NIGIMIA 4 - Tanou Moonsoi Timugon

Nagula' ri Nigimia minanggal ra kandoi nano

¹ Pokorongog i Sanbalat ra akai ulun ru Jaudi nakatalimpuun noyo namuna' ra timbok ru bandar, siminangit io kaga' am tumalimpuun magasab ramon.

² Giu' ra saang ru rangan-rangan nano am pulalai ru saujor Samaria, indagu io, “Atan kia ondo' tatanga' baalon ru ulun ru Jaudi ra nausung ti? Makaguang ilo kia koson mambaal saguli' ra bandar ti? Nangkara' ilo kia ra ilo mampataak ra taak simbalui, maalap nilo kopongo kandoi no ralalom songorou? Makasauk ilo kia ra batu panambaloi intor ra tuntur ru ginsamol ondo' naumpo noyo?”

³ I Tobia ondo' minigor ra sapapa' ri Sanbalat, niayuk mindagu, “Timbok koson ra atan nua' mabaal nilo? Uku' ru kataunan pana makalunsai raginio!”

⁴ Aku pana pakiasi' boo, “Iou Aki Kapuuno', rongogo' ati kulaan ilo nagasab ramon! Polosoon nagasaban no makalumpa' ra inan nilo galama'. Polosoon ngaangai' rapu' nilo talingaawon, am polosoon ilo ibiton ra pagun ru ulun bokon koson ulun rinakop.

⁵ Pai' ampuno' kalaatan nilo, am pai' liliani' tula nilo, sabap nagasab ilo noyo ramon ondo' tatanga' mambaal ra timbok ti.”

⁶ Ginio ra narayus akai namuna' ra timbok. Kalo nabuoi raiti timbok no nopongo pinuna' saboi sampiruo intor ra sawat no, sabap ra mamagun nangandoi ra guang maantak.

⁷ Paat ri Sanbalat, i Tobia, ulun ru Arab, ulun ru Amon, am ulun ru Asdod nokorongog ra kandoi namuna' ra timbok ru Jirusalim no nakasingkot toojo, am ra luang-luang ra timbok no tinauban noyo, malasu' kaga' guang nilo.

⁸ Ginio ra naguguum ilo ngaangai' moogot mamulunsar ra Jirusalim am mambaal ra kajajawan.

⁹ Kaa' nakiasi' akai ri Aki Kapuuno' mai am nanusub ra ulun magalung ra bandar no intor ra pamulunsaran nilo, paat ra orou ti am rondom ti.

¹⁰ Ulun ru Jiuda pana tumalimpuun boo marimbai ra rimbai ragitio: “Malawo akai sabap nansaan ra ibit maagat, liliwa' ginsamol lakat poyo paribujuk. Kalo maikang akai mambaal ra timbok orou raiti'.”

¹¹ Indos ru pantula' mai am kalo makakito akai risilo kapoam makapandai ra baal ondo' nasauk saboi ra paat ilo namulunsar noyo ramon, am namatoi ramon am niayuk namutat ra kandoi mai.

¹² Kaa' ruruli', ulun ru Jaudi ondo' minayan mamaar ra pantula' mai matong mambala' ramon ra inatangan ru pantula' no ramon.

¹³ Ginio ra inukapan ku mamagun ra ilang, tutura' am panah. Pinaayan ku ilo maya' ra bansa' ru sigagama' giu' ra talikuron ru timbok, iono giu' ra intok-intok ondo' kalo poyo pinuna'.

¹⁴ Pakakito aku ra mangalaa' mamagun, indagu aku risilo, tingganai-tingganai am pagawai-pagawai nilo, “Pai' kalaa' ra pantula'. Karaa' mumpara' gayo am kinatulai ru Tuhan takau, am ingkotog kano gumula' tayar ru pabukat-pabukat min, anak andu' min am baloi-baloi min.”

¹⁵ Pantula' mai nokorongog ra inatang malaat nilo napandayan mai noyo. Ginio ra nakaliman ilo ri Aki Kapuuno' nanulang noyo ra inatangan nilo. Akai ngaangai' pana siminaguli' boo nangandoi namuna' ra timbok no.

¹⁶ Intor raginio sampiruo intor ra ulun-ulun kuno nangandoi am sampiruo poyo nagalung am nambayang ra bayang mangayou, naukop ra tutura', perisai am panah. Tingganai-tingganai maino nanungka' toojo risilo

¹⁷ ondo' namuna' ra timbok no. Mulu' poyo boo risilo ondo' nangkayang ra kuliamos pambabaal pana nangandoi ra sakalinduan, am nagibit ra kinandoi mangayou ra sakalinduan.

¹⁸ Moonong ulun ondo' nangandoi ralalom pambaalan nagibit ra rondo' ilang ondo' pinaabot ra awak nano. Ulun ondo' kandoi no manamput ra bujung koson tatandu' makalalaa' magail ra sapapa' kuno.

¹⁹ Indagu aku ra mamagun, pagawai-pagawai am tingganai-tingganai nilo, “Kandoi ti nakasimpung intok ra malangka', saboi natayar-tayar takau ra galur ru timbok ti, sangulun maalur intor ra bokon no.

²⁰ Ginio ra amon mokorongog kau ra bolos ru bujung, kataki' kano tumimung ra libung kutu. I Aki Kapuuno' ondo' mangayou ra bala takau.”

²¹ Koon raginio noyo akai mangandoi ra moonong orou, intor ra maar matawang saboi ra butitin-butitin mujak giu' ra limbowon. Sampiruo intor ra mamagun mangandoi mamuna' ra timbok, am sampiruo poyo magalung ra manantutura'.

²² Buoi ru ginio manusub aku ra ngaangai' ulun magalung am ngaangai' ru ulun mangindangan risilo soroi ra Jirusalim ra rondom ti, maa' raginio maalungan mai bandar ra rondom ti am mangandoi ra orou ti.

²³ Kalo inalus ku bayang kuti kabalu' pana rondom ti, am koon niayuk ra rangan-rangan kuno, ulun-ulun kuno, am ngaangai' ulun magalung raki'. Akai ngaangai' magail tumampos ra mampaguut ra kinandoi mai.