MIKA 3 - Tanou Moonsoi Timugon

Mononsol i Mika ra ngaangai' tingganai ru Israil

¹ Rongog kano, panguasa' ru Israil kau ngai'! Akau musiti' no mampalio ra katimpakan,

² kaa' masisang kau ra kaansayan am masaga' ra kalaatan. Ngaangai' bansa' Kuno iningkulitan min, am bininsang kual nilo intor ra bungul.

³ Tinolon min ngaangai' bansa' Kuno. Iningkulitan min ilo am pinandak min bungul nilo. Kual nilo tinotok min koson ra akau monotok ra kual ondo' ansakon ralalom ru pagangan ru tana'.

⁴ Nasaboi noyo paat ra akau mampiau ra Tuhan, kaa' kalo tumaam Io. Kalo mangiou Io ra pakiasian min, sabap nambaal kau noyo ra kalaatan.

⁵ Ulun Kuno rinuung ru nabi-nabi ondo' nambantu' ra kaansayan ra ulun ondo' nangani' risilo ra ruit, kaa' nompololob am nakimantula' ra ulun ondo' kalo nangani' ra atan-atan. Indagu Tuhan ra nabi-nabi no,

⁶ “Nabi kau ngai', pupus ru kaayagan min mamaar noyo. Orou masauk molondom ramuyun. Ginio sabap ra akau nampalayau ra ulun Kuno, kalo makaapu kau ra pinaintalang kapoam pakitanan. Kalo boo makapanala' kau ra atan-atan ayuk.”

⁷ Ulun ondo' nanala' ra orou rumatong tinauyu' sabap nanala' ilo ra kalo motopot. Ngaangai' ilo asabin sabap i Aki Kapuuno' kalo tumaam risilo.

⁸ Kaa' ra aku, Tuhan nanikop raki' ra kuasa' am Ambiluo Nano. Nangani' Io raki' ra arati' ru katimpakan, am niayuk kinabaani koson mambala' ra ulun ru Israil intor ra tula nilo.

⁹ Rongogo' noyo ragu-ragu kutu, panguasa' ru Israil kau ngai', akau ondo' masisang ra katimpakan am mangulau ra katapatan masauk ra kasalaan.

¹⁰ Akau nambaal ra Jirusalim, bandar ri Aki Kapuuno', mimpuun ra pamatayan am kolondo' katimpakan.

¹¹ Ilo panguasa' ru bandar nampaugar ra pamarintaan koson makaalap ra rasua, ngaangai' imam mambala' ra arati' ru Ukum koson makaalap ra gaji', am nabi-nabi niayuk nambala' ra pinaintalang koson makaalap ra ruit; kaa' mindagu ilo ngaangai' ra Tuhan mabaya' risilo. Konilo, “Kalo malumpa' takau ru karaat, sabap Tuhan mabaya' ritakau.”

¹² Sabap ra kalaatan min, Sion raduon koson ra tana', Jirusalim pasaukon ra tuntur ru nalunsai, am bulur intok Baloi ru Tuhan masauk ra kataunan.