RIMBAI PANGAMPARAN 4 - Tanou Moonsoi Timugon

Ungkuyon

¹ Mapara' piboo kinantalur muno, alii ra kalumpusan kuno, mantalur kou kaga'! Mato muno nasibuni ru rundung koson ayuk ra mato ru susuit asang. Abuk muno koson ra sampanon ru kambing ondo' mambusul ra kabuluran ru Giliad.

² Ripon muno mapulak koson ra sampanon ru domba ondo' bagu ayuk poyo kinauran am riniu', sikaruo koson ra anak domba nongkobon, kolondo' rondo' pana natatak.

³ Bibil muno koson ra ribin malia', am kabang muno mapasau. Pingas muno koson ra lapak ru kawa' dalima' nasibuni ra rundung muno.

⁴ Liog muno koson ra manara ri Daut, ondo' binaal nangkukulaup, sisigot muno koson ra saribu gagampin ru ulun tutumula' baani.

⁵ Titi' muno koson ra ruo anak ru tambang koson ra paus nongkobon ondo' mongkotop ra sakot mangkilolot ra bunga' bakung.

⁶ Mongoi aku ra gunung mur am giu' ra bulur kaminyan, saboi angin ra susuab ti sumiob am kalandaman ra rondom matatak.

⁷ Mapara' piboo kinantalur muno, alii ra kalumpusan kuno, kolondo' pipilat muno.

⁸ Ratong no raki', okou uoton kuno, tuun no intor ra Libanon; ratong noyo raki' intor ra kagunungan Libanon. Pambusul no intor ra tampak ru Amana, intor ra tampak ru Sinir am Girmon, intokon ru singa' am ampunguon mumbir.

⁹ Okou ambai am uoton kuno, Mato am sisigot muno nakabunduk ra guang kuno.

¹⁰ Laai muno mapabansuk raki', alii ra ambai am uoton kuno. Laai muno moonsoi poyo ka wain, umau maamis owou muno maamis poyo ka ngaangai' apa' pampagamis ra akanon.

¹¹ Bibil muno maamis poyo ka ruu' ru maningot, alii ra uoton kuno. Rila' muno koson ra gatas am ruu' ru maningot raki'. Bayang muno nogondo' ra kinaamis ru owou ru kagunungan Libanon.

¹² Ambai am uoton kuno koson ra taman makatimbok, taman ondo' makatimbok, taur ru timug kuno galama'.

¹³ Giu' no masuang timinuu' ra puun dalima' mababaya' ra kinawa' ondo' mangaamis; bunga' solonggo am narwastu,

¹⁴ kunyit, tabu, kaningau, am nansalinut kaminyan; mur am gaharu am nansalinut apa' pampagamis ra akanon napili'.

¹⁵ Taman no tinimugan intor ra taur ru timug ondo' mingkual timug malaga', ondo' tumilis intor ra Kagunungan Libanon.

Ruandu'

¹⁶ Luat no, alii ra angin ralayo. Siob no ra pagitatanaman kuno, alii ra angin rabugus; polosoo' noyo maamis owou muno iul-iul giu' ra limbowon. Gama' ru ambai kuno matong ra pagitatanaman kuno am mangakan ra kawa'-kawa' mangaamis.