NIGIMIA 9 - Tanou Moonsoi Timugon

Mamagun nangiou ra tula nilo

^1-2 Paat ra orou karuo ngoopor am apat ra sila' raginio niayuk, ulun ru Israil timinimung. Nampali ilo koson mampakito ra pansagulian ilo ra tula nilo. Timinuliar ilo intor ra ngaangai' ulun bansa' ra bokon. Nambayang ilo ra konoon karung am ulu tinaukan ra kaau koson tatandu' mangiluk guang. Kopongo raginio bigor ilo am nangiou ra ngaangai' tula nilo am tula ru kinamatuaan nilo.

³ Buoi no olo'-olo' talu nganjam, kitab Taurat ru Tuhan, i Aki Kapuuno' nilo binasa' risilo, am buoi talu nganjam ra sumunu' no nangiou ilo ra tula am siminamba ra Tuhan, i Aki Kapuuno' nilo.

⁴ Giu' no mokoondo' pantas ondo' tinampos koson ra ulun ru Liwi. I Jisua, Bani, Kadmiil, Sibania, Buni, Siribia, Bani am Kinani minigor giu' ra rasawat ru pantas no. Nakiasi' ilo ra Tuhan, i Aki Kapuuno' nilo ra bolos matangil.

⁵ Sambayang ra orou raginio tinalimpuunan ru ulun ru Liwi ragitilo: I Jisua, Kadmiil, Bani, Gasabniya, Siribia, Godia, Sibania am Pitaya. Konilo, “Ibok kano bigor am mongompor ra Tuhan, i Aki Kapuuno' takau; omporo' Io ra sabubuoi no! Omporon inggalan Nano ondo' matulai kaga', inggalan ondo' matulai intor ra ngaangai' ompor!”

Pakiasian ra pangiawan ra tula

⁶ Kopongo raginio ulun ru Israil nakiasi' koson ragitio, “Iou Tuhan, Okou no rorondo' ayuk Tuhan; Okou nambaal ra butitin am titikop limbowon, Okou nambaal ra lantur am raat am ngaangai' ru suang nano; Okou nangani' ra kaayagan ra ngaangai' no. Ngaangai' kuasa' giu' ra limbowon kuku' samba Rirun; ilo ngai' minigulatur am kumuku' Rirun.

⁷ Iou Tuhan i Aki Kapuuno', Okou no ondo' nampili' ri Abram, am naningganai riso miningkual intor ra Ur giu' ra pagun ru Babilonia; Okou nangulau ra inggalan nano nasauk ri Abragam.

⁸ Natutunan Mu ra giminagaya' io Rirun, am nambaal Kou ra nabantuan riso. Binantu' Mu koson mangani' riso ra pagun ru ulun ru Kanaan, pagun ru ulun ru Git am ulun ru Amori, pagun ru ulun ru Piris, ulun ru Jibusi am ulun ru Girgasi, koson masauk ra intok ayanan ru papag nano. Sinugut Mu bantu' Muno sabap ra Okou matimpok am gumagaya'.

⁹ “Nakakito Kou ra kinamatuaan mai naimbolo' giu' ra Misir; Nokorongog Kou ra piau nilo makiindangan giu' ra Raat Galaga.

¹⁰ Nambaal Kou ra kaimuagan ondo' makaimuag, koson manggal ra raja', pagawai am mamagun ru raja', sabap ra Okou nakapandai ati kulaan ulun Muno inimbolo' nilo. Ginio ra inggalan Muno maayo kaga' saboi orou raiti'.

¹¹ Linapak Mu raat koson nambaal ra ralan ru ulun Muno mongoi ra sandaup, nangator Kou risilo ra sandaup nansail ra lonor ru raat ondo' mapua'. Ulun ondo' nangilou risilo nolosor giu' ra raat ondo' malandom, koson ilo ra batu ondo' liminosor giu' ra raat ondo' makalalaa'.

