PILIPI 2 - Tanou Moonsoi Timugon

Korondoon am paingganaan guang mogondo' ri Kristus

¹ Ralalom ru kaayagan min sumimpung ri Kristus mokoondo' kano ra kaikangan. Makaansuk guang mino sabap ra tinagaman kau ri Kristus. Indanganon kau ru Ambiluo ri Aki Kapuuno' am montotogom kau ra bokon am niayuk makaasi' kau ra rondo' am bokon.

² Ginio nai ra kinam kano papakaansuk toojo ra guang kuno koson ragitio: Korondoo' guang am pangkaraan min, togom am kasagaan min.

³ Pai' kano paguyum ra kaatangan ayuk galama' kapoam paliso lumimbau. Kaa' sotopot no paingganaa' min guang mino koson mangkara' ra ulun bokon maatang poyo intor ramuyun.

⁴ Am pai' kano paguyum ra kasingkatan ayuk galama', kaa' kasingkatan niayuk ru ulun ra bokon.

⁵ Tilu kano ra guang am pangkaraan koson mogondo' ri Kristus:

⁶ Intor noyo ra talimpuun Io ti nogondo' ri Aki Kapuuno', kaa' kalo niayuk nampaguang Io ra gondo' Nano ri Aki Kapuuno' ti gonggomon No.

⁷ Kaa' ngaangai' tinatang No ayuk am siminauk koson ra ulipon am siminauk Io ra ulun, am kaayagan Nali mogondo' ritakau.

⁸ Pinainggana' No guang am giminagaya' ra susuban ri Aki Kapuuno' suku' minatoi Io – ioginio pinatayan Nano ra salip.

⁹ Ginio sabap ri Aki Kapuuno' nampainsawat noyo Riso ra intok maatang am nangani' Riso ra kuasa' ondo' maayo poyo intor ra ngaangai' kuasa' ra bokon.

¹⁰ Maa' raginio ngaangai' ondo' mayan ra suruga', kapoam ra tana' ti am niayuk ra intok ru ulun namagatoi pana migulatur ra saang ri Jisus.

¹¹ Am ngaangai' nilo pana mangiou ra i Jisus Kristus noyo Tuhan; Intor raginio katulayon boo i Aki Kapuuno', Ama' takau.

Parayus no gagaya' ra pangilaan ri Kristus

¹² Sabap raginio pabukat ondo' tagamin kuno, koson masalok kau niayuk giminagaya' raki' paat ra aku soroi ramuyun, mulu' poyo gagaya' mino ra raino ti ra itakau nakapaginggalur. Pirot kano mompogogot ra kaansayan ru pamayagan minti, ioginio mansail ra ati kulaan kinapirot ru guang min sumugut am mangurumat toojo ri Aki Kapuuno'.

¹³ Sabap ri Aki Kapuuno' no galama' magibit ra guang mino mangiou am poyo magagaya' min niayuk atan ondo' kasagaan Nano toojo.

¹⁴ Atan ayuk kondoyon min, moonsoi kalo mambulingot kau kapoam makimansangor.

¹⁵ Intor raginio nampakito kau ra akau ti anak ri Aki Kapuuno' ondo' kolondo' sala kapoam tula am moonsoi kaayagan min ra tatanga' ru ulun-ulun malaat am makatula no. Am paat ra akau maayag koson raginio, mogondo' kau ra butitin suminda ra rondom ti,

¹⁶ ra akau mampasaboi ra Tanou Moonsoi risilo. Amon ru koson raginio kaayagan min, tauli no, paat ra ratangan saguli' ri Jisus mokoondo' paringkuanangan kuno, sabap raginio mampakito ra kinandoi kuli kalo malubat am sala' ka kolondo' ampos.

¹⁷ Kaa' amon ru potoyon aku pana, am raraa' kuno masauk koson ra taak ri Aki Kapuuno', mabaya' ra pangintapatan min, maansayan aku ayuk am maansukan mababaya' ramuyun ngai'.

¹⁸ Am mogondo' niayuk ramuyun ra moonsoi maansayan am maansukan kau mabaya' raki'.

I Timotius am i Ipaproditus

¹⁹ Malansan aku ra ralalom indangan ru Tuhan Jisus, poongoyon ku i Timotius ramuyun ra mataki' koson tanou mino mampaikang boo ra guang kuno.

²⁰ Sabap ra rorondo' ayuk i Timotius pogondo' ru guang kutu am topot-topot mampaguang ra kasingkatan mino.

²¹ Kaa' bokon no sala' ka maguyum ra kaatangan ri Jisus Kristus, kaa' maguyum ayuk ra kasingkatan nilo galama'.

²² Akau galama' nakapandai noyo ra kinoonsoi ru paliso ri Timotius ti, koson ra sangulun anak mabaya' ra ama', nangindangan io raki' mampasaboi ra Tanou Moonsoi ri Aki Kapuuno'.

²³ Malansan aku ra mapandayan ku ayuk ra atan ondo' masauk raki', am poongoyon ku noyo i Timotius ti ramuyun ra mataki'.

²⁴ Am mangintopot aku niayuk ra Tuhan noyo mangindangan raki' koson kalo boo mabuoi aku pana mokoongoi pagilong ramuyun.

²⁵ Kaa' koson ra pabukat takau i Ipaproditus ondo' sinusub min mamparangan raki' koson mangindangan ra kandoi kutu, sumugut ra pamaguangan kuno moonsoi atarin ku io saguli' ramuyun.

²⁶ Noondom io kaga' ramuyun am maimamang guang nano ramuyun sabap ra naala' kau ra narualan io.

²⁷ Motopot ra bagu ti narualan io am mamaar noyo matoi, kaa' makaasi' i Aki Kapuuno' riso am sala' ka io ayuk kaa' aku niayuk, koson kalo boo gumaai kasilukan ru guang kuno.

²⁸ Ginio ra maayo guang kuno manusub riso sumaguli' ramuyun ra mataki', maa' boo raginio maansukan kau poyo muma' riso am guang kuno pana matasu' boo saguli'.

²⁹ Apuo' min noyo io mabaya' ra kaansayan koson sangulun pabukat min ra Kristian am urumato' noyo ngaangai' ulun mogondo' riso ti.

³⁰ Sabap ra kandoi nano ri Kristus nampataak io ra painawo nali am mamaar io matoi, koson mangindangan io raki' ondo' akau galama' kalo makakaluagan mambaal.