NIGIMIA 12 - Tanou Moonsoi Timugon

Suang ru inggalan ru imam-imam am ulun ru Liwi

¹ Gitio noyo suang ru inggalan ru imam-imam am ulun ru Liwi ondo' minuli' intor ra pamatiran nababaya' ri Jirubabil anak ri Sialtiil am Tingganai Maayo Imam i Jisua:

^2-7 Imam-imam: Siraya, Jirimia, Ijra, Amarya, Maluk, Gatus, Sikania, Rigum, Mirimot, Ido, Ginitoi, Abia, Miyamin, Maaja, Bilga, Simaya, Joyarib, Jidaya, Salu, Amok, Ilkia am Jidaya. Ilo tingganai ru gino ngai' imam bulintok ri Jisua.

⁸ Ulun ru Liwi: Ulun maningganai ra rimbai paringkuanangan: I Jisua, Binui, Kadmiil, Siribia, Jiuda am Matanya.

⁹ Ulun ra pulalai ru ulun maririmbai ondo' marimbai ra rimbai tumaam: I Bakbukia, Uni am ulun ru Liwi ra bokon.

Papag ru Tingganai Maayo Imam Jisua

¹⁰ Gitilo noyo suang ru papag ru Tingganai Maayo Imam Jisua: I Jisua ama' ri Joyakim; Joyakim ama' ri Ilyasib; Ilyasib ama' ri Joyada;

¹¹ Joyada ama' ri Jonatan; Jonatan ama' ri Jadua.

Tingganai-tingganai ru bansa' ru imam

^12-21 Paat ri Joyakim nasauk ra Tingganai Maayo Imam, gitilo noyo tingganai ru bansa' ru imam-imam: Imam Bansa' Miraya Siraya Gananya Jirimia Misulam Ijra Joganan Amarya Jonatan Miliku Jusup Sibania Adna Garim Gilkai Mirayot Jakaria Ido Misulam Giniton Jikri Abia … Minyamin Piltai Moaja Samua Bilga Jonatan Simaya Matnai Joyarib Uji Jidaya Kalai Salai Gibir Amok Gasabia Ilkia Nitaniil Jidaya

Imam Bansa' Tinulisan intor ra sasambaloi ru imam am ulun ru Liwi

²² Suang ru inggalan ru tingganai-tingganai ru imam am ulun ru Liwi binaal bulintok ra Tingganai Maayo Imam ragitio: I Ilyasib, Joyada, Joganan am Jadua. Suang ru inggalan raginio nopongo bulintok ri Darius nasauk ra raja' ru Pirsia.

²³ Kaa' suang ru inggalan ru tingganai-tingganai ru bansa' ulun ru Liwi polos ayuk ra bulintok ri Jonatan akupu ri Ilyasib.

Pantayaran ra kandoi giu' ra Baloi ru Tuhan

²⁴ Ralalom paningganayan ri Gasabia, Siribia, Jisua, Binui am i Kadmiil, ulun ru Liwi tinayar nasauk ra kukula' ngampulalai. Moonong igondo', mokoondo' ruo ngampulalai ondo' mangandoi mongompor ri Aki Kapuuno' am maringkuanang Riso ra balos mambalos, sumugut ra aturan ondo' tinaakan ru Raja' Daut, ulipon ri Aki Kapuuno'.

²⁵ Ulun-ulun magalung ra Baloi ru Tuhan ondo' pinangandoi koson magalung ra intok-intok pambulian ra ulaan mamaar ra kulobon garabang Baloi ru Tuhan iono i Matanya, Bakbukia, Obaja, Misulam, Talmon am Akub.

²⁶ Ngaangai' ulun no maayag bulintok ri Joyakim anak ri Jisua, akupu ri Jojadak am bulintok ru Gabenor Nigimia am Imam Ijra, ulun mapandai kaga' ra Taurat no.

Rinasmi ri Nigimia timbok ru bandar

²⁷ Kopongo rinasmi timbok ru bandar Jirusalim, ulun ru Liwi piniau minongoi ra giu' intor ra ngaangai' intok inayanan nilo, maa' raginio sumimpung ilo ra parasmian no am marimbai ra rimbai paringkuanangan, sumbayaan ru miujik gambus am jitor.

²⁸ Ulun-ulun maririmbai intor ra sasambaloi ru ulun Liwi minatong intor ra libung inayanan nilo ra liliut ru Jirusalim am intor ra pekan-pekan giu' ra liliut ru Nitopa,

²⁹ intor ra Bit-Gilgal, Giba am Asmawit.

³⁰ Imam-imam am ulun-ulun ru Liwi nampaugar ra upacara pamasawan ra tayar ru inan nilo galama', am tauli no ra tayar mamagun am niayuk tayar ra kulobon garabang am timbok ru bandar.

³¹ Nanimung aku ra tingganai-tingganai ru Jiuda giu' ra rasawat ru timbok am nangani' risilo ra kandoi maningganai ra ruo ngampulalai maayo koson mugar lumiput ra bandar no, liliwa' marimbai ra rimbai paringkuanangan ri Aki Kapuuno'. Pulalai ra kasaa' ngaangai' mugar giu' ra tampilon pamiris giu' ra rasawat ru timbok no, mongoi ra Kulobon Garabang Ginsamol.

