NAGUM 2 - Tanou Moonsoi Timugon

Karatuan ru bandar Niniwi

¹ Okou Niniwi, tatanga' kou bulunsaron! Ondo' makakuasa' manutuk rirun nakaratong noyo! Alungi' kubu-kubu sindungan! Pagilai' ralan-ralan! Tampos kano mangayou. (

² Katakion ru Tuhan mapatapuli' ra kaantakan ru Israil, saboi koson ragili, ra ilo kalo poyo tinakawan ru pantula'.)

³ Saujor ru pantula' nagibit ra perisai malia', am nambayang ra bayang sarampun makabatik malia'. Pantula' nakatampos noyo mamulunsar! Koson ra apui, kurita' kuda nilo manguliat! Kuda nilo tumindak-tindak!

⁴ Giu' ra ralan-ralan, kurita' kuda magisimbul ra kalo maaruan angayan, mugar giu' am giti giu' ra padang ru bandar. Kurita' kuda mapaang koson ra pilasut, mugar maribok koson ra ganit.

⁵ Pagawai ru saujor susubon jumalai; makasaru ilo paat ra mugar. Ulun mamulunsar mugar ra maribok sumuku' ra timbok, mampaatang ra kuliamos pomopol ra timbok.

⁶ Kulobon-kulobon ru timug giu' ra kiing ru sungoi naukab; am mangalaa' ngaangai' ulun giu' ra istana.

⁷ Ulun mamulunsar namparakop ra andu' raja', ulipon-ulipon ruandu' nano mampalaa koson ra susuit asang, luluntug ra kubab sabap ra mangiluk guang.

⁸ Mamagun ru Niniwi masimbul mingkual intor ra bandar koson ra timug mingkual intor ra ombon ondo' naabak. Morongog golok, “Longgo'! Longgo'!” kaa' kolondo' sangulun pana ondo' masaga' sumaguli'.

⁹ Gaawo' noyo pirok! Gaawo' noyo mas! Nososok bandar ra masuang rapu'!

¹⁰ Napuso noyo Niniwi, nokoloso am masiluk. Sabap ra malaa', nagiru' ambiluo ru ulun; atur monontol, kalo maikang; ngaangai' ulun mabula' bulos.

¹¹ Ati kia bandar no raino? Bandar ondo' koson ra luang batu intok ru singa' manabunsut; intok ru anak-anak ru singa' aniin ra akanon, intok sukuan ru singa' ungkuyon am singa' ruandu', intok ondo' moonsoi ra tayar ru anak-anak ru singa'.

¹² Mansaam singa' ra ondo' akanon nano, am kual nano binsangon no koson akanon ru singa' ruandu' am anak nano. Sosokon ru singa' luang batu nano ra binsang ru kual ru ondo' sinaam nano.

¹³ Mindagu Tuhan Ondo' Maayo Kaga' kuasa', “Pantula' muno Aku. Solobon Ku kurita' kuda muno saboi mapuso. Saujor-saujor muno potoyon ralalom pangayawan, am alapon Ku ngaangai' no ondo' ginaau min intor ra ulun bokon. Sika'-sika' ru ulun-ulun sinusub min kalo boo morongog.”