PINAINTALANG 14 - Tanou Moonsoi Timugon

Anak Domba am ulun Nano

¹ Ilai' ku boo, am makito Anak Domba no minigor ra rasawat ru Bulur Sion. Nabaya' Riso no mokoondo' 144,000 ngaulun ondo' rabas nilono tinatanduan ra inggalan Nano am inggalan ru Ama' Nano.

² Giu' boo ra limbowon korongog ku bolos koson ra kinapuor ru bosoi maayo am koson ra timpalak mapuor. Bolos nano morongog koson ra bolos ru jitor paat ra kulion.

³ Giu' ra saang ru takhta, kaapat-apat ru ilo ondo' maayag am tingganai-tingganai no, minigor poyo 144,000 ngaulun no am marimbai ra rimbai nakabagu. Rimbai raginio kalo maalap kaigigila' ru osoi ayuk pana, kaa' maatus apat ngoopor am apat ngaribu ngaulun no ayuk sabap ra binayag ilo noyo ri Aki Kapuuno'.

⁴ Ilo ti ungkuyon ondo' kalo igondo' siminamba ra tuhan ra bokon. Ilo ti ungkuyon mapasau toojo ondo' kalo igondo' lampit ra ruandu'. Mapasau ilo mogondo' ra ralaa. Ilo ti sumunu' ayuk ra Anak Domba no ra ati ayuk angayan Nano. Binayag ilo intor ra ngaangai' ulun koson ilo ti kasaa' pataakin ri Aki Kapuuno' am ra Anak Domba.

⁵ Ilo ti kalo igondo' pagabau am kolondo' sala.

Talu malaikat

⁶ Kakito ku boo rondo' malaikat ra bokon mansiab ra masawat. Malaikat no nagibit ra Tanou Moonsoi ondo' mantilayun koson pabalaan ra ulun ru tana' ti, ioginio ra moonong papag, ragu, bansa' am pagun.

⁷ Minindagu io ra bolos mosongou, “Urumato' i Aki Kapuuno' am omporo' min kuasa' Nano. Sabap ra nasuku' noyo orou pangakiman ri Aki Kapuuno' ra ulun. Sambaa' noyo Io ondo' nampasauk ra limbowon, tana', raat am ngaangai' taur ru timug!”

⁸ Kopongo malaikat kasaa' no sunu' poyo malaikat karuo ondo' minindagu, “Nalunsai io noyo! Bandar Babil ondo' maayo no nalunsai noyo! Mamagun nano mangkimait ra ngaangai' bansa' ra pansasawaan nilo, mogondo' ra ulun jajalin gauko' ra wain.”

⁹ Kopongo malaikat karuo no sunu' malaikat katalu ondo' minindagu ra bolos mosongou, “Osoi ayuk sumamba ra bibiag masigo no mabaya' ra sinungkalalaing nano am tinatanduan ra rabas kapoam kalindu' nano; ilo no ukumin toojo ri Aki Kapuuno' – mogondo' ra ulun jajalin gauko' ra wain mabisa'.

¹⁰ Ginio pinawar No noyo ra sangkir ru sangit Nano am sanganu pana kalo tigowon No! Ngaangai' ondo' manginum no imboloon ralalom ru apui am balirang giu' ra saang ru malaikat-malaikat mapasau no am ra Anak Domba no.

¹¹ Mantilayun buun ru lisun ru apui ondo' mangimbolo' ra ulun-ulun no. Ilo ondo' sumamba ra bibiag masigo no am sinungkalalaing nano, am ondo' tinatatanduan ra inggalan ru bibiag masigo no, imboloon ilo orou-rondom ra kalo lalanggain!”

¹² Ginio boo sabap ra ulun ri Aki Kapuuno' ondo' gumagaya' ra panusuban Nano am niayuk gumagaya' ri Jisus, musiti' ilo tumaan ra kaimbalaan.

¹³ Korongog ku boo bolos intor ra limbowon mindagu, “Tulisi' noyo gitio: Pakaansuk noyo ilo ondo' intor raino matoi sabap ra mampaugar ra kandoi ru Tuhan.” Taam Ambiluo ri Aki Kapuuno', “Motopot. Ilo ti patanguson intor ra kaimbalaan, am aniin ilo ra ampos sabap ra kandoi nilono ra Tuhan.”

Ulun ru tana' ti ukumin

¹⁴ Aku pana nagilong am makakito ra gaun mapulak am mokoondo' ondo' nanturung rasawat ru gaun no makito koson ra ulun. Nangkaraun Io ra karaun mas am nampaguut Io ra tantab malarom.

¹⁵ Rondo' malaikat boo ra bokon miningkual intor ra Baloi Tuhan. Giminolok io ra mapuor ra Io ondo' nanturung ra rasawat ru gaun no, kono, “Ulun ru tana' ti sama' noyo ukumin. Patantabo' noyo raino, sabap ra nasuku' noyo orou pangkumasan!”

¹⁶ Io ondo' nanturung boo ra rasawat ru gaun no ukumin no ulun ru tana' ti, mogondo' ra bilor tantabon ra tantab.

¹⁷ Kakito ku boo rondo' malaikat ra bokon poyo miningkual intor ra Baloi Tuhan giu' ra suruga'. Io pana nampaguut ra tantab malarom.

¹⁸ Kopongo raginio, rondo' malaikat ra bokon, ondo' manguasa' ra apui, minatong intor ra panalaban ra kaminyan. Giminolok io ra bolos mapuor ra malaikat ondo' nampaguut ra tantab malarom no, kono, “Ulun ru tana' ti sama' noyo ukumin, mogondo' ra kawa' ru anggur no impunguon tantabo'.”

¹⁹ Patantabo' boo ru malaikat no tantab nano ra tana' am katantab boo kawa' ru anggur no. Kawa' ru anggur no pinatiran no ra intok pamagaan ru anggur ondo' maayo, ioginio sangit am ukum ri Aki Kapuuno'.

²⁰ Kawa' ru anggur no pagaan ra liwar ru bandar, am intor ra intok pamagaan no nampaliur raraa' koson ra sungoi ondo' galur no talu ngaatus ngakilomito am landom no ruo ngamito.