MAZMUR 7 - Tanou Moonsoi Timugon

Pakiasian makitaak ra katimpakan

¹ Sulabit ri Daut ondo' rimbayon no ra Tuhan sabap ri Kus, ulun ru Binjamin no.

² Iou Tuhan, i Aki Kapuuno' kuno, sumindung aku Rirun; bayago' am palabuso' aku no intor ra ngaangai' ulun ondo' mangasu raki' no.

³ Pai' ilo polosoo' koson ra singa' ondo' manungaap am mangayat raki' ra intok ondo' kolondo' sangulun pana makapamayag raki'.

^4-5 Iou Tuhan, i Aki Kapuuno' kuno, amon ru igondo' aku mambaal ra malaat, amon ru simbaalin ku rangan kuno, kapoam potoyon ku pantula' ra kolondo' sasaban,

⁶ polosoo' ayuk pantula' kuno mangilou am mamparakop raki', am potoyon am tatangon nilo aku ra tana'!

⁷ Luat no ralalom ru sangitan Muno, iou Tuhan, am anggalo' noyo pangayawan ru ngaangai' pantula' kuno! Luat no am indangano' aku no, sabap ra katimpakan noyo kitaakon Muno.

⁸ Patimungo' noyo bansa'-bansa' ra libung Muno, am intor ra panturungan Muno ra suruga' susubo' ilo.

⁹ Okou noyo ondo' mangukum ra ngaangai' ulun. Anii' aku no ra katimpakan, iou Tuhan, sabap ra kolondo' sala kuno.

¹⁰ Polonggoo' noyo kalaatan ru ulun maanggal-anggal, am anii' noyo ulun moonsoi ra timbalos moonsoi, sabap ra Okou no i Aki Kapuuno' ondo' matimpok, malimanan Mu suang ru guang am pangkaraan ru ulun.

¹¹ I Aki Kapuuno' noyo Maninindung raki'; mamayag Io ra ulun ondo' gumagaya' Riso.

¹² I Aki Kapuuno' noyo akim ra matimpok, ondo' magail mangukum ra ulun malaat.

¹³ Amon ru paliso nilono kalo makulau, magasa' i Aki Kapuuno' ra ilang Nano. Tumampos Io am baugon No tanggayan ru panah Nano;

¹⁴ alapon No kinandoi mangayou Nano ondo' makapatoi am pabakison No panah Nano ondo' makasimbula'.

¹⁵ Ilai' noyo ulun malaat mampaguang ra kalaatan; mangatang ilo ra mampajajou am mambaal ra pamparuungan.

¹⁶ Napataan ilo ra jajaling ra ulun bokon, kaa' ilo galama' sumulung.

¹⁷ Ginio ra ilo naukum ru kalaatan nilo galama', am najamaran ru laat nilo galama'.

¹⁸ Maringkuanang aku ra Tuhan sabap ra Io matimpok, marimbai aku mongompor ra Tuhan Ondo' Matulai Kaga' no.