MAZMUR 84 - Tanou Moonsoi Timugon

Moondom ra Baloi ri Aki Kapuuno'

¹ Ra tingganai ru santimungan maririmbai. Sumugut ra rimbai ri: Gitit. Mazmur ru bansa' ri Kora.

² Mapara' piboo kinoonsoi ru Baloi Muno, iou Tuhan Ondo' Maayo Kaga' Kuasa'!

³ Makaguang-guang aku toojo mayan ra giu' no. Moondom aku kaga' mayan ra Baloi ru Tuhan. Ralalom sotopot ru guang, maansukan aku marimbai ri Aki Kapuuno' ondo' maayag.

⁴ Kaa' pilit pana mambaal ra bunsut, am tuntuayan makaintok ayanan; gogol ru susuit patampakon mamaar ra altar Muno, iou Tuhan Ondo' Maayo Kaga' Kuasa', Raja' kuno am i Aki Kapuuno' kuno.

⁵ Mapara' piboo bansuk ru ulun ondo' minayan ra Baloi Muno, kalo langgain nilo rimbai mongompor Rirun.

⁶ Pakaansuk noyo ilo ondo' nakaalap ra ikang intor Rirun, am ondo' makaguguang mongoi sual ra Bulur Sion.

⁷ Liliwa' nilo minugar ra lampam Baka ondo' napua', lampam raginio pana makataur boo ru timug; rasam lair namanu' ra kulam-kulam nano.

⁸ Kinaikang nilono gumaai-gaai; muma' ilo ri Aki Kapuuno' ra Bulur Sion.

⁹ Rongogo' noyo pakiasian kuno, iou Tuhan i Aki Kapuuno' Ondo' Maayo Kaga' Kuasa'; rongogo' noyo, iou i Aki Kapuuno' ri Jakub.

¹⁰ Barakato' noyo raja' maino, iou Aki Kapuuno', raja' ra pinili' Muno.

¹¹ Moonsoi poyo mayan songorou ra Baloi Muno ka saribu ngoorou ra intok ra bokon; maansayan aku migor ra kulobon ru Baloi ri Aki Kapuuno' kuno ka mayan ra baloi ru ulun malaat.

¹² Tuhan noyo manindung am raja' takau ra matulai, barakaton No itakau ra kaansayan am katulayan. Kalo ingain No atan-atan ondo' moonsoi intor ra ulun ondo' bayag nano kolondo' ruruko.

¹³ Pakaansuk noyo ilo ondo' mangintopot Rirun, iou Tuhan Ondo' Maayo Kaga' Kuasa'!