PINAINTALANG 16 - Tanou Moonsoi Timugon

Sangkir ru sangit am ukum ri Aki Kapuuno'

¹ Pokorongog aku boo ra bolos mosongou intor ra Baloi Tuhan minindagu ra tulu' malaikat no, “Ugar no am pasasaro' suang ru sangkir ru sangit am ukum ri Aki Kapuuno' no ra tana'!”

² Ugar malaikat kasaa' no am pasasaro' no suang ru sangkir nano ra tana' ti. Salula' boo talipos ondo' makalalaa' am maruol kaga' ra inan ru ngaangai' ulun ondo' tinatanduan ra saap ru bibiag masigo no am ilo ondo' siminamba ra sinungkalalaing nano.

³ Pasasaro' boo ru malaikat karuo no suang ru sangkir nano ra raat. Timug ru raat no nasauk koson ra raraa' ru baangkai am ngaangai' ondo' maayag ra raat no minatoi.

⁴ Pasasaro' boo ru malaikat katalu no suang ru sangkir nano ra sungoi am taur-taur ru timug am ngaangai' timug nasauk ra raraa'.

⁵ Korongog ku malaikat ondo' nanguasa' ra timug no mindagu, “O Aki Kapuuno' Ondo' Mapasau Kaga', ondo' galing i am raino soroi. Ukum ondo' pinaratu' Muno motopot.

⁶ Nampasasar ilo noyo ra raraa' ru ulun ri Aki Kapuuno' am ra raraa' ru nabi-nabi; kaa' raino binaal Mu ilo manginum ra raraa' no. Matimpok ukum Muno risilo!”

⁷ Korongog ku boo bolos intor ra panalaban ra kaminyan no mindagu, “O Tuhan, i Aki Kapuuno' Maayo Kaga' Kuasa'. Motopot am matimpok ukum pinataak Muno risilo!”

⁸ Pasasaro' boo ru malaikat kaapat no suang ru sangkir nano ra mato ru orou suku' lasu' nano ra makalalaa' makapangumpo ra ulun.

⁹ Maumpo ulun ra kinalasu' no am magulas ilo ra inggalan ri Aki Kapuuno', ondo' manguasa' ra ngaangai' karaat. Kaa' ilo ti kalo tumalikur intor ra tula nilo am kalo masaga' mongompor ra kuasa' ri Aki Kapuuno'.

¹⁰ Pasasaro' boo ru malaikat kalimo no suang ru sangkir nano ra takhta ru bibiag masigo no. Ginio ra intok kinuasa' ru bibiag masigo no liminondom am ulun-ulun no nongokot ra rila' nilai galama' sabap ra maruol no.

¹¹ Intor raginio magugulas ilo boo ri Aki Kapuuno' ondo' mayan ra suruga' sabap ra maruol am talipos nilono. Kaa' kalo tumalikur ilo intor ra baal malaat nilono.

¹² Pasasaro' boo ru malaikat koonom no suang ru sangkir nano ra sungoi Iprat ondo' maayo no. Ginio ra sungoi no liminasak saboi nasauk ra intok pansailan ru raja'-raja' ondo' intor ra sirangon no.

¹³ Kakito ku boo talu riwato ondo' koson ra antit. Miningkual ilo intor ra kabang ru tambuakal no, intor ra kabang ru bibiag masigo am intor ra kabang ru migiangku ra nabi no.

¹⁴ Sotopot no, ilo ti riwato ondo' mambaal ra kaimuagan. Katalu-talu riwato no mongoi panimung ra ngaangai' raja' ru tana' ti koson mangayou paat ra Orou maayo ri Aki Kapuuno' ondo' Maayo Kaga' Kuasa'.

¹⁵ “Rongogo' min! Aku matong koson ra sangulun mantatakou. Pakaansuk noyo ulun ondo' kalo mombolong am ondo' magalung ra bayang nano. Pagilalain no saboi kalo magibaang io am mauyu' ra saang ru ulun.”

¹⁶ Riwato-riwato no boo nanimung ra raja'-raja' giu' ra intok ondo' ralalom ragu ru Ibrani inggalanin ra Armagidon.

¹⁷ Pasasaro' boo ru malaikat katulu' no suang ru sangkir nano ra limbowon. Bolos mosongou morongog intor ra takhta no giu' ra Baloi Tuhan, kono, “Nopongo noyo.”

¹⁸ Nampaganit, nanimpalak am tana' ti muyog ra makalalaa'. Intor ra talimpuun ru ulun ti sinauk, kalo igondo' tana' ti muyog koson raginio. Gitio ayuk poyo kainsaa' ru tana' ti muyog ra makalalaa' kaga'.

¹⁹ Intor raginio, bandar ondo' maayo no napitalu, am nalunsai niayuk bandar ru ngaangai' pagun ra tana' ti. Kakara' boo ri Aki Kapuuno' bandar Babil ondo' maayo no am painumo' No io ra ruu' ru anggur intor ra sangkir Nano – ioginio wain ru sangit am ukum Nano ondo' makalalaa'.

²⁰ Ngaangai' pulu' am gunung pana maliom.

²¹ Intor ra limbowon no riminatu' ra ulun rasam batu ra maayo ondo' rorondo' makabagat limo ngoopor ngakilo no. Ginio boo ra magulas ilo ri Aki Kapuuno' sabap ra baal ru rasam batu no makalalaa'.