PINAINTALANG 4 - Tanou Moonsoi Timugon

Ilo ondo' minayan ra suruga' sumamba ri Aki Kapuuno'

¹ Kopongo raginio, pakitono' aku poyo. Ilai' ku naukab rondo' kulobon giu' ra suruga' no. Am naining ku bolos koson ra bujung, ondo' minindagu raki' ra talimpuun i, kono, “Pagaloi. Tuluin tokou atan ondo' inaru' masauk malupus ragitio.”

² Aku pana kuasaa' boo ru Ambiluo ri Aki Kapuuno'. Giu' ra suruga' no mokoondo' takhta, am mokoondo' sangulun nanturung no.

³ Bulos Nano makabinusasal koson ra batu baiduri masasansam am koson ra batu dalima'. Am takhta no liniputan ru rondo' bulintung makabatik-batik masansam koson ra batu jamrud.

⁴ Am ralalom liniputan no mokoondo' poyo ruo ngoopor am apat takhta ra bokon no. Giu' no nanturung ruo ngoopor am apat tingganai nambayang ra mapulak am nangkaraun ra mas.

⁵ Intor ra takhta no makabinusasal ru ganit am mokobolos ra tingkalur am timpalak mapuor. Am giu' ra saang no mokoondo' tulu' titiu simininda. Ginio noyo tulu' Ambiluo ri Aki Kapuuno' no.

⁶ Am giu' ra saang ru takhta no, makito koson ra raat asilan, maniol koson ra kristal. Giu' ra takhta ra tatanga' no, mokoondo' apat ilo ondo' maayag. Ilo ondo' maayag no natitip ra mato tampilon ra saang am bakulung nilono.

⁷ Ilo ondo' maayag ra kasaa' no makabulos ru singa'. Karuo no makabulos ru sapi' gawayan. Katalu no makabulos ru ulun. Kaapat no makabulos ru kanui ondo' tatanga' mansiab.

⁸ Moonong ru apat ilo ondo' maayag no mokoondo' onom kawo nilo sigagama', ondo' ralimbou am ralalom pana natitip ra mato. Orou-rondom kalo lumonggo' ilo marimbai: “Mapasau, mapasau, mapasau noyo Tuhan, i Aki Kapuuno' Maayo Kaga' Kuasa', ondo' galing i soroi, raino am pupus no pana soroi.”

⁹ Kaapat-apat ilo ondo' maayag ti marimbai ra mangurumat, mongompor am maringkuanang Riso ondo' manturung ra takhta no am ondo' maayag ra mantilayun. Am paat kaapat-apat nilo marimbai,

¹⁰ karuo ngoopor am apat ngaulun tingganai no lumaub ra saang ru Io ondo' nanturung ra takhta no am niayuk sumamba Riso ondo' maayag ra mantilayun. Papatiro' nilo boo karaun mas nilono ra saang ru takhta no am indagu,

¹¹ “Iou Aki Kapuuno' am Tuhan mai. Okou maaya' makaapu ra urumat am ompor am kuasa'. Sabap ra Okou noyo nambaal ra ngaangai' no, am maya' ra kasagaan Muno niayuk ngaangai' no nasauk am naayag.”