RIMBAI PANGAMPARAN 2 - Tanou Moonsoi Timugon

¹ Aku bunga' mawar giu' ra Saron, bunga' bakung giu' ra tilung ru gunung.

Ungkuyon

² Koson ra bunga' bakung mangkilolot ra bulungkut makaruui, koon raginio noyo kalumpusan kuno ra gino ngai' ralaa.

Ruandu'

³ Koson ra puun ru ipol ondo' nakapangkilolot timinuu' giu' ra kataunan, koon raginio noyo kalumpusan kuno ra gino ngai' ungkuyon. Masaga' aku sumindung ra saau nano, kawa' nano maamis ra akanon.

⁴ Ibiton no aku giu' ra baloi pangiantakan, gigilong nano raki' napanu' ra laai.

⁵ Ikango' aku ra kismis, paligago' aku ra ipol, sabap tutuyangon ku lumaai riso.

⁶ Kalindu' ra kait nano pinasungka' no ra ulu kuno, kalindu' ra pamiris nano mamuyai raki'.

⁷ Pangatang no ra bantu', alii ra ralaa-ralaa ru Jirusalim, ralalom inggalan ru tambang am paus giu' ra padang, ra kalo mangiis kau ra pangkubayawan maino.

Rimbai karuo Ruandu'

⁸ Maining ku bolos ru ambai kuno. Nasimbul io mongoi raki' mansail ra bulur am gunung.

⁹ Ambai kuno koson ra paus; io koson ra anak ru tambang. Minigor io ra sapapa' ru timbok, mato nano mongoror, am mansigo intor ra luang-luang ru pagimpalan.

¹⁰ Ambai kuno mindagu raki'. Ibok no, alii ra kalumpusan kuno, ibok no, alii ra malinus kuno, ibok no.

Ungkuyon

¹¹ Bulintok masimu' nakasail noyo; rasam pana nakatinas noyo.

¹² Bunga' giu' ra limayak minungkalar noyo. Gitio noyo bulintok ra marimbai; bolos ru maningkuluuk maining giu' ra limayak.

¹³ Kawa' ru nunuk tumalimpuun maansak; puun ru anggur manambusak am maamis owou nano. Ibok no, alii ra kalumpusan kuno, ibok no, alii ra malinus kuno, ibok no.

¹⁴ Koson kou ra susuit asang ondo' mansibuni ra kabatuan. Polosoo' aku no magilong ra bulos muno ra mantalur, polosoo' aku no mangkirongog ra bolos muno ondo' matangil.

¹⁵ Rokopo' noyo rubah-rubah ondo' boborok no, rubah-rubah ondo' manginjang ra umo ru anggur, sabap ra puun ru anggur takano mambubusak.

Ruandu'

¹⁶ Kubayau kuno aku tatangan, am aku io tatangan. Magalung io ra domba nano magiantanga' ra bunga' bakung

¹⁷ saboi angin ru susuab ti sumiob am kalandaman pana matatak. Saguli' no, alii ra kalumpusan kuno, koson ra paus, koson ra anak ru tambang giu' ra kagunungan Bitir.