru raja', am balu' ngoopor ngaulun ruandu' parulug, am ralaa ra kalo mauntob,

⁹ kaa' sangulun ayuk tagamin ku, am mapasau io koson ra susuit asang; anak langkuir kalumpusan ru ina' nano. Ngaangai' ralaa magilong am mongompor riso, andu' ru raja' am ruandu' parulug makasioro' riso.

¹⁰ Osoi kia minatong no koson ra mato ru orou sumirang? Kinoonsoi nano koson ra bulan salawang, matawang koson ra sinda ru mato ru orou.

¹¹ Matong aku ra umo ru badam magilong ra samul ru tatanom ra limayak, tawa puun ru anggur manalantar noyo kinua', am puun ru dalima' mambusak noyo kinua'.

¹² Moondom aku kaga' ra laai muno, koson ra aku moondom sumakoi ra kurita' kuda mababaya' ra ngaangai' ulun paawang ru bansa'.

Ruandu'-Ruandu'

¹³ Ligo' no, ligo' no alii ra ralaa ru Sulam. Polosoo' akai magilong rirun lumigo'. Kua kasaga' kau magilong raki' lumigo' giu' ra tatanga' ru tinimungan ru ulun magilong?