PINAINTALANG 8 - Tanou Moonsoi Timugon

Segel katulu'

¹ Paat ra Anak Domba no namalungkab ra segel katulu' no, masiluk boo suruga' no buoi nalintanga' jam.

² Kakito ku boo katulu'-tulu' malaikat ondo' minigor ra saang ri Aki Kapuuno' no am inanian ilo sigagama' ra bujung.

³ Kopongo ragili ratong malaikat ra bokon ondo' nagibit ra pambulian ra kaminyan ondo' binaal intor ra mas, am bigor io ra saang ru panalaban no. Inanian io ra kaminyan masuang koson polotokon ra pakiasian ru ulun ri Aki Kapuuno' no. Solobon no boo ginio ra panalaban ra kaminyan ondo' binaal intor ra mas ondo' soroi ra saang ru takhta no.

⁴ Lisun ru kaminyan ondo' ginuut ru malaikat no maloi mabaya' ra pakiasian ru ulun-ulun ra saang ri Aki Kapuuno'.

⁵ Kopongo raginio alapo' boo ru malaikat no pambulian ra kaminyan no; suangi' no ra baa ru apui ondo' inalap intor ra panalaban no am papatiro' no ra tana' ti. Am mokoondo' boo bolos ru timpalak, nabaya' ra ganit am tana' ti mogonggon.

Baal ru tulu' bujung no

⁶ Tulu' malaikat no pana ondo' nampaguut ra tulu' bujung no nakatampos noyo manamput ra bujung.

⁷ Malaikat kasaa' no nanamput ra bujung nano. Ratu' boo ais batu am apui nararatok ra raraa' ra tana' ti, koson ra rasam maawas. Sampitalu ru tana' ti, tataun am ngaangai' makaraun masansam nongosolob.

⁸ Malaikat karuo no nanamput ra bujung nano. Mokoondo' boo koson ra gunung maayo siminimbula' pinapatir ra raat. Sampitalu ru raat no masauk ra raraa'.

⁹ Sampitalu ru ngaangai' maayag ralalom raat no minatoi am sampitalu ru kapal-kapal naluus.

¹⁰ Malaikat katalu no nanarumpit. Rondo' boo butitin maayo ondo' nanimbula' koson ra titiu, riminatu' intor ra limbowon ra sampitalu ru sungoi am taur.

¹¹ (Inggalan ru butitin no “Mapait”.) Sampitalu ru timug no siminimpait am masuang ulun minatoi sabap ra nanginum ra timug mapait raginio.

¹² Malaikat kaapat no boo nanamput ra bujung. Sampitalu ru mato ru orou no, bulan no am butitin-butitin no nangakulau boo. Ioginio saboi sampitalu ru sinda nilai mairu' am sampitalu ru orou am rondom kolondo' sinda.

¹³ Kakito am korongog ku boo sanginan kanui nansiab ra masawat, kono, “Aibui boo ngaangai' ulun ru tana' ti paat ra morongog nilo bolos ru bujung ondo' samputin ru talu malaikat ra bokon ra maagu no.”