NIGIMIA 11 - Tanou Moonsoi Timugon

Mamagun ru Jirusalim

¹ Tingganai-tingganai ondo' namagun giu' ra Jirusalim, am mamagun ondo' musiti' mangundi' koson mampili' ra sambaloi intor ra moonong mopor sasambaloi. Ilo ondo' mapili' musiti' mayan giu' ra Jirusalim bandar ondo' mapasau no, liliwa' ondo' kalo mapili' mayan giu' ra bandar-bandar am ngaangai' pekan ra bokon.

² Mongompor mamagun ra ulun ra ilo po ngai' ondo' masaga' mayan giu' ra Jirusalim.

³ Giu' ra ngaangai' pekan am bandar-bandar ra bokon, mamagun ru Israil, imam-imam, ulun-ulun ru Liwi, ulun-ulun mangandoi ra Baloi ru Tuhan, am papag ru ulipon-ulipon ri Salomo mayan giu' ra bandar am giu' ra tana' ru sigagama'. Gitio noyo suang ru inggalan ru ulun maatang intor ra wilayah Jiuda ondo' mayan giu' ra Jirusalim:

⁴ Intor ra bansa' ru Jiuda: I Ataya anak ri Ujia, iono akupu ri Jakaria. Kukula' ngaulun ra kinamatuaan nano am i Amarya, i Sipatia am i Magalaliil, iono papag ri Piris anak ungkuyon ri Jiuda.

⁵ I Maasiya anak ri Baruk, akupu ri Kolgoji. Kukula' ngaulun ra kinamatuaan nano am i Ajaya, Adaya, Joyarib am Jakaria iono papag ri Syila, anak ungkuyon ri Jiuda.

⁶ Suang 468 ngaulun ra mapanggol kaga' intor ra papag ri Piris, minayan giu' ra Jirusalim.

⁷ Intor ra bansa' ru Binjamin: I Salu anak ri Misulam, akupu ri Joid. Kukula' ngaulun ra kinamatuaan nano am i Pidaya, Kolaya, Maasiya, Itiil am Jisaya.

⁸ I Gabai am i Salai: ilo mamaar pabukatan ri Salu. Ngaangai' nilo suang no 928 ngaulun intor ra bansa' Binjamin ondo' minayan giu' ra Jirusalim.

⁹ Tiningganai ilo ri Joil anak ri Jikri am ulun lansanin nano, i Jiuda anak ri Gasinua.

¹⁰ Intor ra imam-imam: I Jidaya anak ri Joyarib am i Jakin.

¹¹ I Siraya anak ri Ilkia, akupu ri Misulam. Kukula' ngaulun ra kinamatuaan nano am i Jadok, Mirayot am Agitub ondo' nasauk ra Tingganai Maayo Imam.

¹² Ngaangai' ru suang nilo 822 ngaulun imam ondo' mangandoi giu' ra Baloi ru Tuhan. I Adaya anak ri Jigoram, akupu ri Pilalya. Kukula' ngaulun ra kinamatuaan nano iono i Amji, Jakaria, Pasyur am Malkia.

¹³ Ngaangai' ru suang nilo 242 ngaulun ondo' nasauk ra tingganai ru sasambaloi intor ra bansa' raginio. I Amasai anak ri Asariil, akupu ri Ajai. Kukula' ngaulun ra kinamatuaan nano am iono i Misilimot am i Imir.

¹⁴ Intor ra bansa' ragitio mokoondo' 128 ngaulun saujor ondo' mapanggol kaga'. Tingganai nilo am i Jabdiil anak ri Gidolim.

¹⁵ Intor ra ulun ru Liwi: I Simaya anak ri Gasub, akupu ri Ajrikam. Kukula' ngaulun ra kinamatuaan nano am i Gasabia am i Buni.

¹⁶ I Sabitai am i Jojabad, ruo ngaulun Liwi ondo' maatang ondo' magalung ra kandoi giu' ra liwar Baloi ru Tuhan.

