PINAINTALANG 21 - Tanou Moonsoi Timugon

Limbowon am tana' bagu

¹ Kakito ku boo limbowon am tana' bagu. Limbowon am tana' kasaa' naliom noyo am raat no kalio boo.

² Kakito ku niayuk Bandar Matulai no, ioginio bandar Jirusalim bagu, tumuun intor ra suruga' intor ri Aki Kapuuno'. Bandar no pinatampos noyo koson ra ruandu' uoton nakatampos noyo mongoi uma' ra ralaki nano.

³ Korongog ku bolos mosongou intor ra takhta no, kono, “Raino i Aki Kapuuno' masimpung ra ulun. Mayan Io mabaya' risilo am masauk ilo ra ulun Nano. I Aki Kapuuno' galama' sumimpung risilo am masauk ri Aki Kapuuno' nilo.

⁴ Mampiir Io ra ngaangai' lomou intor ra mato nilono. Kolondo' boo kapatayan, guang mangiluk, pantangian kapoam karualan pana. Ngaangai' baal ondo' nakalair naliom noyo.”

⁵ Indagu boo Io ondo' manturung ra takhta no, “Raino baalon Ku ngaangai' no ra baguon.” Indagu Io niayuk raki', “Tulisi' noyo gitio, sabap ra ragu Kuti motopot am malansanan.”

⁶ Indagu Io, “Nopongo noyo. Aku noyo talimpuun am pupus; Aku noyo kasaa' am pangayaan. Osoi ayuk pinaason, aniin Ku io ra inumon ra kalo kilagain intor ra taur ru timug mampakaayag.

⁷ Osoi ayuk mangala ra kalaatan gitio saukon Ku riso: Masauk Aku ri Aki Kapuuno' nano am masauk io ra anak Kuno.

⁸ Kaa' ulun matalou, ulun kalo boo mangintopot, ulun homoseks am lesbian ra makauyuyu' am majamol, mamamatoi, mansasawa', ulun makakapandayan malaat, sumamba ra sinungkalalaing am ngaangai' magagabau – ampos nilono giu' ra tasik ru apui ondo' naratok ra balirang mapaang, ioginio kapatayan ra kainduo.”

Bandar Jirusalim bagu

⁹ Rondo' intor ra katulu' malaikat no ondo' nampaguut ra tulu' sangkir makasuang ra tulu' kapaganan malaat ra pupus no, ratong raki' am indagu, “Ibok. Tuluin tokou ra ruandu' uoton no, ioginio andu' ru Anak Domba.”

¹⁰ Ambiluo ri Aki Kapuuno' nanguasa' raki' am inibit aku ru malaikat no tumampak ra rondo' gunung masawat kaga'. Nanulu' io raki' ra bandar Jirusalim, Bandar Matulai no. Bandar no tumuun intor ra suruga', intor ri Aki Kapuuno'.

¹¹ Ra katulayan ri Aki Kapuuno' soroi ra giu', bandar no nanguliat koson ra batu parmata, koson batu baiduri masasansam, am maniol koson ra kristal.

¹² Bandar no liniputan ru timbok ondo' maayo am masawat. Kulobon garabang no mopor am ruo am moonong rondo' tinamungan ru rondo' malaikat. Rasawat ru moonong kulobon garabang no tinulisan inggalan ru rondo' intor ra mopor am ruo bansa' ru Israil.

¹³ Timbok ru bandar no makaapat pisuk. Moonong tampilon mokoondo' talu kulobon garabang; talu ra sirangon, talu ra kalasaan, talu ra ralayo am talu ra rabugus.

¹⁴ Timbok ru bandar no pinaturung ra mopor am ruo batu maayo ondo' tinulisan ra inggalan ru mopor am ruo rasul ru Anak Domba no.

¹⁵ Malaikat ondo' minindagu raki' no nampaguut ra tutuku' binaal intor ra mas. Manuku' io ra bandar no, kulobon garabang am timbok no.

¹⁶ Baal ru bandar no makaapat pisuk am gawar nano nogondo' ra pila' no. Tukuo' boo ru malaikat bandar no ra tutuku' no; gawar nano 2,400 kilomito. Pila' am sawat nano nogondo' ra gawar nano.

¹⁷ Tukuo' poyo ru malaikat no timbok no; sawat no onom ngoopor ngamito. Tutuku' ru malaikat no ioginio tutuku' kaindalaman ru ulun.

¹⁸ Timbok no binaal intor ra batu baiduri masasansam am bandar no binaal intor ra mas kopoyo, maniol koson ra galas.

¹⁹ Batu-batu nampaturungan ra timbok bandar no rinamayan ra nansalinut parmata mologo. Kasaa' no batu baiduri masasansam, karuo batu nilam, katalu batu akik am kaapat batu jamrud.

²⁰ Kalimo batu oniks, koonom batu dalima', katulu' batu ratna sampaka', kabalu' batu biril, kasiam batu topaj, koopor batu kalsidoni, koopor am rondo' batu pirus am koopor am ruo batu kasubung.

²¹ Mopor am ruo umpasan no, ioginio mopor am ruo mutiara. Moonong umpasan no binaal intor ra rondo' mutiara. Ralan ru bandar no binaal intor ra mas kopoyo, maniol koson ra galas.

²² Kalo nakito ku Baloi Tuhan giu' ra bandar no, sabap ra Tuhan galama' soroi ra giu', i Aki Kapuuno' Maayo Kaga' Kuasa' am Anak Domba no.

²³ Bandar no kalo pana sirangin ru mato ru orou kapoam bulan, sabap ra masindaan noyo ru katulayan ri Aki Kapuuno', am Anak Domba no galama' lampung nano.

²⁴ Bansa'-bansa' ra tana' ti mangkiralan ralalom sinda nano am raja'-raja' ru tana' ti pana ibiton nilo kalangkayaan nilono ra bandar no.

²⁵ Umpasan ru bandar no monsongorou ukabin; am kalo angabin sabap ra kolondo' rondom ra giu' no.

²⁶ Kalangkayaan am urumat ru bansa'-bansa' ibiton ra bandar no.

²⁷ Kolondo' atan-atan malaat iowon sumubol ra bandar no, kapoam osoi ayuk pana mambaal ra makauyuyu' kapoam magagabau. Ondo' ayuk iowon sumubol no ioginio ilo ondo' inggalan nilai tinulisan noyo ralalom ra kitab ru Ulun Mokoowot ra Kaayagan Motopot ru Anak Domba no.