³² I Gosaya minugar ra tauli ru ulun-ulun maririmbai, sunu' sampiruo intor ra tingganai ru Jiuda.

^33-35 Sampulalai imam ondo' nanamput ra bujung, minugar ra tauli nilo. Imam raginilo am i Ajaria, Ijra, Misulam, Jiuda, Binjamin, Simaya am i Jirimia. Siminunu' risilo i Jakaria anak ri Jonatan, akupu ri Simaya. (Kukula' ngaulun risilo kinamatuaan nano iono i Matanya, Mika am i Jakur intor ra bansa' Asap.)

³⁶ Siminunu' riso ulun ra bokon intor ra bansa' nano, iono i Simaya, Ajariil, Milalai, Gilalai, Maai, Nitaniil, Jiuda am i Ganani. Ilo ngaangai' nagibit ra kuliamos miujik, nogondo' ra ondo' kinuli ru Raja' Daut, ulipon ri Aki Kapuuno' no. Imam Ijra, ulun mapandai kaga' ra Taurat no, minugar pagulu ra ugar mababaya' ti.

³⁷ Giu' ra Kulobon Garabang Taur ru Timug, nagaloi ilo ra tukar ondo' sumuku' ra Bandar Daut. Nansail ilo ra istana ri Daut am saguli' ra timbok giu' ra Kulobon Garabang Timug, giu' ra tampilon sirangon ru bandar no.

³⁸ Pulalai ru ulun maririmbai ondo' rondo' poyo, minugar nababaya' giu' ra rasawat ru timbok no am sumuku' ra tampilon kait. Siminunu' aku risilo nababaya' ra sampiruo intor ra mamagun. Minugar nababaya' akai mansail ra Manara Makaapui saboi ra Timbok Mapila'.

³⁹ Intor ra giu' minugar nababaya' akai mansail ra Kulobon Garabang Ipraim, Kulobon Garabang Jisana, Kulobon Garabang Papait, Manara Gananil am Manara Maatus, saboi ra Kulobon Garabang Domba. Ugar mababaya' mai pinupusan mamaar ra Kulobon Garabang Pagalungan Baloi ru Tuhan.

⁴⁰ Karuo-ruo pulalai ru ulun maririmbai no nakasaboi ra libung Baloi ru Tuhan. Suai ra tingganai-tingganai ondo' nababaya' raki',

⁴¹ imam ragitilo niayuk minaya' ra pulalai kuno: I Iliakim, Maasiya, Minyamin, Mika, Ilyoinai, Jakaria am Gananya. Ilo ngaangai' nanamput ra bujung.

⁴² Siminunu' risilo i Maasiya, Simaya, Iliajar, Uji, Joganan, Malkia, Ilam am i Ijir. Ulun-ulun maririmbai ondo' tiningganai ri Jijragia narimbai ra bolos matangil.

⁴³ Paat ra orou raginio masuang taak simbalui pinataak ri Aki Kapuuno'. Naansukan mamagun sabap ri Aki Kapuuno' nambaal risilo naansukan. Bala ru ruandu' am lalaing niayuk minaya' naansukan, am bolos nilo morongog saboi ra maalur.

Pataakon ra inaru' tayar ru sambayang giu' ra Baloi ru Tuhan

⁴⁴ Paat raginio, kukula' ngaulun sinusub magalung ra intok-intok pambulian ra ulaan giu' ra Baloi ru Tuhan. Ulaan no nakaaya' taak sampiopor am unor-unor am niayuk kikinawa' ondo' kasaa' naansak ra moonong bilor. Ngaangai' ulun no linansanan manimung ra pataakon intor ra ulun-ulun magitanom giu' ra liliut ru bandar ra tayar ru imam-imam am ulun-ulun ru Liwi, koson ra nanusuban ru Taurat. Ngaangai' mamagun ru Jiuda mangurumat ra imam-imam am ulun-ulun ru Liwi,

⁴⁵ sabap ra pinaugar nilo upacara pamasawan am upacara-upacara ra bokon ondo' sinusub ri Aki Kapuuno'. Ulun mangkuli ra miujik am ulun magalung ra Baloi ru Tuhan pana nambaal ra kandoi nilo sumugut ra aturan ru Raja' Daut am i Salomo anak nano.

⁴⁶ Intor ra bulintok ru Raja' Daut am i Asap mangkukuli ra miujik ra galing i poyo, ulun-ulun maririmbai no narimbai ra rimbai mongompor am rimbai paringkuanangan ri Aki Kapuuno'.

⁴⁷ Bulintok ri Jirubabil am niayuk bulintok ri Nigimia, ngaangai' mamagun ru Israil nampataak ra taak moonong orou koson ra kaukapan ru pakuan moonong orou ru ulun-ulun maririmbai am ulun-ulun magalung ra Baloi ru Tuhan. Mamagun nampataak ra taak ondo' luntukon ra ulun ru Liwi, am ulun ru Liwi boo mangani' ra tayar ondo' paluntukon ra imam-imam.