MIKA 7 - Tanou Moonsoi Timugon

Kolondo' boo paliso moonsoi ru Israil

¹ Kolondo' boo kalansanan! Koson aku ra ulun maitilan ondo' kalo nakatuum ra kawa' ra puun kapoam kawa' ru anggur ra puun nano. Ngaangai' kawa' ru anggur am kawa' ru puun ara ondo' maamis inupu' noyo koyoo'.

² Kolondo' boo ulun mabanis guang ralalom ru pagun; kolondo' boo ulun ondo' gumagaya' ri Aki Kapuuno'. Moonong ulun maginaa ra kaluagan no koson mamatoi. Moonong ulun mampatoi ra bansa' nano galama'.

³ Ngaangai' ilo mapandai mambaal ra kalaatan. Ngaangai' pagawai am akim makitaak ra rasua. Ulun ondo' mauligan toojo mampajajal ra atan gogoton ru guang nilo. Ginio ra maguguum ilo koson mambaal raginio.

⁴ Ondo' moonsoi toojo pana am mabanis guang intor risilo pana koson bulungkut ru ruui ondo' kolondo' onong. Nasuku' noyo bulintok nano ri Aki Kapuuno' mangukum ra ulun ragitio, koson ondo' pinakara' No risilo ondo' pinabala' galing ra nabi-nabi Nano. Raino nasauk noyo kajajawan ralalom nilo.

⁵ Pai' no pangintopot ra sambalayan min kapoam rangan min. Ilalain ra mindagu, kabalu' pana ra andu' muno.

⁶ Bulintok ragitio lalaing ungkuyon magasab ra ama' nilo; lalaing ruandu' manggal ra ina' nilo. Anak mangiwan ra ruandu' mansangor ra iwan ruandu' nilo. Pantula' ru sasangulun iono intor sasambaloi nilo galama'.

⁷ Kaa' maginaa aku ra Tuhan; malansan aku ri Aki Kapuuno' ondo' mamayag raki'. Mangkirongog i Aki Kapuuno' kuno ra pakiasian kuno.

Mamayag Tuhan ra ulun Nano

⁸ Pantula' takau kolondo' sasaban koson makaansuk ra naratuan takau. Kabalu' pana maratu' takau, kaa' tumirong takau saguli'. Raino soroi takau ralalom kalandaman, kaa' Tuhan mansilau ritakau.

⁹ Natulaan takau ra Tuhan. Ginio ra musiti' mansaan ra sangit Nano ra kalo mantilayun. Kaa' pupus nano sumaung Io ritakau am mangani' ritakau ra katimpakan. Magibit Io ritakau mingkual mongoi ra sinda, am makaliman takau ra pamayagan ru Tuhan.

¹⁰ Paat raginio pantula' takau makakito ra baal ondo' binaal ru Tuhan ritakau, am ilo pana tauyuon. Ilo no pantula' magagasab ritakau ragili am mindagu, “Ati boo Tuhan, i Aki Kapuuno' mino?” Magilong takau risilo kalaan am kikinjangin koson ra losok giu' ra ralan.

¹¹ Mamagun ru Jirusalim kau ngai', bulintok koson mambaal saguli' ra timbok-timbok ru bandar nasuku' noyo. Paat raginio intok min kalangkaan.

¹² Mamaguli' ulun min intor ra ati ayuk intok – intor ra sirangon ru Asyur am rabugus ru Misir, intor ra tana' ru Sungoi Iprat, intor ra sandaup ru raat, am intor ra kagunungan ondo' maalur.

¹³ Kaa' tana' ti masauk ra tana' mapua' sabap ra kalaatan ru mamagun nano.

Makaasi' Tuhan ra Israil

¹⁴ Iou Tuhan, alungi' noyo ulun Muno, ulun ondo' pinili' Muno. Kabalu' pana maalur inayanan nilo giu' ra tana' kaagisan, mokoondo' niayuk tana' ondo' malabung ra liliut nilo. Polosoo' noyo ilo makaalap ra akanon giu' ra padang-padang sakot ru Basan am Giliad, koson ondo' binaal nilo ra galing i.

¹⁵ Baalo' noyo ramon kaimuagan-kaimuagan, iou Tuhan, koson ondo' binaal Muli ra galing i, paat ra Okou nagibit ramon miningkual intor ra Misir.

¹⁶ Makakito bansa'-bansa' no ra baal raginio am mauyu' sabap malimanan nilo ra kaikangan nilo kolondo' toojo arati'. Ilo kalo boo makaindagu am kalo mokorongog sabap ra kalo makabaal ra atan ayuk.

¹⁷ Mundus ilo koson ra kukuo ra rasawat ru kaau. Mingkual ilo intor ra kubu nilo am monontol, am mabaya' ra laa' matong ilo Rirun, Tuhan, i Aki Kapuuno' mai.

¹⁸ Iou Tuhan, kolondo' koson Rirun. Mangampun Kou ra tula ru ulun ondo' lakat poyo maayag. Kalo sumangit Kou ra sabubuoi no, kaa' masaga' Kou manulu' ramon ra togom Muno ondo' mantilayun.

¹⁹ Makaasi' Kou poyo ramon. Kikinjangin Mu tula mai am patirin Mu ginio ra lonor ru raat!

²⁰ Mampakito Kou ra gagaya' Muno am togom Muno ondo' mantilayun ra ngaangai' ulun Muno, papag ri Abragam am Jakub, koson ondo' binantu' Muli ra kinamatuaan mai ra galing i.