MIKA 6 - Tanou Moonsoi Timugon

Panguwan ru Tuhan ra Israil

¹ Rongogo' noyo atan ondo' panguwan ru Tuhan ra Israil. Kakat noyo, iou Tuhan, am raguo' noyo pabalaan Muno. Polosoo' noyo gunung am bulur mokorongog ra atan ondo' masaga' Muno paraguon.

² Gunung kau ngai', puun ru tana' ondo' mantilayun, rongogo' noyo ondo' pabalaan ru Tuhan! Tuhan mokoondo' ra baal ra ulun Nano am magibit Io ra panguwan ra Israil.

³ Indagu Tuhan, “Ulun Ku ngai', atan nua' binaal Kuno ramuyun? Ralalom ru baal atan nua' nantipagon Aku ramuyun? Taamo' noyo.

⁴ Akau inibit Ku miningkual intor ra Misir. Namayag Aku ramuyun intor ra inulipon. Nanusub Aku ri Musa, i Arun, am i Miriam koson maningganai ramuyun.

⁵ Ulun Ku ngai', karaa' noyo atan inatangan ri Balak, raja' ru Moab no ramuyun, am taam ri Biliam anak ri Bior riso. Karaa' noyo kasaukan-kasaukan ondo' nasauk ralalom pangkiralanan intor ra pangkiman giu' ra Sitim saboi ra Gilgal. Karaa' noyo baal-baal raginio, am akau pana makaliman ra atan ondo' binaal Kuno koson mamayag ramuyun.”

Taak ondo' mampabansuk ra guang ru Tuhan

⁶ Atan nua' pataakon kuno ra Tuhan, i Aki Kapuuno' giu' ra suruga', paat ra aku matong sumamba Riso? Musiti' kia magibit aku ra anak ru sapi' ondo' moonsoi toojo am solobon io koson ra taak simbalui pataakon Riso?

⁷ Mangapu kia Tuhan amon pataakon ku Riso kukula' ngaribu domba, kapoam umau jaitun ondo' masuang kaga'? Musiti' kia pataakon ku Riso lalaing katuaan kuno sabap ru tula kutu?

⁸ Topot-topot kalo! Nambala' noyo Tuhan ritakau ra atan ondo' moonsoi. Baal ondo' kitaakon toojo ru Tuhan intor ritakau iono maa' raginio mambaal takau ra matimpok, masalok mangimaya' ra katagaman, am mabaya' ra guang minggana' maayag masimpung ri Aki Kapuuno' takau.

⁹ Mapintar noyo ulun ondo' malaa' ra Tuhan. Mampiau Tuhan ra mamagun ru bandar, “Rongogo' noyo, akau ondo' timinimung ra bandar.

¹⁰ Giu' ra baloi ru ulun malaat mokoondo' ra rapu' ondo' noowot ra pamparuungan. Nampakai ilo ra tutuku' kalo motopot, rondo' baal ondo' kasisangan Kuno. Ulun ondo' mambaal raginio ukumin Kuno.

¹¹ Ati kulaan lair Aku makapangampun ra ulun ondo' nampakai ra tutuku' am timbangan kalo motopot?

¹² Ulun langkaya' ra gino ngai' min mangimbolo' ra ulun musikin; akau ngaangai' magabau.

¹³ Ginio ra nakatalimpuun aku noyo mampalamba' am mamuso ramuyun sabap ru tula min.

¹⁴ Mangakan kau, kaa' kalo maasug; maitilan kau ayuk. Mantakou kau ra kuliamos, kaa' kalo mabulian min. Ngaangai' atan ondo' pinauli min pusoon Ku ralalom ru pangayawan.

¹⁵ Mantanom kou ra gandum, kaa' kalo makumos min. Mambaal kau ra umau intor ra kawa' ru jaitun, kaa' kalo mapakai min umau no. Mambaal kau ra wain, kaa' kalo mainum min ginio.

¹⁶ Baal ragitio masauk sabap minaya' kau ra baal malaat ru Raja' Omri, am anak nano, Raja' Agab. Minaya' kau ra aturan ondo' inaru' nilo. Ginio ra mamuso Aku ramuyun, am ngaangai' ulun magasab ramuyun. Ulun giu' ra ati ayuk intok masisang ramuyun.”