¹² Naningganai Kou risilo ra lugu' ru gaun paat ra matawang, Sinilau Mu ralan nilo ra lugu' ru apui paat ra molondom.

¹³ Intor ra limbowon timinuun Kou ra Gunung Sinai; Minindagu Kou ra ulun Muno galama'. Nangani' Kou risilo ra ukum, aturan am susuban ondo' matimpok, motopot am mokoonong.

¹⁴ Nangila' Kou risilo mangiantak ra orou Sabat ondo' mapasau no, am ondo' pinabala' galing ra ulipon Muno i Musa, nangani' Kou risilo ra ukum Muno.

¹⁵ “Paat ra ilo maitilan, ruti' intor ra limbowon pinaratu' Muno, paat ra ilo paason, timug intor ra batu pinaingkual Mu. Nanusub Kou risilo manguasa' ra tana' ondo' binantu' Mu noyo risilo.

¹⁶ Kaa' kinamatuaan mai bambalingatan am malilimbau, kalo giminagaya' ilo ra susuban Muno.

¹⁷ Marara' ilo gumagaya'; nalilianan nilo ngaangai' binaal Muno, am ngaangai' kaimuagan ondo' binaal Muno. Nabaya' ra limbau ilo nampili' sangulun tingganai, koson magibit risilo ra Misir, am nasauk saguli' ra ulipon. Kaa' Okou i Aki Kapuuno' ondo' mangampun; orot Muno maawar, makaasi' am motogom; asi' Muno maayo, am kalo nangiruan Kou risilo.

¹⁸ Nambaal ilo ra sinungkalalaing anak ru sapi', am minindagu ra sinungkalalaing no naningganai risilo miningkual intor ra Misir. Iou Tuhan, magasab ilo kaga' Rirun.

¹⁹ Kaa' kalo nangiruan Kou risilo giu' ra tana' kaagisan, sabap ra asi' Muno maayo kaga'! Kalo inalap Mu saguli' lugu' ru gaun kapoam lugu' ru apui ondo' nanulu' risilo ra ralan ra matawang am molondom.

²⁰ Sabap ra kinoonsoi Muno, nambala' Kou ramon ra atan ondo' musiti' baalon; nangani' Kou risilo ra manna koson ra akanon, nangani' Kou risilo ra timug koson ra inumon.

²¹ Buoi ru apat ngoopor ngambilor giu' ra tana' kaagisan, nangani' Kou risilo ra ngaangai' ondo' pakayon nilo. Bayang nilo kalo igondo' kalulumo, am kalayam nilo kalo maruol kapoam lumanit.

²² “Nangani' Kou risilo ra kamanangan ra masuang bansa' am pamarintaan ondo' nambalit ra pagun nilo. Kinala nilo pagun Gisybon ondo' pinarinta ru Raja' Sigon, am pamarintaan ru Raja' Og giu' ra pagun Basan.

²³ Nangani' Kou risilo ra masuang anak koson ra kinasuang ru butitin giu' ra limbowon, am nompoloso risilo nanguasa' ra tana', ondo' binantu' Mu noyo ra kinamatuaan nilo.

²⁴ Inayanan nilo pagun ru Kanaan; kinala Mu mamagun ru pagun raginio. Nangani' Kou ra ulun Muno ra kuasa' koson pamakuan ra mamagun am raja'-raja' ru Kanaan maya' ra kasagaan ru guang.

²⁵ Ulun Muno nampagaau ra bandar-bandar ondo' mokoondo' ra kubu, tana' ondo' malabung, am baloi-baloi ondo' nososok ra rapu', tulubong ondo' kinali noyo, puun ru jaitun, puun ru kikinawa' am niayuk umo ru anggur. Nalabaan ilo ra akanon saboi mongolomok; nakasia' ilo ra ngaangai' taak Muno ondo' moonsoi.

