PINAINTALANG 7 - Tanou Moonsoi Timugon

Maatus apat ngoopor am apat ngaribu ngaulun intor ra bansa' ru Israil

¹ Kopongo raginio, kakito ku apat malaikat minigor ra kaapat pisuk ra tana' ti. Ginuut nilo kaapat angin no koson kalo boo mansiob ra lantur, raat kapoam ra puun tataun.

² Kakito ku boo malaikat ra bokon poyo siminalula' intor ra sirangon nagibit ra saap ri Aki Kapuuno' ondo' maayag. Nampiau malaikat no ra bolos mosongou ra kaapat malaikat ondo' inanian ri Aki Kapuuno' ra kuasa' mampalunsai ra lantur am raat ti.

³ Indagu malaikat no, “Pai' poyo lunsayo' lantur, raat kapoam puun-puun tataun saboi tinatanduan takau noyo rabas ru ulipon-ulipon ri Aki Kapuuno'.”

⁴ Binalaan aku ra suang ru ulun ondo' tinatanduan ra tatandu' ri Aki Kapuuno' ra rabas nilono, mokoondo' 144,000 ngaulun. Ioginio intor ra ngaangai' tayar ru bansa' ru ulun Israil.

^5-8 12,000 ngaulun intor ra moonong tayar ru bansa' ru ulun ru Israil, ioginio; Jiuda, Rubin, Gad, Asir, Naptali, Manasi, Simion, Liwi, Isakar, Jibulon, Jusup am Binjamin.

Tinimungan ru ulun ra kalo mauntob

⁹ Kopongo raginio, kakito ku poyo rondo' tinimungan ru ulun masuang ondo' kalo maalap ra untob ru osoi ayuk pana! Ilo ti intor ra ngaangai' bansa', papag, pagun am ragu. Am minigor ilo ra saang ru Io ondo' nanturung ra takhta am ra Anak Domba no. Nambayang ilo ra sukub ra mapulak am nampaguut ra raun palma.

¹⁰ Giminolok ilo ra mapuor, “Pamayagan takau intor Rirun Aki Kapuuno' ondo' manturung ra takhta, am intor Rirun Anak Domba no!”

¹¹ Ngaangai' ru malaikat no minigor liput ra takhta no, tingganai-tingganai no am apat ilo ondo' maayag no. Ilo ti liminaub ra saang ru Io ondo' nanturung ra takhta am siminamba ri Aki Kapuuno',

¹² konilo, “Amin! Koompor noyo kapintaran, paringkuanangan, urumat, kuasa' am ikang Muno, i Aki Kapuuno' takau ra sabuoi-buoi no! Amin!”

¹³ Sangulun intor ra tingganai-tingganai no nangkuot raki', “Osoi kia ulun-ulun ondo' nambayang ra sukub mapulak no, am ati intor nilono?”

¹⁴ Taam ku riso, “Tuan, kalo nakapandai aku. Okou no nakapandai.” Indagu io raki', “Ilo ti noyo ondo' nakalabus intor ra kaimbalaan makalalaa' i. Pinupuan nilo noyo sukub nilono saboi mapulak sabap ra raraa' ru Anak Domba pinasasar risilo.

¹⁵ Ginio sabap ra ilo ti migor ra saang ru takhta ri Aki Kapuuno' no, am mangandoi Riso ra orou-rondom ralalom Baloi Nano. Io ondo' nanturung ra takhta no sumambaya' am mangampin risilo.

¹⁶ Am kalo boo maitilan kapoam pinaason ilo; am kalo boo malinsu ilo ru mato ru orou kapoam lasu'.

¹⁷ Sabap ra Anak Domba ondo' soroi ra tatanga' ru takhta no magalung risilo am maningganai risilo mongoi ra taur ru timug ondo' mampakaayag. Am i Aki Kapuuno' mamiir ra lomou ru tangi' intor ra mato nilai no.”