PINAINTALANG 13 - Tanou Moonsoi Timugon

Ruo ngainan bibiag masigo no

¹ Kakito ku boo sanginan bibiag masigo siminalula' intor ra ralalom ru raat. Mokoondo' io ra mopor sangau am tulu' ulu. Rorondo' ra sangau no mokoondo' karaun am rorondo' ra ulu no makabatik ra inggalan magulas ri Aki Kapuuno'.

² Bibiag masigo ondo' nakito kuno, baal nano koson ra rimau am kalayam nano koson ra kalayam ru baawang am kabang nano koson ra kabang ru singa'. Tambuakal ni nangani' ra ikang nano galama' ra bibiag masigo no am takhta nano am kuasa' ra maayo.

³ Rondo' intor ra tulu' ulu no makito koson mokoondo' pilat maayo ondo' makapatoi, kaa' pilat no napali' noyo. Ngaangai' ulun ru tana' ti nangimuag ra bibiag masigo no, am baya' ilo boo riso.

⁴ Sambaan nilo tambuakal no sabap ra nakapangani' io ra kuasa' nano ra bibiag masigo no. Sambaan nilo niayuk bibiag masigo no, konilo, “Kolondo' noyo kuasa' mokogondo' ra bibiag masigo ti. Kolondo' makagula' riso!”

⁵ Bibiag masigo no iowon lumimbau am migiangku ra io i Aki Kapuuno'. Iowon io poyo manguasa' apat ngoopor am ruo ngambulan.

⁶ Tumalimpuun io migiangku io ri Aki Kapuuno' am magulas ra inggalan Nano, ra inayanan Nano am ra ngaangai' ondo' minayan ra suruga'.

⁷ Iowon io mantula' ra ulun ri Aki Kapuuno' am niayuk mangala risilo. Am inanian io ra kuasa' mamarinta ra ngaangai' papag, ragu, bansa' am pagun.

⁸ Ngaangai' ulun ondo' mayan ra tana' ti sumamba riso. Kaa' mokoondo' niayuk ondo' kalo sumamba riso, ioginio ilo ondo' inggalan nilono tinulisan noyo ra kitab ru Ulun Mokoowot ra Kaayagan Motopot paat ra tana' ti kalo poyo biningkal. Kitab no ampu' ru Anak Domba ondo' pinatoi ru ulun.

⁹ “Rongogo' am karaa' min gitio.

¹⁰ Osoi ayuk inaru' noyo rokopon, maaru' marakop. Osoi ayuk inaru' potoyon ra ilang, maaru' matoi ra ilang. Ginio sabap ra ulun ri Aki Kapuuno' musiti' tumaan ra kaimbalaan am gumagaya'.”

¹¹ Kakito ku poyo sanginan bibiag masigo ra bokon siminalula' intor ra ralalom ru tana'. Mokoondo' io ra ruo sangau koson ra sangau ru anak domba am bolos nano koson ra bolos ru tambuakal.

¹² Ngaangai' kuasa' ru bibiag masigo kasaa' no pinaugar no ra saang nano. Ngaangai' minayan ra tana' ti jajalin no sumamba ra bibiag masigo kasaa' no, ondo' pilat makapatoi i kaa' napali' noyo.

¹³ Bibiag masigo karuo no nambaal ra kaimuagan maayo. Mambaal io ra apui intor ra limbowon tumuun ra tana' ti ra pagilangan ru ulun.

¹⁴ Ngaangai' ulun ra tana' ti ruungon no mansail ra kaimuagan ondo' iniou mabaal no ra saang ru bibiag masigo kasaa' no. Ilo ngaangai' ti susubon no mambaal ra sinungkalalaing koson sumamba ra bibiag masigo ondo' napilatan noyo ra ilang, kaa' lakat poyo maayag.

¹⁵ Bibiag masigo karuo no inanian ra kuasa' mamayag ra sinungkalalaing no, saboi sinungkalalaing no makaindagu am makapamatoi ra ngaangai' ondo' kalo masaga' sumamba riso.

¹⁶ Ngaangai' ru ulun, malawo am maikang, langkaya' am musikin, ulipon am kalo inulipon, jajalin ilo ru bibiag masigo no ra tatanduin kalindu' ra pamiris kapoam rabas nilono.

¹⁷ Kolondo' sangulun pana makapambali kapoam makapantalan amon ru kolondo' ilo ra tatandu' ti, ioginio inggalan ru bibiag masigo no galama' kapoam numbur ondo' magabig ra inggalan nano.

¹⁸ Gitio tandaan toojo guango'. Osoi ayuk mapintar makaulig ra arati' ru numbur ru bibiag masigo no. Sabap ra numbur no inggalan ru ulun. Numbur no 666.