MAZMUR 73 - Tanou Moonsoi Timugon

BUUK KATALU ( Mzm. 73—89 ) Katimpakan ri Aki Kapuuno'

¹ Mazmur ri Asap. Moonsoi toojo i Aki Kapuuno' ra ulun ru Israil, ilo ondo' makaguang mabanis.

² Kaa' guang kuno maimamang, pangintapatan kuno mamaar poyo katatak,

³ sabap ra sumolon aku ra ulun malilimbau, bulintok ra aku magilong ra ulun malaat lumangkaya'.

⁴ Kalo marualan ilo; maikang am maligag ilo.

⁵ Kalo mansaan ilo ra imbolo', kalo makatuum ra kapaganan koson ra ulun bokon.

⁶ Intor raginio lumimbau ilo, am masalok mambaal ra kalaatan;

⁷ guang nilo natikop ra kalaatan, am pangkaraan nilo giino ayuk mangatang ra kalaatan.

⁸ Magasab ilo ra ulun bokon am mindagu ilo ra malaat, lumimbau ilo am mangatang koson mangimbolo' ra ulun.

⁹ Masisang ilo ri Aki Kapuuno' ra suruga', am lumimbau ilo ra ulun ru tana' ti,

¹⁰ saboi ulun ri Aki Kapuuno' pana mangkirongog risilo am mangintopot ra atan ondo' rinagu nilo.

¹¹ Mindagu ilo, “Kalo makapandai i Aki Kapuuno' ra atan ondo' binaal takau; Io Ondo' Masawat kaga' kalo makapandai ra atan ondo' binaal takau.”

¹² Ginio noyo babaal ru ulun malaat; kaayagan nilo matasu' am rapu' nilo rumuang-ruang.

¹³ Papalo ku ayuk sumorot guang koson sumauk ra matulai, kolondo' onong aku minggalur ra tula.

¹⁴ Iou Aki Kapuuno', monsongorou aku maimbolo'; moonong susuab ti aku imboloon.

¹⁵ Amon ru mindagu aku koson raginio, talikurin ku ulun Muno.

¹⁶ Kinamin ku aratio' babaal raginio, kaa' mapagon ku aration,

¹⁷ saboi ra aku mumpos ra Baloi Muno, bagu naratian ku pupus ru ngaangai' ulun malaat no.

¹⁸ Patampakon Mu ilo ra intok ondo' malamog ondo' mangkinibit risilo maratu' am mapuso.

¹⁹ Sangkuliop ilo pinuso pupus nilono makalalaa' toojo.

²⁰ Koson ayuk ra inupi lumiot bulintok tumawang, bulintok ra Okou sumukal, iou Tuhan, ilo pana lumiot.

²¹ Bulintok ra guang kuno maruol, am kalimanan ru guang pinilat,

²² sasambungon aku koson ra bibiag; kalo maratian ku kasagaan Muno.

²³ Kaa' lakat aku po soroi mumbir Rirun, am guuton Mu kalindu' pamiris kuno.

²⁴ Mangila' Kou raki' ralalom ru bilin, am apuon Mu aku ra urumat.

²⁵ Osoi poyo longgom kuno giu' ra suruga' amon sala' ka Okou? Kolondo' boo guangon kuno ra tana' ti amon sala' ka Okou.

²⁶ Iou pana salibuor kuno malawo, Okou noyo kaikangan kuno, iou Aki Kapuuno'; Okou ayuk longgom kuno ra sabuoi-buoi no.

²⁷ Ulun ondo' manatang Rirun maaru' io no mapuso, pusoon Mu ilo ondo' kalo gumagaya' Rirun.

²⁸ Kaa' guang ku, moonsoi poyo sumoroi mumbir ri Aki Kapuuno'. Makaalap aku ra sindungan intor ra Tuhan Raja', am potonowon ku ngaangai' ondo' binaal Nano.