PINAINTALANG 20 - Tanou Moonsoi Timugon

Pamarintaan buoi saribu ngambilor

¹ Kakito ku boo ra rondo' malaikat tumuun intor ra suruga'. Nampaguut io ra kunsi' ru intok ru ulun namagatoi am rondo' rantai maayo kaga'.

² Rokopo' no tambuakal no – io ti kukuo intor ra galing i, ioginio Tingganai ru riwato kapoam Iblis – am rantayo' no buoi saribu ngambilor.

³ Papatiro' io ru malaikat no ra intok ru ulun namagatoi no am kunsio' am tandui' no angob no ra segel. Intor raginio tambuakal no kalo boo makapamparuung ra bansa'-bansa' suku' saribu ngambilor no makai'. Mopongo ginio palabuson io ra kalo kukula' buoi.

⁴ Kakito ku boo kurisi'-kurisi' turungan ru raja', am ulun-ulun ondo' nanturung inanian ra kuasa' mangukum. Nakito ku niayuk ambiluo ru ulun-ulun ondo' iningguluan sabap ra nangani' ilo ra kaintutunan intor i Jisus am nampatanou ra pambalaan ri Aki Kapuuno'. Ulun-ulun no kalo siminamba ra bibiag masigo kapoam sinungkalalaing no am kalo igondo' tinatanduan ra saap ru bibiag masigo no ra rabas am kalindu' nilono. Ilo naayag saguli' am namarinta ilo koson ra raja' mababaya' ri Kristus buoi saribu ngambilor.

⁵ Gitio noyo kaayagan saguli' ra kasaa'. (Kaa' ulun-ulun namagatoi ra bokon kalo bayagon saguli' buoi saribu ngambilor ti.)

⁶ Pakaansuk no ulun ondo' paayaan bayagon saguli' ra kasaa' ti. Kapatayan karuo kalo manguasa' risilo. Masauk ilo boo ra imam ri Aki Kapuuno' am ri Kristus, am mamarinta ilo mababaya' Riso buoi saribu ngambilor.

Tingganai ru riwato kinala

⁷ Mopongo saribu ngambilor no, palabuson Tingganai ru riwato no intor ra pangaputan no.

⁸ Mongoi io pamparuung ra ngaangai' bansa' ra titikop ru tana' polos ra pagun Gog am Magog. Timungon ilo ru Tingganai ru riwato no mongoi pantula' am suang nilono mogondo' ra suang ru agis giu' ra kiing ru raat.

⁹ Nakaralat ilo ra titikop ru tana' ti saboi liputin nilo kim ru ulun ri Aki Kapuuno', ioginio bandar ondo' tinagaman Nano. Kaa' timinuun apui intor ra suruga' mangumpo risilo.

¹⁰ Tingganai ru riwato boo ondo' namparuung risilo no pinatiran ra tasik ru apui ondo' naratok ra balirang mapaang. Gili, gitio noyo namatiran ra bibiag masigo am migiangku ra nabi no am imboloon ilo orou-rondom ra sabuoi-buoi no.

Pangukuman pamupusan

¹¹ Kakito ku boo rondo' takhta ondo' maayo am mapulak am Io ondo' nanturung no. Limbowon am tana' maliom ra saang Nano, saboi kalo boo makito saguli'.

¹² Nakito ku ulun namagatoi, langkaya' am musikin, minigor ra saang ru takhta no. Ukabo' boo kitab-kitab. Rondo' poyo inukab, ioginio kitab ru Ulun Mokoowot ra Kaayagan Motopot. Inukuman boo ulun namagatoi no maya' ra binaal nilono koson natulisan ra kitab.

¹³ Ulun minatoi giu' ra raat, intor ra Patayan kapoam giu' ra Nabalu; ngaangai' inukuman maya' ra binaal nilono.

¹⁴ Patayan am Nabalu pinatiran ra tasik ru apui. (Tasik ru apui ti ioginio kapatayan ra kainduo.)

¹⁵ Osoi ayuk ondo' inggalan nano kalo tinulisan ra ralalom ru kitab ru Ulun Mokoowot ra Kaayagan Motopot, patirin io ra tasik ru apui.