²⁶ Kaa' ulun Muno giminuor am kalo giminagaya' Rirun; tinalikuran nilo Taurat Muno. Pinatoi nilo nabi-nabi ondo' nampakara' risilo, am ondo' nanusub risilo sumaguli' Rirun. Ruruli' ilo magasab Rirun,

²⁷ saboi nompoloso Kou ra pantula' nangala am nanguasa' risilo. Paat ra kapaganan, nampiau ilo makiindangan Rirun; intor ra suruga', timinaam Kou risilo. Sabap ra makaasi' Kou nanusub Kou ra tingganai-tingganai, ondo' namayag risilo intor ra pantula'.

²⁸ Kaa' paat ra mamimio poyo pagun no, siminaguli' ilo makatula, am Okou pana nompoloso ra pantula' nangala risilo. Kaa' paat ra ilo timinalikur intor ra tula am nakitaak Rirun mamayag risilo, intor ra suruga' norongog Mu piau nilo; am ruruli' Kou namayag risilo sabap ra Okou maayo guang makaasi'.

²⁹ Nampakara' Kou maa' raginio gumagaya' ilo ra pangilaan Muno, kaa' nabaya' ra limbau inimpayan nilo ukum Muno. Alika ulun ondo' mambaal ra Taurat Muno mokoowot ra kaayagan, kaa' bambalingatan ilo, kalo gumagaya' am marara' rumongog.

³⁰ Bilor ka bilor, nabaya' ra orot nampakara' Kou risilo. Ambiluo Muno mindagu-dagu risilo ondo' pinabala' galing ra nabi-nabi Muli, kaa' sinilong ru ulun Muno talingo. Ginio ra nompoloso Kou risilo kinala ru bansa'-bansa' ra bokon.

³¹ Kaa', sabap ra Okou maayo kaga' guang makaasi', kalo nangiruan Kou kapoam namuso risilo. Okou i Aki Kapuuno' ondo' motogom am makaasi'!

³² “Iou i Aki Kapuuno', i Aki Kapuuno' mai ondo' maayo! I Aki Kapuuno' ondo' makakuasa' am matulai! Nabaya' ra gagaya' sinugut Mu ngaangai' nabantuan. Intor ra raja'-raja' ru Asyur nangimbolo' ramon, saboi raino kaimbalaan ondo' mailian mai maagat kaga'. Raja'-raja', tingganai-tingganai, imam-imam am nabi-nabi mai, kinamatuaan am ngaangai' ulun naimbolo' noyo. Karaa' noyo, iou Aki Kapuuno', mapara' poros ru kaimbalaan mai.

³³ Timbalos Muno matimpok koson mangukum ramon ondo' najamaran; Gumagaya' Kou, kabalu' pana makatula akai.

³⁴ Kinamatuaan mai, raja'-raja', imam-imam am tingganai-tingganai mai, kalo gumagaya' ra Taurat Muno. Kalo nampalio ilo ra susuban am pampakaraan Muno.

³⁵ Mabaya' ra barakat Muno raja'-raja' namarinta ra ulun Muno, paat ra ilo minayan giu' ra pagun ondo' malangka' am malabung, tana' tinaakan Muno. Kabalu' pana raginio kalo nangiruan ilo ra tula, marara' ilo mangandoi ayuk Rirun.

³⁶ Raino nasauk akai ra ulipon giu' ra pagun ondo' pinataak Muno, tana' ondo' malabung ti, ondo' nangani' ramon ra akanon.

³⁷ Raino ampos ru tana' mai ginaau ru raja'-raja' ondo' nanguasa' ramon; pinataak Mu akai ra raja'-raja'; raino ampos ru tana' mai ginaau ru raja'-raja'. Pamakuan nilo ramon am bibiag tinambiag mai maya' ra kasagaan ru guang nilo; inimbolo' akai kaga' am mangiluk guang!”

Siminain mamagun ra nabantuan

³⁸ Sabap ra ngaangai' ondo' nasauk no, akai ulun ru Israil nambaal ra nabantuan ondo' mapiot am tinulisan, am ondo' sinaapan ra segel ru tingganai-tingganai mai, ulun-ulun ru Liwi am imam-imam mai.