MAZMUR 8 - Tanou Moonsoi Timugon

Katulayan ri Aki Kapuuno' am urumat ra ulun

¹ Ra tingganai ru santimungan maririmbai. Sumugut ra layuk ri Gitit. Mazmur ri Daut.

² Iou Tuhan, i Aki Kapuuno' mai, katulayan Muno makito ra titikop ru tana' ti! Suku' ra limbowon no katulayan Muno inompor,

³ rinimbai ru ngaangai' lalaing am lalagang. Karajaan Muno mapanggol kalo mauyog koson mamuso ra ngaangai' pantula' Muno.

⁴ Paat ra aku mantingaa' ra limbowon ondo' sinauk Muno, bulan am butitin ondo' pinaatang Muno,

⁵ atan kia ulun no saboi Okou mangkara' risilo? Ilo ulun toojo ayuk, kaa' Okou niayuk magalung risilo.

⁶ Sinauk Mu ilo saboi mamaar mogondo' Rirun galama'; pinasampak Mu ra ulu nilono katulayan am pangurumatan.

⁷ Sinusub Mu ilo mangunguasa' ra atan ondo' sinauk Muno; ngaangai' sinauk Muno pinakuku' Mu risilo:

⁸ domba, sapi' am ngaangai' bibiag, am niayuk bibiag ra masangit ru kataunan,

⁹ susuit ra lantur am papait ra raat, am niayuk moonong ondo' maayag ra raat.

¹⁰ Iou Tuhan, Tuhan mai, katulayan Muno nakito ra titikop ru tana' ti.