PINAINTALANG 11 - Tanou Moonsoi Timugon

Ruo ngaulun sasi' no

¹ Anii' aku boo ra rondo' tataun tutuku' maawar am binalaan, “Ongoyo' noyo tukuo' tayar ru Baloi ri Aki Kapuuno' am altar no. Untobo' kula' suang ru ulun ondo' sumambayang ra giu' no.

² Kaa' pai' tukuo' liliut ru Baloi Tuhan no, sabap ra tayar raginio tinaakan noyo ra ulun-ulun sala' ka Jaudi. Kikinjangin nilo Bandar Mapasau no buoi apat ngoopor am ruo ngambulan.

³ Manusub Aku ra ruo ngaulun sasi' Kuno ondo' mambayang ra karung ra mangulir ilo, am ilo ti mampabala' ra tanou intor ri Aki Kapuuno' 1,260 ngoorou.”

⁴ Sasi' ra ruo ngaulun no soroi ra saang ru Tuhan ondo' manguasa' ra tana' ti, am ilo no koson ra ruo ngampuun jaitun am ruo lampung.

⁵ Amon ru mokoondo' mangkinam mampalaat risilo, mingkual apui no intor ra kabang nilo am mangumpo ra pantula' nilo. Intor raginio, osoi ayuk mangkinam mampalaat risilo no potoyon.

⁶ Mokoondo' ilo ra kuasa' mangangob ra limbowon ti saboi kalo boo rumasam buoi ilo mampabala' ra tanou intor ri Aki Kapuuno'. Mokoondo' ilo niayuk ra kuasa' ra ngaangai' taur ru timug, koson makapangulau ra timug no masauk ra raraa'. Mokoondo' ilo niayuk ra kuasa' mambaal ra nansalinut kapaganan malaat ra tana' sasanggilan ayuk maya' ayuk ra kasagaan nilo galama'.

⁷ Pakapambala' ilo ra tanou no, bibiag masigo ondo' mingkual intor ra intok ru ulun namagatoi no tumula' risilo. Mangala am mamatoi io risilo.

⁸ Baangkai nilono makalampik ra ralan ru bandar maayo, ioginio nanalipan ra Tuhan nilono. Pagabigan ra bandar raginio Sodom kapoam Misir.

⁹ Ulun intor ra moonong pagun, bansa', ragu am papag magilong ayuk ra baangkai nilo buoi talu ngoorou naintanga' am kalo mataak nilo baangkai-baangkai no lobongon.

¹⁰ Ngaangai' ilo no maansukan ra pinatayan ru ruo ngaulun sasi' no. Munsag ilo am magagator ilo ra tangguang ra rondo' am bokon, sabap ra ruo ngaulun nabi no nangimbolo' toojo ra ulun ru tana' ti.

¹¹ Pakasail talu ngoorou naintanga' ratong poyo painawo intor ri Aki Kapuuno' am subol ra baangkai nilo. Ilo pana bigor am ngaangai' ru ulun nagilong risilo no nalaa' kakaga'.

¹² Korongog boo ru karuo ngaulun nabi no bolos mapuor intor ra suruga' minindagu risilo, “Ibok no, pagaloi ragiti!” Liliwa' pantula' nilono magilong, kulumputo' ruo ngaulun nabi no ru gaun mongoi ra suruga'.

¹³ Paat raginio niayuk mogonggon tana' ti ra makalalaa'. Mopor piatus ru bandar no linunsai am tulu' ngaribu ngaulun pinatoi. Ulun ra bokon no malaa' boo kakaga', am nongongompor ilo ra kuasa' ri Aki Kapuuno' ra suruga'.

¹⁴ Sauk malaat karuo nakasail noyo. Kaa' ilai' min! Sauk malaat katalu no sumunu' noyo.

Bujung katulu'

¹⁵ Samputi' boo ru malaikat katulu' no bujung. Bolos-bolos mosongou morongog giu' ra suruga', konilo, “Kuasa' mamarinta ra tana' ti soroi raino ra Tuhan takau am ra Mamamayag Nano. Mamarinta Io ra sabuoi-buoi no!”

¹⁶ Karuo ngoopor am apat ngaulun tingganai ondo' nanturung ra takhta ra saang ri Aki Kapuuno' no, igulatur am samba ilo ri Aki Kapuuno'.

¹⁷ Konilo, “O Tuhan, i Aki Kapuuno' Maayo Kaga' Kuasa', ondo' raino am galing i pana soroi! Maringkuanang akai Rirun sabap ra nampaintalang Kono ra kuasa' maayo Muno, am tumalimpuun noyo mamarinta!

¹⁸ Ngaangai' ulun ondo' kalo nangintopot Rirun siminangit toojo, sabap ra nasuku' noyo orou Okou mambalos, am pangakiman Muno ra ulun namagatoi nasuku' noyo. Nasuku' noyo orou Okou mangani' ra ampos ra ulipon-ulipon Muno, ioginio nabi-nabi, am ra ngaangai' ondo' mangintopot am mangurumat Rirun, maatang am kalo maatang. Nasuku' noyo orou mamuso risilo ondo' mampalunsai ra tana' ti.”

¹⁹ Kaukab Baloi ri Aki Kapuuno' no giu' ra suruga' am Kaban Nabantuan i pana makito ra ralalom no. Nampaganit boo, nanimpalak, tana' ti mogonggon am riminasam ais batu ra maawas.