MAZMUR 78 - Tanou Moonsoi Timugon

I Aki Kapuuno' am ulun Nano

¹ Sisindiron ri Asap. Rongogo' min pangilaan kuno, akau ulun ku ngai', am talinaasi' min raguon kuno.

² Raguon ku ra ragu ru pagabigan, am mapabala' aku ra abig ra galing i,

³ Babaal ra norongog am napandayan takau, ondo' pinabala' noyo ru kinamatuaan takali.

⁴ Kalo pasibunion takau ginio intor ra anak-anak takau, pabalaan takau ra papag ra rumatong no koson kuasa' ru Tuhan am baalon No ra maatang kaga', am niayuk binaal ra makaimuag kaga' ondo' binaal Nali.

⁵ Pataakon No ukum ra ulun ru Israil, am panusuban ra papag ri Jakub. Inanian No kinamatuaan takali ra susuban koson pailaan ukum Nano ra anak-anak nilo,

⁶ maa' raginio papag ra matong no makaigila', am pabalaan nilo ra anak-anak nilono.

⁷ Koson raginio malansan ilo ri Aki Kapuuno', am kalo mampalilian ra binaal Nali, kaa' masalok gumagaya' ra panusuban Nano.

⁸ Kalo masauk ilo koson ra kinamatuaan nilai, ulun ondo' masalok malasu' guang am kalo gumagaya'; pangintapatan nilono kalo mapiot, am kalo gumagaya' ilo ri Aki Kapuuno'.

⁹ Ulun ri Ipraim ondo' nampaguut ra panah am tanggayan nano, magiru' bulintok ra pangayawan.

¹⁰ Kalo sinugut nilo nabantuan nilo ri Aki Kapuuno'; marara' ilo gumagaya' ra ukum Nano.

¹¹ Nalilianan nilo ngaangai' binaal Nali, baal kaimuagan ra pinatalang Nali risilo.

¹² Ra saang ru kinamatuaan nilai, napatalang i Aki Kapuuno' ra baal kaimuagan giu' ra tana' marata' ru Joan ra pagun ru Misir.

¹³ Linapak No raat am naningganai risilo lumaup; sinauk No timug no koson ra timbok.

¹⁴ Bulintok matawang tingganayon No ilo ra gaun, am bulintok molondom tingganayon No ilo ra simbula' ru apui.

¹⁵ Linapak No bulur batu giu' ra tana' kaagisan, am painumon No ilo ra timug intor ra lumuab-luab.

¹⁶ Susubon No timug no mingkual intor ra batu, am timug no maaug koson ra sungoi.

¹⁷ Kaa' rayusin nilo makatula ri Aki Kapuuno', am lumaat ilo Riso Ondo' Maayo kaga' Kuasa' giu' ra tana' kaagisan.

¹⁸ Singonon nilo mangkinam ri Aki Kapuuno', kitaakon nilo akanon ra kasagaan nilo.

¹⁹ Manggal ilo ri Aki Kapuuno' ralalom ragu, “Mapaakan nua' i Aki Kapuuno' no ritakau giu' ra tana' kaagisan?

²⁰ Motopot noyo ra i Aki Kapuuno' napalapak ra bulur batu, am timug no maaug koson kinaaug ru sungoi; kaa' mapaakan Io nua' ritakau ra ruti', am manaak ra kual ra ulun Nano?”

²¹ Ginio sabap, Tuhan siminangit nangining ra kitaakon nilo; jinalak No ilo ra apui, am giminaai sangit Nano risilo,

²² sabap ra kalo mangintopot ilo Riso, am kalo niayuk mangintopot ra Io makapamayag risilo.

²³ Kaa' mindagu i Aki Kapuuno' ra limbowon giu' ra rasawat, am manusub koson paukabin kulobon.

²⁴ Nanaak Io risilo ra akanon intor ra suruga', am naparatu' ra manna koson paakanin risilo.

²⁵ Pinaakan No ilo ra masuang akanon; ondo' akanon ru malaikat.

²⁶ Nangkinibit Io ra angin sirangon rumatong, am ralalom kuasa' Nano angin rabugus mingkual.

²⁷ Patuunon No susuit ra ulun Nano, susuit no masuang koson ra agis ru nagas giu' ra raat;

²⁸ maratu' susuit no ra nangkiman nilono, am ra libung intok inayanan nilono.

²⁹ Ilo pana nangakan saboi maasug; pataakon ri Aki Kapuuno' atan ondo' gogoton nilono.

³⁰ Kaa' patiakan nilo kalo poyo nopopok, am liliwa' nilo mangkan,

³¹ siminangit i Aki Kapuuno' risilo, am pinatoi No ulun ru Israil ondo' mangamulok am maikang.

³² Kabalu' pana koson raginio, lakat ilo poyo makatula', iou pana i Aki Kapuuno' mapakito ra baal kaimuagan, kalo mangintopot ilo Riso.

³³ Ginio ra binutus ri Aki Kapuuno' painawo nilono, am binukat No paminawaan nilono.

³⁴ Masalok i Aki Kapuuno' mamatoi ra kukula' ngaulun intor risilo, bokon no sumaguli' Riso; pansagulian guang nilo am makiasi' Riso ra sotopot-topot no.

³⁵ Makara' nilo ra i Aki Kapuuno' no manindung risilo, ra Io Ondo' Maayo Kaga' Kuasa' no mamamayag risilo.

³⁶ Kaa' ngaangai' ragu nilono abau ayuk, am ngaangai' pinaragu nilono abau ayuk toojo.

