PINAINTALANG 5 - Tanou Moonsoi Timugon

Naskhah rinulun am Anak Domba

¹ Kakito ku rondo' naskhah rinulun soroi ra kalindu' pamiris ru Io ondo' nanturung ra takhta no. Sapapa' mansapapa' no natitip ra tinulisan. Naskhah no ginaam ra tulu' segel.

² Kakito ku boo sangulun malaikat maikang ondo' napabala' ra mosongou, kono, “Osoi kia iowon mampalungkab ra segel ti am niayuk mamingkal ra naskhah rinulun ti?”

³ Kaa' kolondo' sangulun pana ra suruga' kapoam giu' ra tana', kapoam giu' ra intok ru ulun namagatoi, ondo' makapamingkal ra naskhah rinulun no am mailayan suang nano.

⁴ Aku pana pantangi' ra guang mangiluk, sabap ra kolondo' sangulun pana iowon mamingkal ra naskhah rinulun no am mailayan suang nano.

⁵ Indagu boo sangulun intor ra tingganai no raki', “Pai' pantangi'! Ilai' noyo! Singa' intor ra bansa' ru Jiuda, papag maayo ru raja' Daut no, nangala io noyo ra kuasa' ru kalaatan. Mamalungkab Io ra tulu' segel am mamingkal ra naskhah rinulun no.”

⁶ Kakito ku boo sanginan Anak Domba minigor ra tatanga' ru takhta no ondo' liniputan ru apat ilo ondo' maayag am ngaangai' ru tingganai no. Makito ku io ti koson pinatoi. Mokoondo' Io tulu' sangau am tulu' mato, ioginio tulu' Ambiluo ri Aki Kapuuno' ondo' sinusub mongoi ra tikop-tikop ru tana' ti.

⁷ Ongoyo' alapo' ru Anak Domba naskhah rinulun no intor ra kalindu' pamiris ru Io ondo' nanturung ra takhta no.

⁸ Paat raginio niayuk apat ilo ondo' maayag no am ruo ngoopor am apat ngaulun tingganai no igulatur ra saang ru Anak Domba no. Moonong tingganai no nampaguut ra rondo' jitor am rondo' sangkir mas ondo' makasuang ra kaminyan, ioginio pakiasian ru ulun ri Aki Kapuuno'.

⁹ Narimbai ilo ra rimbai bagu: “Okou no maaya' mangalap ra naskhah rinulun no am mampalungkab ra segel no, sabap ra pinatoi Kou noyo ra pinatayan Muno namayag Kou ra ulun intor ra moonong papag, ragu, bansa' am pagun, koson ilo ti pataakon ri Aki Kapuuno'.

¹⁰ Nampasauk Kou risilo koson ra imam ondo' mabaya' Rirun mangandoi ri Aki Kapuuno', am mamarinta ilo ra tana' ti.”

¹¹ Kakito ku poyo, am korongog ku bolos ru malaikat, ondo' riribu am jujuta' suang no. Liminiput ilo bigor ra takhta no nabaya' ra kaapat ilo ondo' maayag am tingganai-tingganai no.

¹² Narimbai ilo ra bolos mosongou: “Anak Domba ondo' pinatoi ragili maaya' noyo mangapu ra kuasa', kalangkayaan, kapintaran, ikang, urumat am ompor!”

¹³ Morongog ku boo moonong ilo ondo' maayag ru suruga' no, tana' no, intok ru ulun namagatoi am ralalom ru raat no – ilo ngaangai' marimbai: “Koompor am kaurumat noyo, kuasa' am ikang ra mantilayun, ra Io ondo' manturung ra takhta am ra Anak Domba no!”

¹⁴ Kaapat-apat ilo ondo' maayag no timinaam, “Amin!” Tingganai-tingganai no igulatur am niayuk siminamba.