MIKA 5 - Tanou Moonsoi Timugon

Sangulun panguasa' binantu' ri Aki Kapuuno'

¹ Indagu Tuhan, “Okou Bitligim Iprata, okou rorondo' bandar ondo' boborok kaga' giu' ra pagun ru Jiuda, kaa' intor rirun aniin Ku Israil ra sangulun panguasa'; intor ru kinamatuaan nano timinalimpuun intor ra galing i ayuk poyo.”

² Ginio ra nompoloso Tuhan ra ulun Nano kinuasa' ru pantula' saboi ruandu' ondo' maganak no makapaganak ra anak ungkuyon nano. Kopongo raginio ulun ralalom pamatiran tumimung saguli' mabaya' ra bansa' nilo.

³ Pakasuku' panguasa' no, mamarinta io ra mamagun nano mabaya' ra kaikangan am kuasa' intor ra Tuhan, i Aki Kapuuno' galama'. Mamagun nano maayag ra makakaansayan sabap ra ngaangai' bansa' ra tana' ti mangiou ra katulayan nano,

⁴ am mamparatong io ra kaansayan. Paat ra ulun ru Asyur namulunsar ra pagun takau am namandak ra pangampin takau, nanusub takau ra tingganai-tingganai ondo' maikang kaga' koson gumula' risilo.

Pampalabusan am ukuman

⁵ Mabaya' ra kaikangan ru kinandoi mangayou, kalaan nilo Asyur, tana' ru Nimrod, am mamayag ilo ritakau intor ra pamulunsaran ru ulun ru Asyur paat ilo namulunsar ra wilayah takau.

⁶ Ulun ru Israil ondo' lakat poyo maayag masauk koson ra bolobou masimu' intor ra Tuhan koson pataakon ra masuang bansa'; am koson rasam timinias ra tutuu'. Malansan ilo ri Aki Kapuuno' am sala' ka ulun.

⁷ Ilo ondo' lakat poyo maayag ra gino ngai' ru bansa'-bansa' ru bokon masauk koson ra singa' ondo' maguyum ra akanon giu' ra kataunan kapoam giu' ra padang ru sakot; siminubol singa' no ra tatanga' ru domba-domba, nansaam am niayuk bibinsango' domba; kolondo' sangulun pana makapamayag ra domba-domba no.

⁸ Kalaan ru Israil pantula' nilo am mamuso risilo ngaangai'.

⁹ Indagu Tuhan, “Paat raginio mampagaau Aku ra kuda min am pusoon Ku kurita' kuda min.

¹⁰ Pusoon Ku bandar-bandar ra pagun min am tuyason ku pangampinan min.

¹¹ Pusoon Ku jimat mino am inggion Ku ngaangai' ulun mapandai mangilong min.

¹² Pusoon Ku sinungkalalaing min am batu pangkaraan ondo' sambaan min. Kalo boo sumamba kau ra kuliamos-kuliamos ondo' binaal min galama'.

¹³ Tuyason ku ngaangai' sinungkalalaing Dewi Asyira giu' ra pagun min am pusoon Ku bandar-bandar min.

¹⁴ Ralalom ru sangit Kuno ondo' najanjayan mansuli' Aku ra kalaatan ru ngaangai' bansa' ondo' kalo gumagaya' Raki'.”