MAZMUR 72 - Tanou Moonsoi TimugonPakiasian ra tayar ru Raja' 1 Intor ri Raja' Salomo. Iou Aki Kapuuno', pailaa' ukum Muno ra raja', pataako' katimpakan Muno riso, 2 maa' raginio raja' no mamarinta ra ulun Muno ra kabanisan ru guang, am matimpok pakuan ra ulun ondo' inimpayan. 3 Gama' ru pagun ragitio lumangkaya', am makaliman ra katimpakan. 4 Gama' ru manungka' raja' ra ulun musikin, mangindangan ra ulun musikin am niayuk mangala ra ulun mangimbolo' risilo. 5 Gama' ru ulun Muno sumamba Rirun buoi ru mato ru orou sumirang, buoi ru bulan makasinda, ra sabuoi-buoi no. 6 Gama' ru raja' koson ra rasam rumatu' ra limayak, koson ra timug ru rasam manimug ra umo. 7 Gama' ru katimpakan makatanou ra buoi ru raja' maayag, am kinalangkayaan mantilayun buoi sinda ru bulan. 8 Karajaan nano liminangka' intor ra raat mongoi ra raat, intor ra sungoi Iprat saboi ra pompor ru tana'. 9 Namagun ra tana' kaagisan kumuku' samba ra saang nano am pantula' kuasaan no. 10 Ngaangai' raja' ru Tarsis am ngaangai' pulu' mapataak riso ra tangguang; ngaangai' raja' ru pagun Syiba am Siba manaak niayuk riso ra tangguang. 11 Ngaangai' raja' migulatur samba ra saang nano, am ngaangai' bansa' sumauk ra ulipon nano. 12 Raja' mamayag ra ulun musikin ondo' mampiau riso, am niayuk ulun ra inimpayan am ulun makakapaganan. 13 Raja' makaasi' ra ulun musikin am niayuk ulun malawo, am mamayag ra ulun balabag. 14 Raja' mamayag risilo intor ra pangimbalaan am pampatayan; kaayagan nilo mokologo toojo riso. 15 Kaayag noyo raja'! Gama' ru paapuon raja' no ra mas intor ra pagun Syiba; gama' ru pakiasian koson riso mantilayun ayuk; gama' ru barakaton raja' no ri Aki Kapuuno' ra sabuoi-buoi no! 16 Gama' ru makabujuk bilor no ra titikop ru pagun; gama' ru matitip bulur no ra tatanom, koson kinalabung ru tatanom ra Libanon. Gama' ru mososok bandar no ra ulun, koson ra sakot tumuu' ra limayak. 17 Gama' ru sabuoi-buoi no inggalan ru raja' karaan, am sasabiton inggalan nano mantilayun koson mato ru orou. Gama' ru ngaangai' bansa' makibarakat koson ra raja', am ngaangai' ulun manabit ra raja' makakaansukan. 18 Omporo' noyo Tuhan, i Aki Kapuuno' ru ulun ru Israil, Io ayuk mambaal ra baal-baal ra makaimuag toojo. 19 Omporo' noyo inggalan Nano ra matulai ra sabuoi-buoi no, gama' ru titikop ru tana' natikop ra katulayan Nano! Amin! Amin! 20 Gini noyo pakiasian ri Daut anak ri Isai. |
Hakcipta © Bible Society of Malaysia, 2013.
Bible Society of Malaysia