MAZMUR 87 - Tanou Moonsoi Timugon

Pangamparan ra Jirusalim

¹ Mazmur ru bansa' ri Kora. Rondo' rimbai. Namangun Tuhan ra Bandar Nano giu' ra bulur ondo' matulai;

² tagamin No toojo bandar Jirusalim ka intok-intok ra bokon giu' ra Israil.

³ Rongogo' noyo, okou bandar ri Aki Kapuuno', Baal-baal ra moonsoi ondo' sinabit Nano ra koson rirun:

⁴ “Bulintok ra aku mapabatik ra ngaangai' bansa' ondo' gumagaya' Raki', pasubolon Ku niayuk Misir am Babilonia; am poyo Palistin, Tirus am Itiopia, makaaya' ra koson mamagun ru Jirusalim.”

⁵ Ulun mindagu ra Sion, ra ngaangai' ru bansa' nakaaya' koson mamagun ra bandar no, am Io Ondo' Masawat Kaga' no mapaikang riso.

⁶ Pasubolon ru Tuhan ngaangai' ru bansa', ralalom pamatikan ra mamagun ru Jirusalim.

⁷ Maririmbai am lumigo' ilo, “Sion noyo puun ru ngaangai' ru barakat mai.”