PINAINTALANG 17 - Tanou Moonsoi Timugon

Ruandu' mantatalan ra inan ondo' kauligan kaga'

¹ Kopongo raginio, sangulun intor ra katulu' malaikat no ondo' nampaguut ra tulu' sangkir no, uma' raki' am indagu, “Ibok, tuluin tokou ati koson ruandu' mantatalan ra inan ondo' kauligan kaga' no ukumin. Ioginio, bandar maayo no ondo' binaal mamaar ra sungoi ondo' masuang kaga'.

² Ngaangai' raja' am ulun ru tana' ti nansasawa' ilo ra mamagun ru bandar i, koson ra ulun mangagauk ra wain.”

³ Ambiluo ri Aki Kapuuno' no boo nanguasa' raki' am ibito' aku ru sangulun malaikat ra intok masiluk. Giu' no makito ku sangulun ruandu' nanturung ra rasawat ru sanginan bibiag masigo malia' ondo' natitip niayuk ra tinulisan ra inggalan magulas ri Aki Kapuuno'. Bibiag masigo no makaulu tulu' am makasangau mopor.

⁴ Ruandu' no nambayang ra matanggilung am kasumba' am nanantakin ra mas, parmata am sisigot mutiara. Nampaguut io ra sangkir mas ondo' napanu' ra baal makauyuyu' am majamol, ioginio ampos intor ra pansasawaan nano.

⁵ Rabas nano tinulisan ra inggalan ondo' arati' nano kalo mapandayan ru ulun: Inggalan no am, “I Babil ondo' maayo, ina' ru ngaangai' mantatalan ra inan am ulun homoseks am lesbian.”

⁶ Kakito ku boo ruandu' no nagauk ra raraa' ru ulun ri Aki Kapuuno' am raraa' ru ulun ondo' pinatoi sabap ra giminagaya' ri Jisus. Paat nakito ku ruandu' no, nangimuag aku kakaga'.

⁷ Pangkuot boo malaikat no raki', “Kua pangimuag kou? Balain tokou atan kalo napandayan ru ulun ra ruandu' no am ra bibiag masigo ondo' sinakayan nano – ioginio bibiag masigo makaulu tulu' am makasangau mopor.

⁸ Bibiag masigo ondo' nakito muni, naayag ra galing i, kaa' raino kalo boo. Kalo boo mabuoi am mingkual io intor ra intok ru ulun namagatoi no am pusoon. Ulun-ulun ru tana' no ondo' inggalan nilo kalo tinulisan ra kitab ru Ulun Mokoowot ra Kaayagan Motopot ra kalo poyo tana' ti biningkal, makatigog ilo makakito ra bibiag masigo no. Bibiag masigo no naayag ra galing i; raino kalo boo, kaa' sumalula' io poyo saguli'.

⁹ Ralalom baal ragitio musiti' mapintar am makarati'. Tulu' ulu ti ioginio tulu' bulur, ioginio nanturungan ru ruandu' no. Tulu' ulu no niayuk iono tulu' ngaulun raja'.

¹⁰ Limo intor ra tulu' ngaulun raja' no minatoi noyo; sangulun no lakat ayuk poyo mamarinta am sangulun kalo poyo sumalula'. Ondo' sumalula' no sangkinolor ayuk io mamarinta.

¹¹ Bibiag masigo ondo' galing i naayag kaa' raino kalo boo, io no raja' kabalu' ondo' sotopot no sangulun intor ra tulu' ngaulun raja' i, am io ti pusoon.

¹² Mopor sangau ondo' nakito mu ioginio mopor ngaulun raja' ondo' kalo poyo nakatalimpuun mamarinta. Kaa' aniin ilo ra kuasa' mamarinta koson ra raja' mabaya' ra bibiag masigo no buoi sanjam.

¹³ Pogogondoon ru mopor ngaulun raja' ti guang nilono; ngaangai' ikang am kuasa' nilono pataakin ra bibiag masigo no.

¹⁴ Tumula' ilo ra Anak Domba no. Kaa' Anak Domba no am ilo ondo' gumagaya' Riso no, ondo' piniau Nano am ondo' pinili' Nano, mangala ra raja'-raja' nano, sabap ra Io noyo Tuhan ru ngaangai' tuan am Raja' ru ngaangai' raja'.”

¹⁵ Indagu boo malaikat no raki', “Timug ondo' nakito muno, ondo' tinurungan ru ruandu' mantatalan ra inan no, ioginio papag-papag, bansa'-bansa', ragu-ragu, am pagun-pagun.

¹⁶ Mopor sangau am poyo bibiag masigo ondo' nakito muno masisang ilo ra ruandu' ondo' mantatalan ra inan nano. Gaawon nilo atan ondo' soroi riso no am iruanin nilo io ra magibaang. Akanon nilo umas nano am umpoon io ra apui.

¹⁷ Sabap ri Aki Kapuuno' nakapangulau noyo ra guang nilono mampaugar ra kasagaan Nano. Pogogondoon ri Aki Kapuuno' guang nilono koson mampataak ra kuasa' nilono ra bibiag masigo no, ondo' mamarinta saboi masauk atan ondo' pinabala' ri Aki Kapuuno' i.

¹⁸ Ruandu' ondo' nakito muno ioginio bandar maayo, io no raja' ondo' mamarinta ra raja'-raja' ru tana' ti.”