MAZMUR 75 - Tanou Moonsoi Timugon

I Aki Kapuuno' nangakim ra ulun

¹ Ra tingganai ru santimungan maririmbai. Sumugut ra rimbai: Pai' pusoo'. Mazmur ri Asap. Rimbai.

² Mongompor akai Rirun, iou Aki Kapuuno', maringkuanang akai Rirun. Paraguon mai katulayan Muno, am potonowon mai binaal Muno ra makaimuag kaga'.

³ I Aki Kapuuno' minindagu, “Bulintok ra pangaruan Kuno, mangakim Aku ra ulun ra natimpok.

⁴ Kabalu' pana tana' ti mauyog am ngaangai' ru mamagun monontol, kapioton ku lugu'-lugu' no.

⁵ Mambala' aku ra ulun mangalaat maa' raginio kalo lumimbau ilo;

⁶ mambala' aku risilo maa' raginio pai' ilo masawat ragu.”

⁷ Katimpakan kalo matong intor ra sirangon kapoam intor ra kalasaan, intor ra ralayo kapoam rabugus;

⁸ i Aki Kapuuno' noyo galama' masauk ra akim, mokoondo' inukum am mokoondo' pinalabus.

⁹ Nampaguut Tuhan no ra sangkir ondo' sinuangan ra sangit Nano koson ra wain masalut. Lingigo' No suang no maa' raginio inumon ra ulun mangalaat ra tana' ti; inumon nilo saboi makai'.

¹⁰ Kaa' kalo langgain ku mapatanou ri Aki Kapuuno' ri Jakub, kapoam marimbai ra rimbai pangamparan Riso.

¹¹ Tutukon No kuasa' ru ulun malaat, kaa' ruangin No kuasa' ru ulun moonsoi.