MAZMUR 98 - Tanou Moonsoi Timugon

I Aki Kapuuno' Mangunguasa' ra tana' ti

¹ Mazmur. Rimbayi' noyo Tuhan no ra rimbai nakabagu; nambaal Io ra kandoi makaimuag! Ralalom ru kuasa' am kaikangan Nano galama', noowot No noyo kamanangan.

² Pabalaan ru Tuhan namanangan Nano; paraguon No katimpakan Nano ra ngaangai' bansa'.

³ Suguton No bantu' Nano ra ulun ru Israil, ulun Nano ralalom ru katagaman am gagaya' Nano risilo. Ngaangai' bansa' ra titikop ru tana' ti nakakito noyo ra kamanangan ri Aki Kapuuno' takau.

⁴ Akau titikop ru tana' ti, rimbayi' noyo Tuhan ralalom bansuk ru guang; omporo' Io no ra rimbai am indii!

⁵ Rimbayi' noyo Tuhan ra pangamparan, ondo' sumbayaan ru jitor.

⁶ Samputi' noyo bujung am tarumpit, pagilakup no ra saang ru Tuhan, Raja' takau!

⁷ Indagu no, okou raat am ngaangai' suang muno, parimbai no, okou tana' ti am ngaangai' ru minayan rirun.

⁸ Pagilakup no, akau ngaangai' ru sungoi; pagilakup no ra saang ru Tuhan, akau ngaangai' ru bulur,

⁹ sabap ra Tuhan matong mamarinta ra tana' ti. Parintaan No namagun ra tana' ti ralalom ru kabanisan ru guang am matimpok.