PINAINTALANG 6 - Tanou Moonsoi Timugon

Anak Domba mamalungkab ra segel-segel

¹ Kakito ku boo Anak Domba no namalungkab ra segel kasaa' intor ra tulu' segel no. Korongog ku boo sangulun intor ra kaapat ilo ondo' maayag no, ondo' bolos nano koson ra timpalak, minindagu, “Ibok!”

² Ilai' ku boo sanginan kuda mapulak am ondo' siminakoi no nampaguut ra panah am io ti inanian ra rondo' karaun. Minugar io koson ra sangulun ondo' nangala noyo ra pantula' nano.

³ “Lungkabo' boo ru Anak Domba no segel karuo am korongog ku baal maayag ra karuo no minindagu, “Ibok!”

⁴ Ingkual boo sanginan kuda malia' poyo am ondo' siminakoi no inanian ra kuasa' mambaal ra pangayawan ra tana' ti. Inanian io ra ilang maayo am baalon no ulun ru tana' ti mampapatoi ra rondo' am bokon.

⁵ Lungkabo' boo ru Anak Domba no segel katalu am korongog ku baal maayag ra katalu no minindagu, “Ibok!” Kakito ku sanginan kuda maitom am ondo' siminakoi no nampaguut ra timbangan.

⁶ Korongog ku koson ra bolos ru ulun miningkual intor ra tatanga' ru kaapat ilo ondo' maayag no, kono, “Kumboo' noyo gandum nilo, suku' sakilo gandum kapoam talu ngakilo gandum barli talanon ra gaji' ru kandoi songorou – mologo kaga'. Kaa' pai' noyo jamari' umau jaitun am wain no!”

⁷ Lungkabo' boo ru Anak Domba no segel kaapat am korongog ku ilo ondo' maayag kaapat no minindagu, “Ibok!”

⁸ Kakito ku sanginan kuda ondo' mabula' am ondo' siminakoi no ininggalanan ra ‘Patayan ’ am minitut riso no Nabalu, ioginio intok ru ulun-ulun namagatoi. Inanian ilo ra kuasa' koson mampatoi ra sampiapat ulun ru tana' ti ra pangayawan, bitilan, tiranga' am saamon ru bibiag masigo.

⁹ Lungkabo' boo ru Anak Domba no segel kalimo am kakito ku mamaar ra altar no mokoondo' ambiluo ru ulun pinatoi. Ilo ti pinatoi sabap ra nampatanou ra bala' ri Aki Kapuuno' am sabap ra kaintutunan nilono.

¹⁰ Giminolok ilo ra mapuor, “O Tuhan Maayo Kaga' Kuasa', mapasau am motopot! Kula' poyo buoi no bagu akimin Mu ulun ru tana' ti am mangukum risilo sabap ra namatoi ramon?”

¹¹ Moonong risilo ti inanian ra sukub ra mapulak. Sinusub ilo boo tumangus ra kula' buoi poyo saboi suang ru rangan mangngandoi am pabukat nilono ondo' potoyon koson risilo no, ukopon galing.

¹² Kakito ku boo Anak Domba no nampalungkab ra segel koonom no. Ginio ra mogonggon boo tana' ti ra makalalaa' am mato ru orou liminitom koson ra konoon maitom am bulan liminia' koson ra raraa'.

¹³ Butitin ru limbowon no liminapar ra tana' ti koson ra kinawa' ru ara kalo poyo maansak laparon ru bagiu' mapuor.

¹⁴ Limbowon no riminulun koson ra naskhah rinulun am ngaangai' bujuk am pulu' uyogon intor ra intok nilono.

¹⁵ Ngaangai' boo ru ulun, raja' ru tana' ti, pamarinta, tingganai ru saujor, ulun langkaya' am ulun makakuasa', ulipon kapoam ulun kalo inulipon, mansibuni ilo ti ra luang batu am ra sisipan ru batu giu' ra gunung.

¹⁶ Konilo ra gunung am batu, “Intupi' akai no. Sibunio' akai no intor ra pagilangan ru Io ondo' nanturung ra takhta no, am intor ra ukuman ru Anak Domba no!

¹⁷ Orou ilo mangukum no tumalimpuun noyo am osoi kia tumaan no?”