PINAINTALANG 19 - Tanou Moonsoi Timugon

¹ Kopongo raginio, morongog ku koson ra bolos mapuor ru ulun masuang giu' ra suruga' minindagu ra, “Koompor noyo i Aki Kapuuno'. Io ayuk Mamamayag takau. Io ayuk matulai am Io no makakuasa'.

² Motopot am mabanis pangukuman Nano. Nakapangukum Io no ra ruandu' mantatalan ra inan nano ondo' nampakalayau ra ulun ru tana' ti ra pansasawaan nano. Nakapangukum Io noyo riso sabap ra namatoi io ra ulipon ri Aki Kapuuno'.”

³ Ginio ra golok poyo ulun masuang no, “Koompor noyo i Aki Kapuuno'. Lisun ru apui ondo' nangumpo ra bandar no bubuun ra mantilayun.”

⁴ Karuo ngoopor am apat ngaulun tingganai am kaapat baal maayag no igulatur am samba ilo ri Aki Kapuuno' ondo' nanturung ra takhta no. Konilo, “Amin. Koompor noyo i Aki Kapuuno'.”

Bunsag paguatan ru Anak Domba

⁵ Morongog boo intor ra takhta no bolos mindagu, kono, “Akau ngaangai'; ulipon Nano am ngaangai' ulun, langkaya' am musikin am ondo' mangurumat Riso; Koompor noyo i Aki Kapuuno'.”

⁶ Korongog ku boo koson ra bolos ru ulun masuang; koson ra kinapuor ru bosoi maayo am koson ra timpalak mapuor. Norongog ku ilo minindagu ra, “Koompor noyo i Aki Kapuuno'. Sabap ra Tuhan takau i Aki Kapuuno' Maayo Kaga' Kuasa' no mamarinta.

⁷ Ibok takano pakaansuk am pangiantak; omporo' takau kuasa' Nano. Sabap ra nasuku' noyo orou paguatan ru Anak Domba no, am ruandu' uoton no nakatampos noyo.

⁸ Pinataak noyo riso ra bayang linon ondo' manguliat.” (Bayang linon no ioginio baal moonsoi ru ulun ri Aki Kapuuno'.)

⁹ Indagu boo malaikat no raki', “Tulisi' noyo gitio: Pakaansuk noyo ilo ondo' piniau ra bunsag paguatan ru Anak Domba no.” Tungguli' poyo ru malaikat no, “Gitio noyo pambalaan motopot intor ri Aki Kapuuno'.”

¹⁰ Igulatur aku boo ra saang ru malaikat no am samba riso, kaa' indagu io, “Pai' aku sambaa'. Sambaa' noyo i Aki Kapuuno'. Sabap ra aku pana rangan mangngandoi muno, am ra ngaangai' pabukat muno ondo' gumagaya' ra kaintutunan intor ri Jisus.” Sabap ra katapatan ondo' pinakito ri Jisus mapaikang ra ulun mampabala' ra tanou intor ri Aki Kapuuno'.

Ondo' nangura' ra kuda mapulak

¹¹ Kakito ku boo suruga' no naukab am mokoondo' sanginan kuda mapulak. Ondo' nangura' no ininggalanan i Mampagagaya' am i Motopot. Matimpok Io ra mangukum am mangayou ra bokon.

¹² Mato Nano mapaang koson ra apui am nangkaraun Io ra masuang karaun. Tinulisan Io ra rondo' inggalan ondo' Io galama' ayuk nakapandai ra arati' no.

¹³ Sukub ra binayang Nano natakisan ra raraa'. Sabiton Io ra “Bala' ri Aki Kapuuno'”.

¹⁴ Masuang saujor ru suruga' siminunu' Riso ra nanangkuda ilo ra kuda mapulak am nambayang ra linon kopoyo ondo' mapulak.

¹⁵ Intor ra kabang Nano miningkual rondo' ilang malarom ondo' mampakaala ra bansa'-bansa'. Parintaan No ilo ra kalo makaasi' mogondo' ra kawa' ru anggur kikinjangin ra intok pamagaan, ioginio sangit am ukum ri Aki Kapuuno' Maayo Kaga' Kuasa'.

¹⁶ Sukub Nano am ra paa Nano tinulisan ra inggalan koson ragitio, “Raja' ru ngaangai' raja' am Tuhan ru ngaangai' tuan”.

¹⁷ Kakito ku boo rondo' malaikat minigor ra mato ru orou. Giminolok io ra bolos mosongou ra ngaangai' kanui, “Ibok ongoi akan ra bunsag maayo ondo' pinatampos ri Aki Kapuuno'.

¹⁸ Ioginio baangkai ru raja', tingganai ru saujor am saujor; ondo' nanangkuda mabaya' ra kuda-kuda; baangkai ru ngaangai' ulun ru tana', langkaya' am musikin, ulipon am kalo inulipon!”

¹⁹ Kakito ku boo bibiag masigo no am raja'-raja' ru tana' ti, nababaya' ra pulalai ru saujor nilono natimung noyo koson mangayou Riso ondo' nangura' ra kuda mapulak no am saujor Nano.

²⁰ Bibiag masigo no pana narakop nabaya' ra migiangku ra nabi no ondo' nakapambaal ra kaimuagan ra saang ru maayag masigo no. (Intor ra kaimuagan raginio namparuung io ra ulun ondo' tinatanduan ra saap ru bibiag masigo no am ilo ondo' siminamba ra sinungkalalaing no poyo.) Bibiag masigo no am migiangku ra nabi no pinatiran ra tasik ru apui ondo' naratok ra balirang mapaang.

²¹ Saujor nilono napatoi ra ilang ondo' miningkual intor ra kabang ru nangura' ra kuda mapulak no. Ngaangai' kanui pana minatong boo am nangakan ra baangkai ru namagatoi suku' naasug.