MAZMUR 81 - Tanou Moonsoi Timugon

Rimbai pangiantakan

¹ Ra tingganai santimungan maririmbai. Sumugut ra rimbai ri: Gitit. Mazmur ri Asap.

² Pagigindii no ra maansukan ri Aki Kapuuno', manungka' ritakau; rimbayi' min ra rimbai mongompor i Aki Kapuuno' ri Jakub.

³ Patalimpuuno' noyo miujik am asaso' tamburing; parimbai ra sulabit matangil am kayuson jitor am gambus.

⁴ Samputi' noyo bujung bulintok ra pangiantakan takau ra bulan bagu am bulan salawang.

⁵ Gitio noyo rondo' ukum ra tayar ru Israil, rondo' panusuban intor ri Aki Kapuuno' ri Jakub.

⁶ Pataakon No ukum Nano ra ulun ru Israil, bulintok ra Io mamulunsar ra pagun ru Misir. Morongog ku bolos ra kalo mauligan ku mindagu,

⁷ “Kinayang ku noyo sinaanan mino; am mapalabus ramuyun intor ra kandoi pajajalin.

⁸ Bulintok ra akau makakapaganan, mampiau kau Raki', am Aku pana mamayag ramuyun. Intor ra intok pansibunian Kuno ra ralalom ru gaun ru ganit, iowon Ku kinitaak mino; giu' ra taur ru timug Miriba nangkinam Aku ramuyun.

⁹ Akau ulun Kuno, rongogo' noyo papakaraan Kutu; okou Israil, moonsoi rumongog kau ra ragu Kutu!

¹⁰ Pai' kau samba ra tuhan ra bokon.

¹¹ Aku noyo Tuhan, i Aki Kapuuno' min, ondo' nagibit ramuyun miningkual intor ra Misir. Kabang kau am paakanon Takamin.

¹² Kaa' ulun Kuno kalo mangkirongog ra ragu Kuno; Israil kalo gumagaya' Raki'.

¹³ Ginio ra nopoloso Aku risilo maya' ra kasagaan nilono, am mambaal ra kasagaan nilono.

¹⁴ Amon ru rongogon Aku ru ulun Kuno, amon ru gumagaya' ilo Raki',

¹⁵ kalaan Ku pantula' nilono ra mataki', am kukumin ngaangai' pantula' nilono.

¹⁶ Kukumin Ku ulun masisang Raki'; am ukumin ilo ra sabuoi-buoi no.

¹⁷ Kaa' paakanon Takamin ra gandum moonsoi, am basugon Ku ra ruu' ru maningot.”