MIKA 2 - Tanou Moonsoi Timugon

Nasip ru ulun ondo' mangimbolo' ra ulun musikin

¹ Aibui boo ra ulun-ulun ondo' mangatang ra kalaatan ondo' kalo mantilayun am liminuya' ra intok pambalangan paat ra tanga' ru rondom. Paat ra orou sinumirang baalon nilo kalaatan ondo' inatang no sabap ra maalap nilo mambaal raginio.

² Paat ilo mompogogot ra umo, gumaau ilo ra umo ru ulun bokon. Paat ra ilo mompogogot ra baloi, gumaau ilo ra baloi ru ulun bokon. Kolondo' sambaloi ru osoi pana, kapoam rapu' ru osoi pana ondo' mabayag.

³ Ginio ra mindagu Tuhan, “Nangatang aku koson maparatong ra karaat patiwon ramuyun. Kalo makapagiru' kau intor ra karaat no. Malumpa' kau ra kapaganan, am akau pana kalo boo makapaliso ra malilimbau.

⁴ Paat ra rumatong ginio, alapon ru ulun tunung intor ramuyun no koson ra pangiisan. Maririmbai ilo ra rimbai panguliran ragitio: Napuso akai noyo ra nalingon! Tuhan nangalap noyo ra pagun mai am tinaakan no ra ulun ondo' namparakop ramon.”

⁵ Ginio ra paat ra tana' no pinasaguli' ra ulun ru Tuhan, kolondo' sangulun pana ramuyun matayaran.

⁶ Ulun nampatanou raki' am mindagu, “Pai' potonowo' ramon. Pai' potonowo' intor ra ngaangai' no. Maaru' lair i Aki Kapuuno' kalo mampakauyu' ritakau.

⁷ Guang min kia' ra Israil ti inulas? Kalo kia' mokoorot Tuhan? Topot kia' mambaal Io ra baal koson raginio? Sala' ka kia mindagu Io ra molomoi ra ulun ondo' mambaal ra motopot?”

⁸ Taam Tuhan, “Namulunsar kau ra ulun Kuno ra ilo ti ilain koson ra pantula'. Ungkuyon ondo' minuli' intor ra pangayawan am indoson nilo ti maayag giu' ra baloi. Kaa' akau maginaa koson mantakou ra sukub ondo' pinakai nilo.

⁹ Pinagiru' min ngaangai' ruandu' ru ulun Kuno intor ra baloi ondo' kasagaan nilo; ginaau min barakat Kuno ra sabuoi-buoi no intor ra lalaing-lalaing nilo.

¹⁰ Karat no am ugar no intor ragiti. Kolondo' boo intok ondo' mamimio. Tula min naparatong ra karaat ondo' makalalaa' ra intok ti.

¹¹ Masaga' kau ra nabi ondo' masaga' magabau am mamparuung, am ondo' mindagu, ‘Manala' aku ra makaalap kau ra wain am inumon makagauk ondo' masuang toojo.’

Bantu' intor ra pamayagan

¹² Kaa' mampatimung Aku ramuyun, ulun Kuno Israil kau ngai' ondo' lakat poyo maayag. Manimung Aku ramuyun koson ra domba-domba ondo' muli' ra kandang. Koson ra padang ru sakot ondo' nososok ra domba, igondo' poyo pagun min mososok ra ulun.”

¹³ Mangukab i Aki Kapuuno' risilo ra ralan koson magibit risilo mingkual intor ra pamatiran. Jumunjung ilo mingkual intor ra kulobon garabang ru bandar no am magiru'. Tuhan galama', ondo' masauk ra raja' nilo maningganai risilo mingkual.