¹⁷ I Matanya anak ri Mika, akupu ri Jabdi, papag ri Asap. Io no tingganai ru ulun-ulun maririmbai giu' ra Baloi ru Tuhan paat marimbai ra pakiasian paringkuanangan. I Bakbukia, iono mangindangan ri Matanya. I Abda anak ri Samua, akupu ri Galal am papag ri Jidutun.

¹⁸ Ngaangai' ru suang nilo 248 ngaulun ru Liwi ondo' mayan giu' ra Jirusalim, bandar mapasau no.

¹⁹ Intor ra ulun magalung ra Baloi ru T UHAN: I Akub, Talmon am rangan-rangan nilo ra suang no 172 ngaulun.

²⁰ Mamagun ru Israil, imam-imam am ulun-ulun ru Liwi ondo' soroi no minayan giu' ra tana' nilo galama' giu' ra bandar-bandar am ngaangai' pekan giu' ra Jiuda.

²¹ Ulun-ulun mangngandoi giu' ra Baloi ru Tuhan minayan giu' ra bandar Jirusalim ondo' intok no sabiton ra Opil. Mangandoi ilo ra ondo' tiningganai ri Jiga am Gispa.

²² Ulun magalung ra ulun ru Liwi ondo' minayan giu' ra Jirusalim iono i Uji anak ri Bani, akupu ri Gasabia. Kukula' ngaulun ra kinamatuaan nilo iono i Matanya am Mika intor ra bansa' ru Asap, iono bansa' ondo' kandoi no manalingapu ra miujik paat ra sambayang giu' ra Baloi ru Tuhan.

²³ Aturan ru raja' nangaru' ra paat ru moonong bansa' ondo' manalingapu ra miujik giu' ra Baloi ru Tuhan ra moonong orou.

²⁴ I Pitaya anak ri Misgijabil intor ra bansa' ru Jira ralalom bansa' ru Jiuda, nasauk ra uakil ru bansa' ru Israil giu' ra istana ru raja' ru Pirsia.

Mamagun ru bandar am pekan ra bokon

²⁵ Masuang ulun minayan giu' ra ngaangai' pekan ondo' mamaar ra umo nilo. Kukula' ngaulun intor ra bansa' ru Jiuda minayan giu' ra Kiryat-Arba, Dibon, Jikabjiil am giu' ra ngaangai' pekan giu' ra liliut ru bandar-bandar no.

²⁶ Ilo niayuk minayan giu' ra bandar Jisua, Molada, Bit-Pilit,

²⁷ Gajar-Sual, Birsyiba am giu' ra pekan-pekan ra liliut no.

²⁸ Minayan ilo giu' ra bandar Jiklag, giu' ra Mikona am giu' ra pekan-pekan ra giu' no;

²⁹ giu' ra In-Rimon, Jora, Jarmut,

³⁰ Janoa, Adulam am giu' ra pekan-pekan maar ra bandar-bandar no. Minayan ilo giu' ra Lakgis am giu' ra umo-umo ra liliut no, giu' ra Ajika am giu' ra pekan-pekan ra liliut no. Koon raginio noyo ulun ru Jiuda minayan giu' ra tana' pangkilolot ru Birsyiba giu' ra rabugus am Limayak Ginom giu' ra ralayo.

³¹ Santayaran ra ulun intor ra bansa' ru Binjamin minayan giu' ra Giba, Mikmas, Ai, Bitil am giu' ra pekan-pekan ra liliut no;

³² giu' ra Anatot, Nob, Ananya,

³³ Gajor, Rama, Gitaim,

³⁴ Gadid, Jiboim, Nibalat,

³⁵ Lod, Ono am giu' ra Limayak Tukang.

³⁶ Kukula' ngampulalai ulun ru Liwi ondo' minayan giu' ra tana' ru Jiuda sinusub manding ra tana' ru Binjamin am minayan simpung ra mamagun ra giu' no.