NIGIMIA 10 - Tanou Moonsoi Timugon

¹ Ulun kasaa' ondo' siminain raginio iono Gabenor Nigimia anak ri Gakalia. Baya' boo i Jidikia, am tauli ti ulun ragitilo:

^2-8 Imam-imam: Siraya, Ajaria, Jirimia, Pasyur, Amarya, Malkia, Gatus, Sibania, Maluk, Garim, Mirimot, Obaja, Danil, Giniton, Baruk, Misulam, Abia, Miyamin, Maajia, Bilgai am Simaya.

^9-13 Ulun ru Liwi: Jisua anak ri Ajanya, Binui papag ru bansa' ru Ginadad, Kadmiil, Sibania, Godia, Kilita, Pilaya, Ganan, Mika, Rigob, Gasabia, Jakur, Siribia, Sibania, Godia, Bani am Bininu.

^14-27 Tingganai-tingganai ru mamagun: Paros, Pagat-Moab, Ilam, Jatu, Bani, Buni, Ajgad, Bibai Adonia, Bigwai, Adin, Atir, Gijkia, Ajur, Godia, Gasum, Bijai, Garip, Anatot, Nibai, Magpias, Misulam, Gijir, Misgijabil, Jadok, Jadua, Pilatia, Ganan, Anaya, Gosia, Gananya, Gasub, Galogis, Pilga, Sobik, Rigum, Gasabna, Maasiya, Agia, Ganan, Anan, Maluk, Garim am Baana.

Nabantuan maatang

²⁸ Akai, mamagun ru Israil, imam-imam, ulun-ulun ru Liwi, ulun magalung ra Baloi ru Tuhan, ulun-ulun maririmbai, am ulun-ulun mangandoi giu' ra Baloi ru Tuhan, nababaya' ra andu' am anak mai ondo' nasukor koson makarati' ra baal ti, am niayuk ngaangai' ulun ondo' gumagaya' ra ukum ri Aki Kapuuno' ondo' siminuai noyo intor ra ulun bansa' ra bokon ondo' minayan ra pagun mai,

²⁹ minaya' ra tingganai-tingganai mai am nagibot ra maayag akai sumugut ra ukum ri Aki Kapuuno' ondo' tinaakan Nano ondo' pinabala' galing ri Musa. Magibot akai koson gumagaya' ra ngaangai' susuban ondo' tinaakan ramon ru Tuhan, iono Tuhan mai; nagibot akai koson gumagaya' ra ngaangai' ukum am aturan Nano.

³⁰ Magibot akai kalo matagandu' ra ulun bansa' ra bokon ondo' minayan ra pagun mai.

³¹ Amon ru ulun bansa' ra bokon matong mantalan ra gandum kapoam atan ayuk ramon paat ra orou Sabat, kapoam paat ra orou-orou mapasau ra bokon, kalo balion mai intor risilo. Paat ra moonong bilor katulu', kalo mantanom akai ra umo, am ngaangai' utang pusoon mai.

³² Moonong bilor akai sigagama' mangani' limo ngagram pirok koson balanja' ra Baloi ru Tuhan.

³³ Paatangon mai kalalair kuliamos pakayon ragitio koson sambayang giu' ra Baloi ru Tuhan: ruti' pasulungon, taak simbalui moonong orou, iono taak simbalui ra paringkuanangan am bibiag tinambiag ondo' taak simbalui koson mapabansuk ra guang ru Tuhan, am niayuk taak mapasau paat ra orou Sabat, Pangiantakan Sila' Bagu, am niayuk pangiantakan ra bokon, taak-taak mapasau ra bokon, taak-taak simbalui ondo' mangampun ra tula ru Israil, am atan ayuk ondo' makapakuan ra Baloi ru Tuhan.

³⁴ Moonong bilor akai mamagun ru Israil, imam-imam am ulun-ulun ru Liwi magugundi' koson mangaru' ra bansa' ra ati ondo' musiti' mangalap ra luton koson monolob ra taak simbalui ondo' pataakon ra Tuhan, i Aki Kapuuno' mai, sumugut ra aturan ru Taurat.

³⁵ Moonong bilor magibit akai ra unor-unor ondo' kasaa' kinumos am kikinawa' ondo' kasaa' naansak intor ra puun, ra Baloi ru Tuhan.

³⁶ Ibiton mai anak ungkuyon mai ondo' katuaan ra imam giu' ra Baloi ru Tuhan. Giu' no anak raginio pataakon ri Aki Kapuuno' sumugut ra aturan ru Taurat. Pataakon mai niayuk anak kasaa' ru sapi', anak kasaa' ru kambing kapoam anak kasaa' ru domba.

³⁷ Ibiton mai tapung ondo' makata' ondo' binaal intor ra unor-unor ondo' kasaa' kinumos ra moonong bilor, am niayuk taak ra bokon ondo' ginio am wain, umau jaitun, am niayuk ngaangai' salinut ru kikinawa'. Ngaangai' no taakin mai ra imam-imam ondo' giu' ra Baloi ru Tuhan. Aniin mai sampiopor ra ramon no ra ulun ru Liwi ondo' mangumung ra taak sampiopor giu' ra intok-intok pagitanaman no, iono sampiopor intor ra ampos ru tatanom ondo' tumuu' giu' ra umo mai.

³⁸ Sangulun imam papag ri Arun musiti' mabaya' ra ulun ru Liwi bulintok taak sampiopor no umungon. Ulun ru Liwi musiti' mambuli sampiopor intor ra ngaangai' taak sampiopor no giu' ra ralalom ru intok-intok pambulian ra ulaan giu' ra Baloi ru Tuhan.

³⁹ Ulun ru Israil am ulun ru Liwi musiti' magibit ra taak simbalui kaunaran, wain am umau jaitun ondo' inumung no ra intok-intok pambulian ra ulaan, iono giu' ra intok pambulian ra kuliamos Baloi ru Tuhan. Giu' no niayuk intok ayanan ru imam-imam ondo' tatanga' mangandoi, ulun-ulun magalung ra Baloi ru Tuhan, am ulun-ulun maririmbai giu' ra Baloi ru Tuhan. Marara' akai mangimpai ra Baloi ru Tuhan mai.