MAZMUR 99 - Tanou Moonsoi Timugon

I Aki Kapuuno', Raja' ra matulai

¹ Tuhan no raja', ulun monontol sabap ra Io; nanturung Io ra tampak ru kirub, am tana' ti pana mauyog.

² Maayo kuasa' ru Tuhan giu' ra Sion; Io mangunguasa' masawat kaga' ra ngaangai' bansa'.

³ Moonong ulun mongompor ra inggalan Nano ondo' maayo am matulai. Io no matulai!

⁴ Okou Raja' ondo' maikang, tinogom Mu ukum; pinabigor Mu katimpakan giu' ra Israil, pinaugar Mu ukum am katimpakan.

⁵ Omporo' noyo Tuhan, i Aki Kapuuno' takau; igugulatur no samba ra saang ru panturungan Nano! Io no matulai!

⁶ I Musa am i Arun nakasubol ra imam-imam Nano, am i Samuil noyo sangulun intor ra makiasi' Riso; mampiau ilo ra Tuhan am tumaam Io risilo.

⁷ Intor ra lugu' ru gaun, mindagu Io risilo, gumagaya' ilo ra ukum am panusuban ondo' pataakon Nano.

⁸ Iou Tuhan, i Aki Kapuuno' mai, iniou Mu kinitaak ru ulun Muno; pinatalang Mu ra Okou noyo i Aki Kapuuno' ondo' masaga' mangampun ra ulun, kabalu' pana inukum Mu ilo sabap ra tula nilo.

⁹ Omporo' noyo Tuhan, i Aki Kapuuno' takau am sambaan Io giu' ra tampak ru bulur Nano ondo' matulai! Tuhan, i Aki Kapuuno' takau ra matulai.