³⁷ Kalo gumagaya' ilo Riso; kalo ginuut nilo nabantuan nilo ri Aki Kapuuno'.

³⁸ Kaa' makaasi' i Aki Kapuuno' ra ulun Nano. Ampunon No tula nilono am kalo mamuso risilo. Masalok Io mongorot ra sangit Nano, am kalo paabuson no sangit Nano.

³⁹ Makara' No ra ilo no ulun mapandai matoi, koson ra angin sumiob am lumiot.

⁴⁰ Mapara' ilo masalok lumaat Riso giu' ra tana' kaagisan; mapara' ilo masalok mapangiluk ra guang Nano!

⁴¹ Masalok ilo mangkinam ri Aki Kapuuno', am mapakaruol ra guang ru Io Ondo' Matulai Kaga', i Aki Kapuuno' ru ulun ru Israil.

⁴² Malilianan nilo kuasa' Nano ondo' maayo; am bulintok ra ilo binayag ri Aki Kapuuno' intor ra pantula',

⁴³ bulintok Io napakito ra ngaangai' baal kaimuagan giu' ra Misir, am baal kaimuagan giu' ra tana' marata' ru Joan.

⁴⁴ Kinulau No timug ru sungoi masauk ra raraa', saboi timug no kalo boo mainum ru ulun ru Misir.

⁴⁵ Inataran No bulongor koson mangimbolo' ra ulun ru Misir, am antit koson mamuso ra umo nilono.

⁴⁶ Inataran No gapu' koson mangakan ra tatanom nilono, am mamuso ra umo nilono.

⁴⁷ Pinaratu' No rasam batu koson mamuso ra puun ru anggur nilono, am bolobou kiminotog mamuso ra puun ru nunuk nilono.

⁴⁸ Pinatoi No tinambiag nilono ra rasam batu, am pinatoi No tinambiag nilono ra ganit.

⁴⁹ Pinaabus No sangit ra napaangan, koson ayuk nangator ra malaikat mamamatoi.

⁵⁰ Kalo oroton No sangit Nano kapoam mopoloso risilo maayag, kaa' pinatoi No ilo ra maruol ra tumapik.

⁵¹ Pinatoi No ngaangai' anak ungkuyon ra katuaan ru ngaangai' sasambaloi ulun ru Misir.

⁵² Koson boo ra magagalung, naningganai i Aki Kapuuno' ra ulun Nano am mangitang risilo mansail ra tana' kaagisan.

⁵³ Kalinuos No ayuk mangitang risilo saboi ilo kalo malaa', kaa pantula' nilono nolosor ra raat am minatoi.

⁵⁴ Ibiton No ulun Nano mongoi ra tana' Nano ondo' matulai, mongoi ra gunung ondo' tinalingaau Nano galama'.

⁵⁵ Bulintok ra ulun Nano nakasuku' ininggalaran No namagun no, am tatayaro' no pagun no ra ngaangai' ru bansa' ru Israil, am intok ru pantula' pinataak No ra ulun Nano.

⁵⁶ Kaa' ulun Nano lumaat am nangkinam ri Aki Kapuuno' Ondo' Maayo Kaga' Kuasa', kalo ginagaya' nilo panusuban Nano.

⁵⁷ Lumaat ilo am kalo gumagaya' koson niayuk ra kinamatuaan nilai; koson ra panah napikong, kalo malansanan ilo.

⁵⁸ Napasangit ilo ri Aki Kapuuno' ra nambaal ra intok sambayangan ra sinungkalalaing, am napasangit Riso ra ngaangai' sinungkalalaing nilono.

⁵⁹ Siminangit toojo i Aki Kapuuno' bulintok nakakito ra babaal raginio, am inggalari' No lingono' ngaangai' ulun Nano.

⁶⁰ Tinatang No kim Nano giu' ra Silo, intokon Nano ra nasuangan ru ulun Nano.

⁶¹ Pinoloso no pantula' Nano nampagaau ra Kaban Nabantuan, tatandu' ru kuasa' am katulayan Nano.

⁶² Sumangit Io ra ulun Nano galama', am polosoon No ilo potoyon ru pantula' nilono.

⁶³ Buayoi minatoi bulintok ra mangayou, ralaa kolondo' boo maguot.

⁶⁴ Imam pinatoi ra ilang, am andu' nilo sawayon kalo pantangion.

⁶⁵ Pupus no sumukal Tuhan koson sumukal intor ra nombolong; maayo guang koson ra sangulun maikang ondo' nakainum ra wain.

⁶⁶ Pantula' Nano malaa' am liminukiat, am nanauyu' risilo ra sabuoi-buoi no;

⁶⁷ kaa' inggalarin No papag ri Jusup; kalo pinili' No bansa' ri Ipraim.

⁶⁸ Kaa' pinili' No bansa' ri Jiuda am Bulur Sion ondo' topot-topot tagamin No.

⁶⁹ Ra giu' no nambaal Io ra Baloi Nano koson ra Baloi No giu' ra suruga', am koson ra tana' ti, mapiot ra sabuoi-buoi no.

⁷⁰ Pinili' No ulipon Nano, i Daut, am nangalap riso intor ra limayak makasakot,

⁷¹ intor ra intok nano magalung ra tinambiag, am napasauk riso ra raja' ru Israil koson magalung ra ulun ri Aki Kapuuno'.

⁷² Alungin ilo toojo ri Daut no, am mangila' risilo maya' ra kapandayan no.