MAZMUR 9 - Tanou Moonsoi Timugon

Pakiasian paringkuanangan sabap ra i Aki Kapuuno' no matimpok

¹ Ra tingganai santimungan maririmbai. Sumugut ra layuk ri Mut-Labin. Mazmur ri Daut.

² Ralalom ngaangai' suang ru guang kuno, ra aku mongompor Rirun Tuhan, am tunungon ku nansalinut kaimuagan ondo' binaal Muno.

³ Maansukan aku marimbai sabap ra Okou, am marimbai mongompor Rirun sabap ra Okou, Ondo' Matulai Kaga'.

⁴ Paat ra Okou papulusat matong, pantula' kuno liminukiat; nakasaru ilo ra naratu' am minatoi.

⁵ Okou namarinta koson ra akim ondo' matimpok, am Okou no manungka' ra binaal kuno.

⁶ Okou nangukum ra bansa'-bansa' ondo' kalo makaulig Rirun, am mamuso ra ulun malaat; kalo boo karaan ilo ra sabubuoi no.

⁷ Pantula' maino naluus ra sabubuoi no; pinuso Mu ngaangai' bandar nilono, am liningon ilo no linilianan.

⁸ Kaa' Tuhan noyo mamarinta ra sabubuoi no; am binaal No panturungan Nano koson mangakim ra tana' ti.

⁹ Matimpok pamarintaan no ra pagun ti, am nangakim ra ngaangai' ulun ra sotopot-topot no.

¹⁰ Tuhan noyo sindungan ru ulun ondo' inimbolo', intok sindungan paat ra makakapaganan.

¹¹ Ilo ondo' makaulig Rirun malansan Rirun, iou Tuhan; osoi-osoi ayuk pana matong Rirun no kalo iruanin Mu ilo.

¹² Koompor kono Tuhan ondo' namarinta ra Sion! Potonowo' noyo binaal Nano ra moonong bansa'!

¹³ Mangkara' i Aki Kapuuno' risilo ondo' naimbolo'; kalo malilianan No tangi' nilono, ukumin No ulun ondo' mangimbolo' risilo no.

¹⁴ Pakaasi' no raki', iou Tuhan! Ilai' noyo, pantula' kuno ondo' mangimbolo' raki'. Bayago' aku no intor ra kapatayan, iou Tuhan,

¹⁵ maa' raginio mokopongompor aku Rirun ra saang ru mamagun ru Jirusalim. Magilakup am maansukan aku ra Okou namayag raki'.

¹⁶ Bansa'-bansa' ondo' kalo makaulig Rirun maratu' ilo ra luang ondo' kinali nilo galama'; napataan ilo ra paninigot, kaa' ilo galama' siminulung.

¹⁷ Tuhan galama' napabala' ra Io no matimpok toojo; ulun malaat nakasulung sabap ra atan ondo' binaal nilo galama'.

¹⁸ Kapatayan noyo pompor ru ngaangai' ulun mangalaat, ngaangai' ulun ondo' mangimpai ri Aki Kapuuno'.

¹⁹ Ulun musikin kalo lilianin ra sabubuoi no; ulun naimbolo' kalo sabubuoi no kolondo' kalansanan.

²⁰ Sukal no, iou Tuhan, akimi' noyo bansa'-bansa', pai' polosoo' ulun makalabus ra ukuman.

²¹ Ilaano' ilo, iou Tuhan; patutuno' ilo no ra ilo no ulun ayuk.